MWE LUTLUT 28
Ahksacohkye Ma Jeova ac Jesus Oraclah Nuh Sum
Meac kom puhla ke pacl se ma mwet kawuck se lom el usot sie mwe sang ma arlac wo? Pwacye lah, kom arlac engan kac, ac kom luhngse in ahkkahlwemye nuh sin kawuck se lom ingacn lah kom ahksacohkye mwe sang sacn. Jeova ac Jesus acse nuh sesr mwe sang ma yohk srihpac emeet. Meac mwe sang se inge? Ac kuht ac ahkkahlwemye fuhkah lah kuht ahksacohkye ma inge?
1. Kuht ac ahksacohkye fuhkah ma God ac Jesus oraclah nuh sesr?
Bible uh wuhlelah lah ‘elos nuhkewa suc luhlahlfongi in Jesus,’ elos kuh in moul ma pahtpaht. (John 3:16) Meac kalmacn in luhlahlfongi? Sahyen in luhlahlfongi nuh sel Jesus, kuht enenuh pac in ahkkahlwemye luhlahlfongi lasr ke sulaclah lasr ac ke ma kuht oruh. (James 2:17) Ke kuht ahkkahlwemye luhlahlfongi lasr ke ma kuht oruh ac fahk, ohiyen kawuck lasr nuh sel Jesus ac nuh sin Jeova Pahpah tuhmwacl, ahkkweyeyuck.—Riti John 14:21.
2. Mwe ahkfuhlwact na yohk srihpac fuhkah kahsre kuht in ahkkahlwemye srui lasr nuhke ma Jeova ac Jesus oraclah?
Ke fong se meet liki Jesus el misac, el fahk nuh sin mwet tuhma lutlut lal sie pac inkacnek sahyac in ahkkahlwemye srui lalos nuhke mwe kihsac lal uh. El sapkihn nuh selos in tuhkweni nuh sie in oruh sie mwe ahkfuhlwact ma Bible uh pahngon “Mongo in Ekuh luhn Leum,” ac etweyuck pac oacna Memorial ke misac luhn Christ. (1 Corinth 11:20) Jesus el luhngse mwet sap lal uh, ac mwet Christian pwacye nuhkewa in esamyac lah el sang moul lal kacsr. Ke mwe ahkfuhlwact se inge, Jesus el sapkihn: “Oruh ma inge in esamyuc.” (Luke 22:19) Ke kom wi ke Memorial, kom ahkkahlwemye lah kom srui luhngse yohk luhn Jeova ac Jesus nuh sesr.
AHKYOHKYE LUTLUT LOM
Liye kuhtuh pac inkacnek sahyac in ahkkahlwemye srui lasr nuhke luhngse yohk ma Jeova ac Jesus ahkkahlwemye. Lotwelah ke yohk srihpaciyen Memorial ke misac luhn Christ.
3. Ahkkahlwemye srui lasr
Srihke luhmahlah ke nuhnak lom an muh kom ac walomlah, ac mwet se molikomlac. Yac kom ac muhlkuhnlah kahsruh ma mwet se ingacn oruh nuh sum ac? Kuh kom ac sukok inkacnek in ahkkahlwemye nuh sel lah kom ahksacohkye ma el oruh nuh sum ac?
Kuht soemoul nuh sin Jeova. Riti 1 John 4:8-10, ac tohkohyang sramsramkihn kihsen siyuck inge:
-
Efuh kuh mwe kihsac lal Jesus sie mwe sang na yohk srihpac?
-
Meac kom puhla ke ma Jeova ac Jesus oraclah nuh sum?
Kuht kuh in ahkkahlwemye fuhkah srui lasr nuhke ma Jeova ac Jesus oraclah kacsr? Riti 2 Corinth 5:15 ac 1 John 4:11; 5:3. Tohkohyang sramsramkihn kihsen siyuck se inge:
-
In fal nuhke ma suhmuhslah inge, meac kuht kuh in oruh in ahkkahlwemye srui lasr?
4. Etahel Jesus
Sie pac inkacnek in ahkkahlwemye srui lasr pa in etahel Jesus. Riti 1 Peter 2:21, ac tohkohyang sramsramkihn kihsen siyuck se inge:
-
Ke inkacnek fuhkah kom kuh in fahsr in falkacl Jesus, kuh mwe srihkasrak lal?
Jesus el luhngse Kahs luhn God, fahkwack pweng wo, ac kahsruh mwet sahyac uh
5. Wi ke Memorial ke misac luhn Christ
In etuh ke ma sikyak ke pacl se meet ma mwe ahkfuhlwact ke Mongo in Ekuh luhn Leum orek, riti Luke 22:14, 19, 20. Tohkohyang sramsramkihn kihsen siyuck inge:
-
Meac orek ke Mongo in Ekuh luhn Leum?
-
Bread ac wain luhmahlah nuhke meac?—Liye fuhs 19 ac 20.
Jesus el luhngse mwet tuhma lutlut lal in esamyac Mongo in Ekuh luhn Leum pacl se ke yac se, ke lwen in misac lal. Ke ma inge, Mwet Loh luhn Jeova uh tuhkweni nuh sie in esamyac misac luhn Christ oacna ma el sapkihn uh. In lotwelah kuhtuh pac ma in etweyuck ke toeni se inge, liye VIDEO se. Tohkohyang sramsramkihn kihsen siyuck se inge.
-
Meac orek ke pacl in Memorial?
Bread ac wain uh mwe luhmahlah muhkwena in petsacelah ma se. Bread luhmweyuck nuhke mahno suwohswohs lal Jesus ma el kihsackuhnlah kacsr. Wain uh luhmweyuck nuhke srahl
KUHTUH MWET UH FAHK: “Kom enenuh na in luhlahlfongi kacl Jesus tuh kom in moliyucklac.”
-
Kom ac orekmakihn fuhkah John 3:16 ac James 2:17 in ahkkahlwemye lah oasr ma yohk srihpac sahyac elos enenuh in oruh?
MA KUHT LOTWELAH
Kuht ahkkahlwemye lah kuht srui ma Jesus el oraclah kacsr kuht fin luhlahlfongi nuh sel ac wi ke Memorial ke misac lal.
Kalweni
-
Meac kalmac in luhlahlfongi kacl Jesus?
-
Kom ac ahkkahlwemye fuhkah lah kom srui ma Jeova ac Jesus oraclah nuh sum?
-
Efuh kuh yohk srihpac in wi ke Memorial ke misac luhn Christ?
LIYE PAC MA INGE
Ke srihpen misac luhn Christ, meac kuht luhngse in oruh?
Meac se inge luhlahlfongi ac kuht ac ahkkahlwemye ma inge fuhkah?
“Exercise Your Faith in Jehovah’s Promises” (The Watchtower, October 2016)
Ke mwe sramsram se inge “I Feel Clean, Alive, and Whole,” liye lah moul luhn sie muhtwacn eklac fuhkah ke el lotwelah lah Christ el kihsackihn moul lal.
Lotwelah lah efuh kuh suhpuhs mwet suc wi kang bread ac nihm wain ke pacl in Memorial.
