Muhtwacwacack in January 2018, kahs in kahsruh nuhke mwe sramsram oasr ke kolo ke Moul in Christian ac Orekma in Luti Lasr uh​—Oakwuck Ke Toeni Inge. Kuht kuh in orekmakihn fuhkah ma inge?

Ke Pacl Ma Kom Oruh Kunohkohn Lom An: Kom enenuh in orekmakihn kihsen siyuck, ma suhmuhslah, ac ma nuhke muhtwacta se tok uh ma oasr ke kahs in kahsruh nuhke mwe sramsram. Tuhsruhktuh, ma inge tiac kalmackihn lah kom ac fah etahi na kahs nuhkewa ma orekmakihnyuck ke video ke kahs in kahsruh nuhke mwe sramsram. Kom kuh in orekmakihn mwe luhmah sahyac, kahs in muhtwacwacack sahyac, kihsen siyuck ac mwe ahkuhtweyac wo sahyac, ac kuhtuh pac ma sahyac. Kom kuh pac in kihtaclah mwe rit ma kuht kwacna orekmakihn ke orekma in luti lasr uh, finne ma inge tiacna ahkkahlwemyeyuck ke kahs in kolyuck ke mwe sramsram sacn.

Ke Pacl Kom Oasr ke Orekma in Luti: Kahs in kahsruh nuhke mwe sramsram uh oreklac in sang kahsruh. Fin sie mwet el ahkkahlwemye lah el pwacr in lohng ac luhngse in etuh kuhtuh pac ma, kom kuh in tahfwelah in sramsram nuh sel, sahp ke kom orekmakihn mwe lutlut ma nuhke sifwil fohlohk. Kom kuh in ikihl kahs in kahsruh nuhke mwe sramsram kuh kom orekmakihn mwe sramsram sahyac. Yac mwe sramsram ke mahlwem tari ah kuh ma suhmuhslah sahyac wo in orekmakihnyuck nuhke territory? Yac mwet ke acn sum uh luhngse in lohng news ma tuhfahna sikyak? Kom kuh in orekmakihn kahs in kahsruh nuhke mwe sramsram inge ke inkacnek pucspucs. Tuhsruhktuh, finsrak lom pa in “oruh ma nuhkewa ke srihpen pweng wo, tuh in fahkwack ma inge nuh sin mwet sahyac.”​—1Cor. 9:22, 23.