Mukul se ma luhngse in ahkkulukyacl Annette inge kihpackihnilyac nuh infohk ah. El fahk: “Nga wowoyak, tuhsruhktuh wacngihn puhsra som liki oaclihk. Nga sinuckuhnuhl, fohtohngohl, fuhskwel ac kuhlausuhl. Tuhsruhktuh, ke el sang mitmit sac fakihsyucwi ac, nga sa na in muhnahslah.”

Meac kom ac oruh fin sikyak nuh sum ohiyac se inge?

Kom finne ahkolah, sahp kom arlac lohacng ac taran ke kom fahsr ke inkacnek uh ke fong, tuhsruhktuh kom ac kuh pac in sun ma upac. Bible uh fahk: “Mwet muhi uh tiac eis kuhtanglah pacl nuhkewa, . . . mwet ma fahsr ke orekma tiac eis wal fuhlwact pacl nuhkewa. Ma ohnglah ohiyac uh sikyak nuh sin mwet nuhkewa.”—Ecclesiastes 9:11.

Kuhtuh tuhlihk fuhsr suc oacna Annette inge, eltahl ahkkulukyeyuck sin mwet suc eltahl tiac etuh. Kuhtuh sin tuhlihk inge ahkkulukyeyuck sin mwet suc eltahl etuh kuh mwet in sucu laltahl uh. Pa inge ma sikyak nuh sel Natalie suc sie sin tuhlihk fuhsr ma mwet tuhlan se lal ahkkulukyacl ke el yac 10 matwac. El fahk: “Nga arlacna sahngweng ac mwekihn, pwacnacng ke muhtwacwacackiyac ah nga tiacna fahk nuh sin kuhtwena mwet.”

Annette el srackna puhla muh oasr ma kuluk lal ke ma sikyak nuh sel ah. El fahk: “Nga srackna esam fong sac. Nga puhla muh nga enenuh in sang nohfohn kuhiyuck in laenuhl. Ma pwacye uh pa, tukun fakfucki nga ah, nga arulacna sahngwenglah. Wacngihn ma sahyac nga kuh in sifwilpac oruh, tuhsruhktuh nga puhla muh enenuh in oasr ma se nga oraclah ke pacl sac.”

Natalie el puhla muh oasr pac ma kuluk lal ke ma sikyak nuh sel ah. El fahk: “Nga tiac enenuh in luhlahlfongel. Pahpah ac ninac fahk tari nuh sihk lah nga ac tuhlihk muhtwacn se wiyuck ah enenuh in tuhkweni nuh sie ke kuht sritacl lihkihnum ac, tuhsruhktuh nga tiac na porongo ma elos fahk ah. Ke ma inge, nga sang pacl wo nuh sin mwet tuhlan se luhk ah in ahkkulukyeyuclac. Sucu luhk uh arlacna toasr kac ac nga puhla muh oasr mwacta luhk kac. Ma inge oruh ngan arulacna ahsor.”

Kom fin puhla oacpacna Annette kuh Natalie, kom in esam lah sie mwet suc sruhinkuhiyucki el tiac luhngse in wi oruh ma kuluk inge. Kuhtuh mwet uh fahk muh tiac arlac kuluk mweyen mukul uh kwacna oruh ma inge, ac muhtwacn suc ahkkulukyeyucklac inge eltahl luhngse pac ma inge. Tuhsruhktuh, wacngihn mwet luhngse in sruhinkuhiyuck eltahl. Kom fin sie sin mwet suc sruhinkuhiyucki ingacn, tiac enenuh in sisi nuh fwom ma kuluk se ingacn!

Ahok, fihsracsr in fahk “wacngihn mwacta lom,” tuhsruhktuh sahp upac in luhlahlfongiyuck. Kuhtuh muhtwacn uh sruhngaclah in fahk kuhtwena ma kac ac puhla muh eltahl pa kuluk uh ac puhlakihn laltahl uh tiac na wo. Tuhsruhktuh, kom fin tiac fahk kuhtwena ma kac, suc kac ac wo nuh se uh, kom kuh mwet se suc ahkkulukye kom ingacn? Lwelah kom in tiac fuhlweack. Oasr ma kom kuh in oruh.

Bible uh fahk lah ke pacl se upaclah mwe kweok ma sikyak nuh sin mukul suwohs se inge pahngpahng Job, el fahk: “Nga tohtohlah ac sruhngaclah moul. Lohng puhsren tohrkahskahs toasr luhk!” (Job 10:1) Kom kuh pac in eis ma wo kac kom fin oruh oacpacna. Ke kom sramsram nuh sin sie mwet suc kom luhlahlfongi ke ma sikyak an ac kuh in kahsre kom in eis mwe ahkkweye ke ma upac ma kom puhla an.

