“Eltahl ma sefannalac.”​—Genesis 2:24

Kuht ac taran fuhkah in tiac ahkngalye mwet se suc kuht pahyuck nuh se uh?

• Matthew 5:28; Ephesus 4:31

  Finne nuhke nuhnak lom an, kom enenuh in oaru nuh sin mwet se suc kom pahyuck nuh se an. Nuhnkuh ke puhlakihn lal an. Kom fin lotwelah tuh oasr mwe ahkngal ma kom oruh nuh sel, kom enenuh in ekuhllah ohiyac lom an.

• Galatia 5:15

  Kuht sruhnga in ahkngalye mukul kuh muhtwacn suc kuht pahyuck nuh se uh ac in tiac ahktoasryacltahl. Kahs upac uh ahkkulukye sie pahyuck.

• Soakas 5:18; Hebrew 13:4

  Jeova el liye orekma in kosro uh oacna sie ma kuluk na upac. Kuht enenuh in sulaclah in sruokyacna oaru ac pwacye lasr nuh sin mwet suc kuht pahyuck nuh se uh ac oruh pahyuck lasr uh in oacna ma sacohk. Kuht ac sruhnga in tiac ahkfuhlwactye Jeova, kuh mwet se suc kuht pahyuck nuh se uh.

“Lohm uh muhsahiyuck fin pwelucng luhn lahlmwetmwet.”​—Soakas 24:3

Meac kom kuh in oruh tuh moul in pahyuck lom an in fokoko ac oasr insewowo kac?

• Soakas 24:4; Matthew 6:14, 15; Rome 12:2; 1 Peter 3:1

  Oraclah pacl in sramsram nuh sin mwet se suc kom pahyuck nuh se an. Ahkkahlwemye ohiyen luhngse, suhnak, ac kuhlwacng nuh sin mukul tomom kuh muhtwacn kiyom an. Lotwelah in sa na in nuhnak muhnahs.

• Soakas 14:1; 31:29; Philippi 1:9; 2:4; 1 Peter 3:7

  Siyuck sin Jeova elan kahsre kom in eklac oacna sie mukul tuhma kuh muhtwacn kiyac wowo. Suk inkacnek in eklac kuhlwacng ac nuhnkuh ke mwet sahyac uh liki na meet ah.

• Rome 12:10; 1 Peter 4:8

  Kom fin sang kuhiyom nohfohn in ahkkahlwemye lah kom ahksacohkye ac suhnakihn mwet se suc kom pahyuck nuh se an, pahyuck lom an ac kuh in fokokoi ac kom ac ahkenganye Jeova.