Jacob el etuh lah el enenuh in alu nuh sin Jeova muhkwena, finne soenna oasr masap Lal in tiac alu nuhke ma sruhloaclah. (Exo. 20:3-5) Pwacnacng, tukun Jeova el fahk nuh sel in fohlohklac nuh Bethel, Jacob el kwacfe mwet nuhkewa suc weluhl in sislah ma sruhloaclah lalos. Na, Jacob el sislah ma sruhloaclah nuhkewa, wekuhnacng yacring ma sahp orekmakihnyuck in oacna mwe lihllihl inut. (Gen. 35:1-4) Wacngihn ahlohloh kac lah, Jeova el insewowo ke orekma lal Jacob inge.

Ke pacl lasr inge, kuht kuh in alu nuh sin Jeova muhkwena fuhkah? Sie ma ma arlacna yohk srihpac kuht in oruh pa, in fahsr liki kuhtwena ma ma ac kuhpahsr nuhke ma sruhloaclah kuh inutnut. Weacng nuhke ma inge pa, in sislah kuhtwena ma ma ac kuhpahsr nuhke orekma luhn inutnut ac tuni ahkwoyac mwe ahkengan lasr uh. Ke sie mwe puhpuhlyuck, siyuck sum sifacna: ‘Yac nga engan in rit ac liye puk kuh movie ma ahkkahlwemye kain in ma, oacna vampires, zombies, kuh ma ma ac kuhpahsr nuh sin dimon uh? Yac oasr mwe ahkengan luhk ma ahkkahlwemye muh magic, inpucl kuh selngawi, oacna in mwe na pwacr?’ Kuht enenuh in fahsr liki kuhtwena ma ma Jeova el sruhnga.​—Psa. 97:10.

LIYE MWE LUHMAHLAH MA OASR KE VIDEO SE INGE “OPPOSE THE DEVIL,” AC TOHKOHYANG TOHPOHKLAH KIHSEN SIYUCK EKAHSR TEN INGE:

• Ma upac fuhkah sikyak ke moul lal Palesa, suc sie mwet lutlut Bible?

• Efuh kuh sie inkacnek lahlmwetmwet in suk kahsruh sin mwet elder fin kom, kuh sie mwet suc kom etuh kuh lutlut nuh se uh, oasr ma upac ke orekma luhn inutnut?

• Kuht fin luhngse in eis mwe karihngihn luhn Jeova, ma fuhkah kuht enenuh in sislah?

• Sulaclah na wo fuhkah Palesa el oraclah?

• Ke acn ma kom muhta we uh, meac kuhtuh inkacnek kom kuh in fahsr liki mwe ahkkuluk luhn demon?