MWE LUTLUT 39
Nuhnak luhn God ke Srah
Srah uh arlacna yohk srihpac. Fin wacngihn srah, kuht nuhkewa tiac kuh in moul. God suc Orekuhtlac, el muhkwena pa oasr suwohs lal in fahk lah kuht ac orekmakihn fuhkah srah uh. Meac el fahk ke srah? Yac kuht kuh in kang srah, kuh ituckyang nuhke mahnosr? Ac kom ac oruh fuhkah sulaclah wo nuh kac uh?
1. Meac nuhnak luhn Jeova ke srah?
Jeova el fahk nuh sin mwet suc alu nuh sel in pacl luhn Bible: “Moul luhn ma moul nuhkewa oasr ke srah kaclos.” (Leviticus 17:14) Nuh sin Jeova, srah uh luhmweyuck nuhke moul. Moul uh ma God el acse nuh sesr arlacna muhtahl. Ke ma inge, arlacna sacohk pac srah uh.
2. Meac God el fahk ke srah?
Meet liki congregation luhn mwet Christian oakiyucki, Jeova el sapkihn nuh sin mwet suc alu nuh sel in tiac kang srah. (Riti Genesis 9:4 ac Leviticus 17:10.) El kalweni masap se inge tukun congregation luhn mwet Christian oakiyucki tari. Governing Body in pacl sacn sapkihn nuh sin mwet Christian in fahsr liki ac “karihnganuhlosyang liki srah.”—Riti Orekma 15:28, 29, NW.
Meac kalmac in karihngihnkuhtyang liki srah? Fin taktuh se lom fahk nuh sum in karihngihnkomyang liki mwe sruhi, pwacye lah kom ac tiac sulpac nihm. Tuhsruhktuh, yac kalmen ma inge pa kom kuh in kang mongo ma oasr wain kac kuh kom eis nuhke ahlko ke monum? Pwacye lah kom ac tiac. Ke inkacnek ohinge, masap luhn God in liyekuhtyang liki srah uh kalmackihn muh kuht ac tiac nihm srah kuh kang ikoac ma srah srackna oasr kac. Kuht ac tiac pac kang mongo ma srah uh toeni nuh kac.
Na fuhkah nuhke srah ma orekmakihnyuck nuhke ono? Oasr kuhtuh inkacnek in ono ma lain masap luhn God. Wekuhnacng in ituck ip ahkosr ma yohk ke srah uh—red cells, white cells, platelets, ac plasma. Tuhsruhktuh, oasr kuhtuh inkacnek in ono ma tiac ahkkahlwemyeyuck in Bible muh kuhnahoslah masap luhn God kuh tiac. Ke sie mwe puhpuhlyuck, oasr kuhtuh oakwuck in ono ma orekmakihn blood fractions kuh ip srihsrihk ke srah. Oasr kuhtuh pac inkacnek sahyac ma orekmakihn srahn mwet sifacna. Ke oakwuck in ono inge, kais sie mwet el enenuh in oruh sulaclah la sifacna. a—Galatia 6:5.
AHKYOHKYE LUTLUT LOM
Liye lah kom kuh in oruh fuhkah sulaclah ke oakwuck luhn ono ma kuhpahsr nuhke srah.
3. Oruh sulaclah ke oakwuck in ono ma ahkinsewowoye Jeova
Kom ac oruh fuhkah sulaclah ke oakwuck in ono ma fal nuhke nuhnak luhn God? Liye VIDEO se, ac tohkohyang sramsramkihn lah efuh kuh yohk srihpac in ukwe step inge.
-
Puhruhe siyuck ke lahlmwetmwet.—James 1:5.
-
Research ke oakwuck wo luhn Bible ac nuhnkuh lah ac orekmakihnyuck ma inge fuhkah.—Soakas 13:16.
-
Konwacack lah inkacnek in ono fuhkah oasr ke acn sum ma kom kuh in sulaclah.
-
Konwacack lah inkacnek in ono fuhkah kom ac tiac eis.
-
Kom in etuh na pwacye lah sulaclah lom ac fah oruh in nwacsnwacs nuhnak ac puhlakihn lom.—Orekma 24:16. b
-
Esam lah ke sulaclah ma enenuh in orekmakihn nuhnak ac puhlakihn, wacngihn mwet sahyac ac fah oruh sulaclah lom sifacna—finne muhtwacn kiyom kuh mukul tomom, mwet elder se, kuh mwet se suc luti kom ke Bible.—Rome 14:12.
