Ke pacl na sa mongfihsracsr luhn Jeova nuh sin mwet kuluk inge ac fah sahflah. Alu kikiacp uh ac fah kuhnahosyucklac, u luhn muhtuhnfacluh ac fah srihke in kuhnahoslah mwet luhn God, ac Jeova el ac fah kuhnahoslah mwet kuluk ke Armageddon. Mwet Christian uh tuhpan ma yohk srihpac ma ac sikyak inge.

Pwacye lah, kuht tiac etuh ma nuhkewa ma ac sikyak ke ongaiyac luhlahp. Ke sie mwe puhpuhlyuck, kuht nihkihn lah ngac ma inge ac fah muhtwacwacack. Kuht tiac etuh lah srihpac fuhkah mwet kol luhn muhtuhnfacluh inge ac fah orekmakihn in kuhnahoslah alu nuhkewa uh. Kuht nihkihn lah puhtahkah muhtuhnfacluh inge ac fah oruh kalyei upac inge nuh sin mwet luhn Jeova uh. Kuht tiac pac etuh lah meac na pwacye Jeova el ac orekmakihn in kuhnahoslah mwet kuluk ke Armageddon.

Ne ohinge, ma Suhmuhslah uh acse nuh sesr etwacack ma kuht enenuh tuh in oasr puhlaik ac luhlahlfongi lasr ke ma ac fah sikyak ke pacl fahsruh uh. Ke sie mwe puhpuhlyuck, kuht etuh lah kuht moul ke “lwen sahflah.” (2Tim. 3:1) Kuht etuh lah “ahpuyelah tari pisen len uh” ke kuhnanuclac luhn alu uh, tuh alu pwacye ac fah tiac wi kuhnahosyucklac. (Mt. 24:22) Kuht etuh lah Jeova el ac fah molwelah mwet lal uh. (2Pet. 2:9) Ac kuht etuh lah El suc sulohsohllah luhn Jeova in kuhnahoslah mwet kuluk, ac molwelah u luhlahp ke Armageddon, el suwohswohs ac arlacna kuh.—Fwack. 19:11, 15, 16.

Ma ac fah sikyak ke pacl fahsruh uh ac fah oruh mwet uh in “mulalla ke sangeng.” Tuhsruhktuh, in rit ac nuhnkuh yohk ke inkacnek ma Jeova el molwelah mwet lal in pacl meet ah, ac ke ma el ahkkahlwemye ke pacl fahsruh uh, ac kuh in ahkkweye kuht in “tuyak ac keyak” sifacsr mweyen kuht luhlahlfongi lah molwelah lasr apkuhran me.—Lk. 21:26, 28.