Sie Chronicle 27:1-34
27 Pa inge takin mwet Israel su mwet kol ke kais sie sou ac ota, wi mwet pwapa lalos su oru orekma in karingin tokosrai uh. Kitakatelik mwet kol inge nu ke u singoul luo, fal nu ke malem singoul luo in yac se. Pisen mwet ke kais sie u inge pa mwet longoul akosr tausin, na kais sie u ac muta ye koko lun kais sie captain lun un mwet mweun.
2 Jashobeam, wen natul Zabdiel, pa karingin u se ke malem se meet. Oasr mwet longoul akosr tausin in u sac.
3 El ma ke fwil in tulik natul Perez, ac el pa sifen mwet kol lun mwet mweun nukewa nu ke malem se meet.
4 Dodai, sie mwet in fwil natul Ahohi, pa karingin u se ke malem akluo. Oasr pac mwet longoul akosr tausin in u sac. Mikloth pa akluo yal ke u se inge.
5 Benaiah, wen natul Jehoiada mwet tol, pa karingin u se ke malem aktolu. Oasr mwet longoul akosr tausin in u sac.
6 Mwet se inge Benaiah pa tuh kol u se pangpang “Mwet Tolngoul.” Ammizabad wen natul, pa aolul in kol u se inge.
7 Asahel wial Joab pa karingin u se ke malem akakosr. Zebadiah, wen natul, pa kol tokol. Oasr mwet longoul akosr tausin in u sac.
8 Shamhuth, sie mwet in fwil natul Izhar, pa karingin u se ke malem aklimekosr. Oasr mwet longoul akosr tausin in u sac.
9 Ira, wen natul Ikkesh mwet Tekoa, pa karingin u se ke malem akonkosr. Oasr mwet longoul akosr tausin in u sac.
10 Helez, mwet Pelon ke sruf lal Ephraim, pa karingin u se ke malem akitkosr. Oasr mwet longoul akosr tausin in u sac.
11 Sibbecai, mwet Hushah, pa karingin u se ke malem akoalkosr. El sie mwet in sou lal Zerah ke sruf lal Judah. Oasr mwet longoul akosr tausin in u sac.
12 Abiezer pa karingin u se ke malem akeu. El sie mwet Anathoth in acn lun sruf lal Benjamin. Oasr mwet longoul akosr tausin in u sac.
13 Maharai, mwet Netophah, pa karingin u se ke malem aksingoul. El sie mwet in sou lal Zerah. Oasr mwet longoul akosr tausin in u sac.
14 Benaiah pa karingin u se ke malem aksingoul sie. El mwet Pirathon in acn lun sruf lal Ephraim. Oasr mwet longoul akosr tausin in u sac.
15 Heldai, mwet Netophath, pa karingin u se ke malem aksingoul luo. El pa sie mwet in fwil natul Othniel. Oasr mwet longoul akosr tausin in u sac.
Karinginyen Sruf Lun Israel
16 Pa inge mwet kol fin kais sie sruf lun Israel:
Pa ingan mwet kol fin sruf lun Israel.
23 Tokosra David el tia oakla pisen mwet ma fusr liki yac longoul, mweyen LEUM GOD El tuh wulela mu El ac fah oru tuh mwet Israel in pus oana itu in kusrao.*
24 Joab, su nina kial pa Zeruiah, el mutawauk in simis pisen mwet uh, tusruktu el tiana aksafyela. God El akkeokye mwet Israel ke sripen oaoa se inge. Ke ma inge, pisa lulap ke oaoa se inge tuh tiana simla ke book in sramsram lal Tokosra David.*
Mwet Karingin Mwe Kasrup Lun Tokosra
25 Pa inge mwet kol su karingin ma nukewa lun tokosra:
Iwen fil ma saok lun tokosra: Azmaveth wen natul Adiel
Iwen fil ma nukewa saya ma oan in siti lulap ac siti srisrik ac tower: Jonathan wen natul Uzziah
26 Mwet orekma ke imae: Ezri wen natul Chelub
27 Mwet orekma ke grape: Shimei, sie mwet Ramah
Nien fil wain: Zabdi, mwet Shepham
28 Sak olive ac sak sycamore pe eol Shephelah: Baal Hanan, mwet Geder
Nien fil oil in olive: Joash
29 Cow ke acn tupasrpasr Sharon: Shitrai, mwet Sharon
Cow ke infahlfal uh: Shaphat, wen natul Adlai
30 Un camel: Obil, mwet Ishmael
Un donkey: Jehdeiah, mwet Meronoth
Un sheep ac nani: Jaziz, mwet Hagar
31 Mwet inge nukewa elos mwet karingin ma nukewa lal Tokosra David.
Mwet Pwapa Fulat Lal David
32 Jonathan, tamulel lun papa tumal Tokosra David, el sie mwet yohk etu la ac pah in sang kas in kasru. El, ac Jehiel wen natul Hachmoni, pa luti wen natul tokosra.
33 Ahithophel el mwet pwapa lal tokosra, ac Hushai mwet Arch el kawuk se lal tokosra, ac el mwet pwapa se pac lal.
34 Tukun Ahithophel el misa, na Abiathar ac Jehoiada wen natul Benaiah eltal aolulla in mwet pwapa fulat lun tokosra. Joab pa captain lun un mwet mweun lun tokosra.
| Sruf | Mwet Kol |
|---|---|
| Reuben | Eliezer wen natul Zichri |
| Simeon | Shephatiah wen natul Maacah |
| 17 Levi | Hashabiah wen natul Kemuel |
| Aaron | Zadok |
| 18 Judah | Elihu, su sie sin tamulel lal David |
| Issachar | Omri wen natul Michael |
| 19 Zebulun | Ishmaiah wen natul Obadiah |
| Naphtali | Jerimoth wen natul Azriel |
| 20 Ephraim | Hoshea wen natul Azaziah |
| Tafun Manasseh | Joel wen natul |
| Roto | Pedaiah |
| 21 Tafun Manasseh | Iddo wen natul |
| Kutulap | Zechariah |
| Benjamin | Jaasiel wen natul Abner |
| 22 Dan | Azarel wen natul Jeroham |
