1-3. (a) Meac puhlakihn luhn mwet pucspucs ke orekma laltahl uh? (b) Kain in nuhnak fuhkah Bible uh ahkkweye ke orekma? Ac kihsen siyuck fuhkah kuht ac fah sramsramkihn ke sapta se inge?

NUH sin mwet pucspucs fin facluh mihsenge, orekma uh sie ma eltahl tiac engankihn. Eltahl sruhnga in som orekma ke kais sie lwen ma eltahl enenuh in orekma upac ke lusen pacl na loeloes in oruh sie ma ma eltahl tiac engan kac. Kain in mwet inge ac ekuhllah fuhkah nuhnak laltahl uh tuh eltahl in luhngse orekma laltahl uh ac in oacyacpac engan kac?

² Bible uh ahkkweye sie nuhnak wo ke orekma upac uh. Ma inge fahk lah orekma lasr ac ma tuhkuh kac uh mwe insewowo. Solomon el suhmuhslah: “Kuht nuhkewa enenuh in mongo ac nihm ac engankihn ma kuht orekma nuh kac. Ma inge mwe kihte luhn God.” (Ecclesiastes 3:13) Jeova el luhngse kuht ac pacl nuhkewa el nuhnkuh ke ma ac wo nuh sesr uh. El luhngse kuht in insewowo ke orekma lasr uh ac in engankihn ma wo ma tuhkuh ke orekma upac lasr uh. In muhtana in luhngse lal uh, kuht enenuh in moul fal nuh ke nuhnak ac oakwuck lal nuh ke orekma uh.​—Riti Ecclesiastes 2:24; 5:18.

³ Ke sapta se inge, kuht ac fah topuk kihsen siyuck ahkosr inge: Kuht ac engankihn fuhkah orekma upac lasr uh? Kain in orekma fuhkah ma tiac fal nuh sin mwet Christian pwacye? Kuht ac oruh fuhkah in wo pacl lasr ke orekma ac  ma pucspucs sahyac ma kuhpahsr nuh ke alu lasr uh? Ac meac orekma yohk srihpac se emeet ma kuht kuh in oruh uh? Meet liki kuht sramsramkihn ma inge, kuht kuh in tuni mwe srihkasrak luhn mwet orekma luo ma wo emeet, Jeova God ac Jesus Christ.

4, 5. Bible uh ahkkahlwemye fuhkah lah Jeova el mwet alken se?

⁴ Jeova pa mwet orekma se ma fuhlwact emeet uh. Genesis 1:1 el fahk: “Ke muhtwacwacack, ke God el oraclah kuhsrao, facluh, ac ma nuhkewa.” Ke God el ahksahfyelah orekma nuhkewa lal ke facluh, el fahk muh sahflahiyac uh “wo.” (Genesis 1:31) Kalmac pa, el arlacna engan ke orekma lal in oraclah facluh. Jeova, “God suc insewowo,” el arlacna engankihn orekma ma fahlac wo uh.​—Sie Timothy 1:11, BMK.

⁵ God na alken se lasr inge el tiac tui ke orekma uh. Pacl loeloes tukun el oraclah facluh ac ma nuhkewa sahyac, Jesus el fahk: “Pahpah tumuk El orekma pacl nuhkewa.” (John 5:17) Meac Pahpah tuhmwacl uh oruh ne ingena uh? Ke acn sel inkuhsrao, el orekma upac in kol ac karihngihn mwet uh. El oraclah pac “mwet sasuc” lal, pa un mwet Christian suc ac fah weluhl Jesus in kol inkuhsrao. (Luo Corinth 5:17) El orekma in ahkpwacyeye oakwuck lal nuh sin mwet uh tuh mwet suc luhngse el inge in moul ma pahtpaht ke sie facl sasuc. (Rome 6:23) Kahlwem lah Jeova el arlacna engan ke sahflahiyen orekma lal uh. Million sin mwet suc luhngse in lohng pweng ke Tohkohsrahi uh eltahl kolyuck sin God ac ekuhllah moul laltahl uh tuh eltahl in muhtana in luhngse lal.​—John 6:44.

6, 7. Jesus el ahkkahlwemye fuhkah lah el sie mwet orekma upac ac el alken?

