“Eiskowosyang sifacna nuh sin God. Kowos in lain Devil, ac el ac fah kahingkihn kowos.”​—James 4:7

Kuht etuh fuhkah lah kuht kuh in laenuhl Devil?

• Fwackyuk 7:9, 14

  Jeova el tiac lwelah Devil elan ahkkulukye kuht ke inkacnek nuhkewa. God el wuhlelah lah oasr sie u luhlahp ma ac moullac nuhke facl sasuc uh.

• 2 Chronicle 15:2

  Ke kuht sruokyacna fototo lasr nuh sin Jeova, Satan el tiac kuh in kuhnahoslah fototo lasr nuh Sel uh.

• 1 Corinth 10:13; Hebrew 11:4-40

  Jeova el wuhlelah lah el ac kahsre kuht in sruokyacna oaru lasr, in oacna ke el kahsruh mwet pucspucs in pacl meet ah.

“Kuht etuh ohiyac kuhtasrihk lal.”​—2 Corinth 2:11

Inkacnek kuhtasrihk fuhkah ma Devil el orekmakihn uh?

• John 15:19; Fwackyuk 12:12, 17

  Devil el kihfaslah facluh nohfohn, tuhsruhktuh mwet luhn Jeova uh tiac oan ye kolyuck lal, pwacnacng el luhngse in ahkkulukyaclos.

• Genesis 3:1; Galatia 5:19-21; Ephesus 6:12

  Devil el srihke in konwacack mwe muhnahs lasr uh tuh elan kuh in orekmakihn ma inge in sang ahkkulukye kuht.

• Leviticus 19:26; Isaiah 1:13, 15; Mark 5:25, 26

  Taran ke pacl in sulaclah nuhke kain in inkacnek in ono. Sahp, sie mwet el ke na pwacye in kwelac pwacnacng el ke srihke sie inkacnek in ono ma orekmakihn oakwuck luhn inutnut kuh magic.

• Deuteronomy 18:10-12; Orekma 19:19; Galatia 6:7; Fwackyuk 21:8

  Demon kuh lipufacn kuluk inge fin liye lah, kuht luhngse in etuh ke ma sakihrihk ma sikyak ma kuhpahsr nuhke inutnut, eltahl luhngse in orekmakihn ma ingacn in srihfe kuht. Kuht fin wi oruh orekma luhn inutnut, kuht ac tiac oaru nuh sin Jeova.

“Devil . . . el mwet kikiacp se, ac el pahpah tuhmuhn kikiacp nuhkewa.”​—John 8:44

Kuht ac fahkwelihk fuhkah kikiacp lal Devil uh?

• Rome 1:11, 12; 2 Timothy 2:16

  Mwet uh sruhmuhn mwe sramsram ma oruh Devil ac lipufacn kuluk uh in oacna eltahl in arlac kuh. Kuht ac tiac kalweni na in sruhmuhn mwe sramsram ma ahkfahsryelihk sahngweng, a kuht enenuh in lohacng nuhke mwe sramsram ma kuh in ahkkweye sie sin sie.

• Ephesus 6:11

  Ke kuht etuh ke orekma kuhtasrihk luhn Devil inge, kuht kuh in laenuhl ac sruokyacna fototo lasr nuh sin Jeova.