-
Suhmuhslah sulaclah ma kom ac oruh.
4. Oakwuck luhn ono ma wo emeet pa Mwet Loh luhn Jeova uh luhngse
Kuht kuh in ahkos masap luhn God ke srah ac ke pacl sacnpacna kuht kuh in eis oakwuck luhn ono ma wo emeet ma wacngihn srah kac. Liye VIDEO se.
Riti Titus 3:2, ac tohkohyang sramsramkihn kihsen siyuck se inge:
-
Efuh kuht enenuh in ahkkahlwemye ohiyac wo ac suhnak ke kuht sramsram nuh sin taktuh?
|
Tiac kuh in eis |
Mwet sifacna sulaclah |
|---|---|
|
A. Blood plasma. |
Ip na srihsrihk ma tuhkuh ke plasma |
|
B. White cells. |
Ip na srihsrihk ma tuhkuh ke white cells |
|
C. Platelets. |
Ip na srihsrihk ma tuhkuh ke platelets |
|
D. Red cells. |
Ip na srihsrihk ma tuhkuh ke red cells |
5. Blood fractions ac oakwuck luhn ono
Oasr ip yohk ahkosr ke srah uh—pa inge red cells, white cells, platelets, ac plasma. Ke kais sie ip yohk inge oasr ip na srihsrihk kac, pahngpahng blood fractions. c Kuhtuh ip srihsrihk inge orekmakihnyuck oacna ono in unwelah mas, kuh in kahsruh in tulokihnyucki srah in tiac sohrohr.
Ke ip srihsrihk pucspucs ke srah uh, kais sie mwet Christian enenuh in oruh sulaclah la sifacna ma ac fal nuhke nuhnak ac puhlakihn lal ma ahkpahyeyuck ke oakwuck wo luhn Bible. Sahp, kuhtuh selos ac tiac eis oakwuck in ono ma ac orekmakihn blood fractions. Nuhnak ac puhlakihn luhn kuhtuh mwet Christian sahp ac lwelah elos in sulaclah in eis ip srihsrihk ke srah uh.
Meet liki kom oruh sulaclah, nuhnkuh ke kihsen siyuck se inge:
-
Nga ac ahkuhtweyac fuhkah nuh sin sie taktuh srihpac pwacnacng nga ac eis kuh tiac eis sie oakwuck luhn ono ma ac orekmakihn ip srihsrihk ke srah uh?
FIN OASR MWET SIYUCK: “Meac koluk ke ituck srah uh?”
-
Kom ac tohpohklah fuhkah?
MA KUHT LOTWELAH
Jeova el luhngse kuht in ahksacohkye srah uh oacna ma muhtahl.
Kalweni
-
Efuh kuh Jeova el nuhnkuh ke srah uh oacna ma muhtahl?
-
Kuht etuh fuhkah lah in ituck srah weacng pac nuhke masap luhn God in liyekuhtyang liki srah uh?
-
Kom ac oruh fuhkah sulaclah wo ke oakwuck luhn ono ma orekmakihn srah uh?
LIYE PAC MA INGE
Meac kom enenuh in nuhnkuh meet liki kom oruh sulaclah kom fin ac eis oakwuck luhn ono ma ac orekmakihn srah lom sifacna?
Meac kom enenuh in nuhnkuh ke pacl ma kom ac oruh sulaclah lom kom fin ac eis ip na srihsrihk ke srah?
Meac oruh sie taktuh in luhlahlfongi lah nuhnak luhn Jeova ke srah uh arlacna suwohs?
Liye lah fuhkah mwet elder suc wi ke Hospital Liaison Committees kahsruh mwet lili uh.
a Liye Mwe lutlut ahk 35, “Kuht Ac Oruh Fuhkah Sulaclah Wo.”
b Liye point ahk 5, “Blood Fractions ac Oakwuck luhn Ono,” ac Kuhtuh Pac Mwe Ahkuhtweyac 3, “Oakwuck Ke Ono In Orekmakihn Srah.”
c Nuh sin kuhtuh taktuh ip ahkosr ma yohk ke srah ac blood fractions oacna sie. Ke ma inge, kom enenuh in ahkuhtweyac sulaclah lom lah kom ac tiac lwelah red cells, white cells, platelets, or plasma in ituck nuhke monum.
