Jeova el luhngse kom in etwacl na pwacye. Efuh? Mweyen el finsrakkihn muh ke yohkwelihk etwacack lom ke ohiyac wo lal, inkacnek lal, ac oakwuck lal, ac fah yohkwelihk pac kena lom in eklac mwet kawuck lal. Yac kom kuh in kawuck luhn God na pwacye? (Riti Psalm 25:14.) Meac kom kuh in oruh in eklac mwet kawuck lal uh? Bible uh tohpohklah kihsen siyuck inge, ac oacyacpac ahkkahlwemye lah efuh in kawuck nuh sin Jeova pa fototo se ma yohk srihpac emeet.

1. Meac Jeova el suli kom in oruh?

“Kowos in kaluckyang nuh yurin God, ac El ac fah apkuhranwot nuh yuruwos.” (James 4:8) Meac kalmen ma inge? Jeova el suli kom in eklac mwet kawuck lal. Upac nuh sin kuhtuh mwet uh in luhlahlfongi muh elos kuh in kawuck luhn God mweyen elos tiac kuh in liyacl. Tuhsruhktuh, Bible uh ahkkahlwemye ma nuhkewa kuht enenuh in etuh kacl Jeova tuh kuht in kuh in fototoyang nuh sel. Ke kuht riti kahs lal ma oasr in Bible, fototo lasr nuh sin Jeova uh ac fah wo liki na meet ah finne kuht tiac kuh in liyacl.

2. Efuh kuh Jeova pa Kawuck wo emeet kom kuh in konwacack?

Jeova el luhngse kom yohk liki na luhngse luhn mwet sahyac uh. El luhngse kom in engan. Ac el luhngse kom in kaluckyang nuh yohrohl pacl nuhkewa kom enenuh kahsruh. Kom kuh in ‘sang mwe fosrngah lom nuhkewa nuh sel, mweyen El nuhnkuh keim.’ (1 Peter 5:7) Jeova el ahkolah in kahsruh, ahkkweye, ac lohng kawuck lal pacl nuhkewa.​—Riti Psalm 94:18, 19.

3. Meac Jeova el luhngse nuh sin kawuck lal uh in oruh?

Jeova el luhngse mwet nuhkewa, “tuhsruhktuh El kawuck fototo nuh sin mwet suwohswohs.” (Soakas 3:32, NW) Jeova el engan ke mwet kawuck lal uh oruh ma el luhngse, ac fahsr liki ma el sruhnga. Kuhtuh mwet uh nuhnkuh muh elos tiac kuh in ahkos ma nuhkewa ma Jeova el luhngse. Tuhsruhktuh, Jeova el pahkotwen. El luhngse in eklac kawuck luhn mwet nuhkewa suc luhngse el na pwacye ac ahkinsewowoyacl ke kuhiyacltahl kewa.​—Psalm 147:11; Orekma 10:34, 35.

 AHKYOHKYE LUTLUT LOM

4. Abraham el kawuck luhn Jeova

Mwe sramsram kacl Abraham in Bible (pahngpahng pac Abram) kahsre kuht in etuh lah meac kalmac in kawuck luhn God. Riti Genesis 12:1-4. Tohkohyang, sramsramkihn kihsen siyuck inge:

• Meac Jeova el fahk nuh sel Abraham elan oruh?

• Meac Jeova el wuhlelah nuh sel?

• Meac Abraham el oruh?

5. Meac Jeova el luhngse sin kawuck lal uh

Inkaiyen pacl uh oasr ma kuht luhngse sin mwet kawuck lasr uh in oruh.

• Meac kuhtuh ma ma kom luhngse kawuck lom uh in oruh nuh sum?

Riti 1 John 5:3, ac tohkohyang sramsramkihn kihsen siyuck se inge:

• Meac Jeova el luhngse sin mwet kawuck lal uh in oruh?

In ahkos Jeova, sahp kuht enenuh in ekuhllah orekma lasr ac ohiyacsr. Riti Isaiah 48:17, 18, ac tohkohyang sramsramkihn kihsen siyuck se inge:

• Efuh kuh Jeova el luhngse kawuck lal uh in ekuhllah ohiyen moul lalos?

 6. Meac Jeova el oruh in kahsruh kawuck lal uh

 MA KUHT LOTWELAH

Jeova el luhngse kom in Kawuck lal, ac el ac fah kahsre kom in fototoyang nuh sel.

Kalweni

• Jeova el kahsruh fuhkah mwet kawuck lal uh?

• Efuh kuh Jeova el luhngse mwet kawuck lal in ahksuwohsye moul lalos uh?

• Kom nuhnkuh muh upac in oruh ma Jeova el luhngse mwet kawuck lal in oruh? Efuh kom tohpohklah ohingacn?