⁶ Jesus el etweyuck oacna sie mwet orekma upac ke lusen  pacl na loeloes. Meet liki el tuhkuh nuh facluh, el kuhlwacnsap oacna “sie mwet lwemlwem nuh ke muhsah” luhn God ke ma nuhkewa “inkuhsrao ac fin facluh.” (Soakas 8:22-31; Colossae 1:15-17) Ke pacl se ma el tuhkuh nuh facluh, Jesus el tahfwelah ke orekma upac lal uh. Ke el srackna fuhsr, el etwaclah orekma in muhsah ac el etweyuck oacna “mwet kamtuh” se. * (Mark 6:3) Arlacna kwemkahtuh kain in orekma se inge ac enenuh pac in mwet suc suhmaht kac, yohkna ke pacl ma soenna oasr acn in tahtah sahk, stoh ma kuhkwackihn kain in kuhfwen orekma wo, ac kuhfwen mwe orekma ma orekmakihn sahrom. Yac kom kuh in petsacelah ke Jesus el sifacna som pakwelah, oracni ac ollah sahk in muhsah lal inge nuh ke yen ma el ac oruh muhsah lal we uh? Yac kom kuh in petsacelah ke el muhsahi sie lohm, ke el oraclah ac sang fin lohm sacn, orek sruhnguhl ac oacyacpac in muhsahi kuhtuh koanon lohm sacn, oacna tepuh ac siah? Wacngihn ahlohloh kac lah Jesus el etuh na pwacye insewowo se ma tuhkuh ke orekma upac ma ahksahfyeyucklac ke inkacnek wo.

⁷ Jesus el mwet na alken se ke orekma in luti lal uh. Ke lusen yac tolu tahfuh, el arlacna kahfofo ke orekma yohk srihpac se inge. El luhngse in sramsram nuh sin mwet nuhkewa suc el ohsun nuh se, pwacnacng el orekma ke lwen nuhkewa, muhtwacwacack ke toang in lututacng nuh ke fong. (Luke 21:37, 38; John 3:2) “El fuhfahsryucsr in siti srihsrihk ac siti luhlahp in fahkwack Pweng Wo ke Tohkohsrahi luhn God.” Ke fuhfahsryucsr lal Jesus inge el fahsr ke lusen tausin mael ke inkacnek ma arlac tuhs tuh elan fahkwelihk pweng wo se inge nuh sin mwet uh.

8, 9. Jesus el engankihn fuhkah orekma upac lal uh?

⁸ Yac Jesus el engankihn orekma upac lal ke orekma in  luti uh? Ahok! El tahknelihk fihtac luhn ma pwacye ke Tohkohsrahi uh ac ma inge ahkolah insiacn mwet pucspucs nuh ke pacl in kosrwacni uh. Kuhlwacnsap lal nuh sin God uh ahkkweyacl Jesus in ahksahfyelah orekma lal uh ac in tiac arlac nuhnkuh ke pacl in mongo lal. (John 4:31-38) Srihke nuhnkuh ke luhpan insewowo ma el puhla ke sahflahiyen orekma in luti lal fin facluh ke el kuh in fahk nuh sin Pahpah tuhmwacl uh: “Nga fahkwack tari wolacna lom nuh facluh, ke nga ahksahfyelah orekma ma kom acse nuh sihk in oruh.”—John 17:4.

⁹ Pwacye lah Jeova ac Jesus pa mwe srihkasrak wo emeet ke mwet suc engankihn orekma upac la. Luhngse lasr nuh sin Jeova uh mokle kuht in “oacna El.” (Ephesus 5:1) Luhngse lasr nuh sin Jesus uh mokle kuht in “fahsr in falkacl.” (Sie Peter 2:21) Pwacnacng, ingena kuht liye lah kuht ac oacyacpac engankihn fuhkah orekma upac lasr uh.

10, 11. Meac ac kuh in kahsre kuht in ahkkahlwemye sie ohiyac ac nuhnak wo nuh ke orekma?

¹⁰ Kuhtuh mwet lili uh enenuh in orekma tuh in kuh in karihngihn mwe enenuh luhn sucu laltahl uh. Kuht luhngse in engankihn orekma ma kuht oruh uh, tuhsruhktuh sahp ma inge ac kuh in upac kuht fin puhla muh kuht sruhnga orekma lasr uh. Kuht ac engankihn fuhkah orekma lasr uh fin pa inge puhlakihn lasr uh?

¹¹ Ahkkahlwemye nuhnak ac ohiyac wo. Kuht tiac kuh in ekuhllah ma pucspucs ke ohiyen moul lasr uh, tuhsruhktuh kuht kuh in ekuhllah ohiyacsr ac nuhnak lasr kac uh. Ke kuht nuhnkuh yohk ke nuhnak luhn God, ma inge ac kuh in kahsre kuht in ahkkahlwemye sie ohiyac wo nuh ke orekma. Ke sie mwe puhpuhlyuck, kom fin sie sifac ke sucu, nuhnkuh ke orekma lom an oacna sie inkacnek  ma kahsre kom in sang mwe enenuh luhn sucu lom an, finne kom puhla muh tiac wo kuh srihklac molo. Ye muhtuhn God, kunohkohn na yohk se pa in karihngihn mwet in sucu lom an. Kahs lal uh fahk lah sie mwet suc tiac sang mwe enenuh luhn sucu lal uh “kuluk liki na mwet se ma tiac luhlahlfongi.” (Sie Timothy 5:8) Ke kom akihlen lah oasr srihpen orekma lom uh, ma inge ac kahsre kom in ahkfahsrye sie kunohkohn ma God el siyuck sum. Ma inge ac kahsre kom pac in liye mwe insewowo ma kom engankihn ke orekma lom uh ma sahp mwet orekma sahyac an tiac liye.

