Psalm 59:1-17
[Psalm lal David, Tukun Saul el Supwala Mwet in Tawi Lohm sel David tuh elos in Unilya]
Pre In Suk Molela*
59 God luk, moliyula liki mwet lokoalok luk;
Langoeyula lukelos su tuyak lainyu!
2 Moliyula liki mwet koluk inge;
Ac langoeyula liki mwet akmas!
3 Liye, elos soano in uniyuwi;
Mwet ingunyar elos fahsreni in lainyu.
Tia ke sripen oasr ma koluk ku ma sufal luk,
4 Oayapa tia ke kutena tafongla luk, LEUM GOD,
Pa pwanang elos kasrusr nu yen elos akola in lainyu we.
5 Tukakek, LEUM GOD Kulana, ac fahsru kasreyu;
God lun Israel, sifacna liye!
Tukakek ac kai mwet pegan inge;
Nik kom pakomuta mwet kutasrik inge!
6 Ke ekela elos ac foloko nu in siti uh
Ac forfor kou, oana kosro ngalngul uh.
7 Lohng pusren kas in akkoluk ac aksangeng lalos.
Lohulos oana cutlass inwalulos,
A elos nunku mu wangin mwet lohng pusraclos.
8 A kom, LEUM GOD, kom isrunulos;
Kom aksruksruke mwet pegan nukewa.
9 Nga lulalfongi ke ku lom;
Tuh kom nien wikla luk, O God.
10 God luk El lungse nga, ac El ac fah tuku nu yuruk;
El ac fah lela tuh nga in liye ke mwet lokoalok luk elos ac kutangyukla.
11 Nikmet onelosi, O God, tuh mwet srahk elos in tia mulkunulosla.
A kutangulosla ke ku lom, ac oru elos in fahsrelik.
Kom Leum lasr ac mwe loeyuk lasr.
12 Ma koluk oan fin ngoasrolos; kas lalos nukewa koluk;
Lela tuh elos in sruhu ke filang lalos!
Ke sripen elos selnga ac kikiap,
13 Kunauselosla in kasrkusrak lom;
Kunauselosla nufon!
Na mwet nukewa fah etu lah God El kol Israel,
Ac kolyuk lal uh ma pac nu fin faclu nufon.
14 Mwet lokoalok luk elos foloko ke ekela,
Elos wowo oana kosro ngalngul ke elos forfor in siti uh,
15 Oana kosro ngalngul ke elos forfor in suk mongo nalos
Ac kou elos fin tia konauk fal nu ke lungse lalos.
16 Tuh nga ac fah onkakin ku lom;
Lotutang nukewa nga ac fah srukak pusrek in on kaksakin lungse kawil lom,
Kom nien wikla luk,
Sie nien lango luk in pacl in ongoiya.
17 Nga fah kaksakin kom, mwet kasru luk.
God, su lungse nga,
El nien wikla luk.
Footnotes
^ Sifa 1 Sam 19:11
