Nuhnkuh ke mwe luhmahlah se inge: Ke pacl se Tim el wi kawuck lal uh sritacl, el tohllah pohl se te fukulyac kuhlahs se meet ke sitosah soko okwacn mwet tuhlan lal ah.

Fin kom pa Tim, meac kom ac oruh?

OASR SULACLAH TOLU LOM:

1. Kahinglac.

2. Sis ma kuluk sacn nuh sin sie pacna mwet sahyac.

3. Fahk nuh sin mwet tuhlan se lom an ke ma sikyak ingacn, ac srihke in ahkfalyelah ma muhsahllah an.

Kom ac kuh in srihfeyuck in sulaclah ma se meet an. Tuhsruhktuh, oasr srihpac wowo ke pacl nuhkewa in fahkwack ke ma tahfonglac lom an ke winto sacn, kuh kuhtwena ma sahyac.

1. Pa inge ma suwohs in oruh.

   Bible uh fahk: “Kuht kena tuh orekma lasr in suwohs pacl nuhkewa.”—Hebrew 13:18.

2. Mwet uh kwacna nuhnak muhnahs nuh sin mwet suc fahkwack ke ma tahfonglac laltahl uh.

   Bible uh fahk: “Kom fin okanlah ma kuluk lom, kom tiac kuh in kapkapwack. Kom fin fahkwack ma kuluk lom ac forlah liki, na God El ac fah pahkotwen nuh sum.”—Soakas 28:13.

3. Yohk liki nuhkewa, ma inge ahkinsewowoye God.

   Bible uh fahk: “Leum God El sruhnga mwet orekma kuluk, a El insracelak nuh sin mwet suwohswohs.”—Soakas 3:32.

Karina, suc matwacl oasr ke yac 20, el srihke elan okanlah citation se lal tuh pahpah tuhmwacl ah in tiac etuh lah el kahsruhsr muhilac. Tuhsruhktuh, el tiac kuh in okanlah nwe tok. Karina el fahk: “Ke yac se tohkoh ah, pahpah tuhmuhk ah konwacack citation sac sihmlac inek kac. Nga sun ma na upac ke ma se inge!”

Meac kuht lotwelah kac? Karina el fahk: “Kom fin okanlah ma kuluk uh, ma inge ac oruh in upaclah liki na meet ah. Kom ac srackna eis kaiyuck kac!”

Bible uh fahk: “Kuht nuhkewa tahfonglac pacl pucspucs.” (James 3:2) Ac in oacna ke ma kuht liye uh, ma inge akucl se nuhke inse puhsisacl ac mahtuh in nuhnak in fahkwack ke ma tahfonglac lom an, ac in oruh ke pacl na sa.

Tukun ma inge, lotwelah ke ma tahfonglac lom an. Tuhlihk muhtwacn se suc pahngpahng Vera el fahk: “Ke nga oruh ma tahfonglac, nga srihke in liye lah meac nga kuh in lotwelah kac tuh ngan kuh in eklac sie mwet wo ac in etuh lah meac nga ac oruh nga fin sulpac sun kain in ohiyac inge tok.” Lwelah kuht in liye lah kom ac oruh fuhkah ma inge.

Kom ngihsraclah pwacskuhl soko nuhtin pahpah tomom an ac orekmakihn nwe muhsahllah. Meac kom ac oruh tohkoh?

• Tiac fahk kuhtwena ma ac finsrakkihn muh pahpah tomom an in tiac liye.

• Fahk nuh sin pahpah tomom an ke ma sikyak na pwacye an.

• Fahk nuh sin pahpah tomom an ke ma sikyak an, tuhsruhktuh kom sis ma kuluk sacn nuh sin sie pac na mwet sahyac.

Kom tiac na pahselah test se ke srihpen kom tiac na ahkolah in wo nuh kac. Meac kom ac oruh tohkoh?

• Fahk muh arlac upac kihsen siyuck kac an.

• Akihlen lah ma lom pa kuluk an pwacnacng tiac na wo teng lom an.

• Fahk muh oasr ma mwet luti se ingacn sruhnga sum.

 Sifwilpac nuhnkuh ke ma sikyak ingacn, ac srihke in petsacelah lah kom pa (1) pahpah tomom an, ac (2) mwet luti lom an. Meac pahpah tomom an ac mwet luti lom an ac nuhnkuh keim kom fin sa na in fahkwack ke ma tahfonglac lom an? Meac eltahl ac nuhnkuh keim kom fin okanlah ma tahfonglac lom an?

Ingena nuhnkuh ke ma tahfonglac lom ke yac tari ac, na kom tohpohklah kihsen siyuck ten inge.

Meac ma tahfonglac se ingacn? Meac kom oruh nuh kac?

• Nga okanlah.

• Nga sis ma kuluk sacn nuh sin sie mwet sahyac.

• Nga fahk lah nga pa oruh ah.

Kom fin tiac fahkwack ke ma tahfonglac lom ingacn, meac puhlakihn lom tohkoh?

• Arlac wo, wacngihn ma upac orek nuh sihk!

• Tiac wo ma nga puhla uh, nga enenuh in fahkwack ke ma pwacye uh.

Ohiyac fuhkah kom ac oruh ke ma sikyak inge?

Meac kom lotwelah ke ma tahfonglac lom uh?

Efuh kuh kuhtuh mwet uh tiac akihlen ma tahfonglac laltahl uh?

Meac mwet uh ac nuhnkuh keim kom fin srihke in okanlah ma tahfonglac lom uh ke pacl nuhkewa, tuhsruhktuh meac eltahl ac nuhnkuh keim kom fin fahkwack ke ma tahfonglac lom uh?—Luke 16:10.