On Lal Solomon 4:1-16
4 Mutan saok sik, kom kato na pwaye!
Motom efal oana mutun sie wuleoa ye nuknuk minini afinyen motom.
Aunsifom sroalsroal ac srosro oana un nani uh
Ke ac putati fineol Gilead me.
2 Wihsum fasrfasr oana sheep
Ma tufahna kalkulla ac owola.
Tia soko selos fulukla;
Nufonna arulana fas, ac kais soko oasr lainya.
3 Ngoasrom oana sie ropin srusra;
Arulana kato ke pacl kom kaskas uh.
Likintupom srusrsrusrame ye nuknuk minini lisringyen motom an.
4 Kwawom raraun ac fwel
Oana tower lal David,
Naweyukla ke soko ah in walwal ma oasr tausin mwe loang sripsripi kac.
5 Titi lom uh oana gazelle fusr lukwa,
Oana deer fak uh ke eltal mongo inmasrlon kiuf uh.
6 Nga ac som ac muta fin inging in myrrh uh,
Oayapa fin inging in mwe keng,
Nwe ke na engyengsrik in lotu uh tuhme,
Ac lohsr uh wanginla.
7 Kom su saoklana sik, kom arulana kato,
Arulana fwel monum nufon!
8 Mutan su nga ako se, fahsru liki Fineol in acn Lebanon;
Fahsru wiyu liki acn loessula Lebanon.
Oatui liki Fineol Amana,
Liki Eol Senir ac Eol Hermon,
Fahsru liki acn ma lufin lion ac leopard oan we.
9 Mutan su nga ako in payuk se, ngetnget se lom an
Ac ah soko kom wulu an,
Arulana usla insiuk!
10 Mutan saok kiuk,
Nga arulana pwar ke lungse lom uh.
Lungse lom uh wo liki wain uh;
Ono keng lom uh wo fohlo liki kain in mwe keng nukewa.
11 Mutan saok sik, ngoasrom emwem oana honey;
Loum oana milk ac honey nu sik.
Nuknuk lom uh keng oana foulin sak cedar Lebanon me.
12 Mutan se su arulana saok sik, el oana sie ima ma oan yen lukma,
Sie ima kalkalyak, ac sie unon in kof kaul nu sin mwet saya,
13 Yen sak uh kapak arulana wo we.
Elos kapak oana ima in sak pomegranate,
Ac oswe fahko su arulana wo.
Pacl nukewa pus sunun sak keng inge: henna, nard,
14 Saffron, calamus, ac cinnamon,
Ac kain in mwe keng nukewa.
Myrrh ac aloes wi pac kap we
Wi kain in ono ma arulana keng.
15 Kof uh unonak ac aksroksrokye ima uh,
Ac infacl srisrik sororror we,
Ac kof uh asrma liki Fineol Lebanon.
Verse Lun Mutan Se
16 Tukakek, Eng Epang me.
Eng Eir me, tuhme nu ke ima luk;
Nwakla yen engyen uh ke foul keng.
Lela mukul se su saok sik in tuku nu ke ima lal
Ac mongo ke fokinsak wolana we.