Annette el konwacack lah pwacye ma ingacn. El fahk: “Nga sramsram nuh sin kawuck fototo se luhk, ac el kwacfeyuc in sramsram nuh sin mwet elder ke congregation luhk ah. Nga engan lah nga oruh ma inge. Eltahl sramsram nuh sihk ke pacl ekahsr ac fahk ma nga enenuh na pwacye in lohng, lah ma sikyak inge tiac kuluk luhk. Wacngihn mwacta luhk ke ma inge.”

Natalie el sramsram nuh sin pahpah ac ninac kiyacl ah ke ma kuluk ma sikyak nuh sel ah. El fahk: “Eltahl kahsreyuc. Eltahl ahkkweyeyuc in sramsramkihn ma sikyak inge, ac kahsreyuc in tiac arlac suhpwacr ac kasrkuhsrak.”

Natalie el oacyacpac eis mwe ahkkweye ke el puhruhe. El fahk: “Ke nga sramsram nuh sin God, ma inge kahsreyuc, yohkna ke pacl ma nga puhla muh nga tiac kuh in fahk ma inge nuh sin mwet sahyac. Ke pacl se nga puhruhe uh, nga sukohsohk in sramsram. Ma inge use inse mislac ac wolac puhlakihn luhk uh.”

Kom oacyacpac kuh in konwacack lah oasr “pacl in ahkkweye.” (Ecclesiastes 3:3) Liyekomyang sifacna ke karihngihnyen monum ac puhlakihn lom an. Eis pacl in monglac. Yohk liki nuhkewa, fihliyac luhlahlfongi lom nuh sin Jeova, God luhn mwe ahkkweye nuhkewa.—Luo Corinth 1:3, 4.

Kom fin sie tuhlihk muhtwacn ac kwacfeyuck kom in oruh ma suhfal, wacngihn ma kuluk kac kom in fahk, “Nikmet oruh ma sacn! kuh “Eislah poum likiyuc! Nikmet sensen muh kom ac tilac wi kawuck mukul se lom ingacn. El fin tui tilac kawuck lom ke na srihpac se ingacn, kom tiac enenuh kain in mukul se ingacn! Kom enenuh sie mukul ma ac suhnakihn kom, ac ahkfuhlwactye pac oakwuck lom sifacna.

“Ke lutlut luhn elementary, oasr tuhlihk mukul ma ac ul fintukun mwe sruh titi luhk uh ac suhfanyuc, fahk muh nga engankihn nga fin weluhltahl oan.”—Coretta.

Yac kom nuhnkuh muh tuhlihk mukul inge

1. Ahksruhksruhkyacl?

2. Orek fucng nuh sel?

3. Orekma kuhpahtol nuh sel?

“Luun bus ah, oasr tuhlihk mukul se fahk kahs na kuluk nuh sihk ac el sruokyucwi. Nga tuhlahkuhnlah pahol ac fahk nuh sel muh elan kihlucklac. El ngwetma liyeyuc oacna in muh wel se pa nga.”—Candice.

Meac kom nuhnkuh muh tuhlihk mukul se inge ac oruh nuh sel Candice?

1. Ahksruhksruhkyacl?

2. Orek fucng nuh sel?

3. Orekma kuhpahtol nuh sel?

“Ke yac tari ac, tuhlihk mukul se inge tahfwelah na in fahk nuh sihk muh el luhngse nga ac el ke nga el in aetuhi finne nga fahk nuh sel muh moh. Kuhtuh pacl uh, el ac ek pouk. Nga fahk nuh sel muh elan tui tiac oruh, tuhsruhktuh el ac tiac tui. Na, ke pacl se nga kapri fahluhk luhk ah, el puokyac kapuk.”—Bethany.

Ke nuhnak lom an, yac tuhlihk mukul se inge el:

1. Ahksruhksruhkyacl?

2. Orek fucng nuh sel?

3. Orekma kuhpahtol nuh sel?

Top pwacye se nuh kac an pa ma se ahktolu an.

Meac ma tiac oacna sie ke orekma kuhpahtol ac orek fucng kuh ahksruhksruhk uh?

Mwet suc orekma kuhpahtol inge pa ac puhla insewowo kac uh, tuhsruhktuh mwe mwekihn se nuh sin mwet suc ma inge orek nuh se uh. Ma inge ac fahfahlac na finne mwet se ma ahkkulukyeyuck ingacn fahk nuh sin mwet se ma oruh ingacn in tui.

Orekma in ahkkulukye mwet uh ma na upac se. Ac kuh in kohllah nuhke orekma kuluk nuhke monin sie mwet.