12. Ma wo fuhkah tuhkuh ke kuht alken ac pwacye ke orekma lasr uh?

 ¹² Alken ac pwacye ke orekma lom. Kuht fin kwacfeacng in orekma ac in etwaclah in oruh wo orekma lasr uh, ma inge ac kuh in use mwe insewowo yohk. Mwet orekma alken ac pihsrlac uh kwacna ahksacohkyeyuck sin mwet kol ke orekma laltahl uh. (Soakas 12:24; 22:29) In oacna mwet Christian pwacye, kuht enenuh pac in pwacye ac suwohs ke orekma lasr uh, tiac pihsrapasr mani, kuhfwen orekma kuh in kuhtasrihk ke pacl lasr uh. (Ephesus 4:28) In oacna ma kuht sramsramkihn ke sapta se tari ac, ohiyen pwacye ac suwohs uh use mwe insewowo pucspucs. Sie mwet orekma suc etweyuck ke ohiyen pwacye ac suwohs lal uh ac kuh in luhlahlfongiyuck. Ac finne mwet kol ke orekma lasr uh tiac akihlen mwe srihkasrak wo ke orekma upac lasr uh, kuht kuh in engan ke srihpen “wacngihn ma suhfal lasr” ac kuht etuh lah kuht ahkinsewowoye God suc kuht luhngse.​—Hebrew 13:18; Colossae 3:22-24.

13. Mwe srihkasrak wo lasr ke acn in orekma uh ac kuh in use mwe insewowo fuhkah?

¹³ Akihlen lah orekma lasr uh kuh in sang wolacna nuh sin God. Ke pacl ma kuht sruokyacna ohiyac wo lasr oacna mwet Christian ke acn in orekma lasr uh, mwet sahyac uh ac akihlen. Meac ma inge ac kuh in oraclah? Ma inge ac kuh in “nahwelah mwe luti ke God, Mwet Lahngo lasr.” (Titus 2:9, 10) Ahok, orekma wo lasr uh ac kuh in oruh mwet sahyac uh in liye woiyen inkacnek in alu lasr uh, ac ma inge ac kuh in pwacnuhltahlma. Srihke nuhnkuh lah ac fuhkah puhlakihn lom uh fin sie mwet suc wi kom orekma el muhtwacwacack in ahkkahlwemye luhngse lal in lohng ma pwacye uh ke srihpen mwe srihkasrak wo lom ke acn in orekma lom an! Yohk srihpac liki na, nuhnkuh ke ma inge: Yac oasr ma sahyac ma kuh in ahkinsewowoye kuht liki na in etuh lah orekma wo lasr uh sang wolacna nuh sin Jeova ac ahkinsewowoyacl?​—Riti Soakas 27:11; Sie Peter 2:12.

14-16. Ke pacl ma kuht enenuh in sulaclah sie orekma, meac kuhtuh kihsen siyuck na yohk srihpac ma kuht enenuh in nuhnkuh kac?

¹⁴ Bible uh tiac ip srihsrihkiyac lah kain in orekma fuhkah ma wo ac tiac wo uh. Tiac kalmen ma inge pa kuht kuh in wi ke oacna sie kain in orekma. Ma suhmuhslah uh ac kuh in kahsre kuht in sulaclah orekma wo ma  ahkinsewowoye God. (Soakas 2:6) Ke pacl ma kuht enenuh in sulaclah sie orekma, oasr ma yohk srihpac luo ma kuht enenuh in nuhnkuh kac.

¹⁵ Kom fin oruh orekma se inge, ac lain ma Bible uh luti? Kahs luhn God uh fahk arlac kahlwem lah tiac wo in pihsrapasr, kikiacp ac alu nuh ke ma sruhloaclah. (Exodus 20:4; Orekma 15:29; Ephesus 4:28; Fwackyuk 21:8) Kuht sruhnga oruh kuhtwena orekma ma ac kuh in mokle kuht in oruh ma inge. Luhngse lasr nuh sin Jeova uh ac tiac kuh in lwelah kuht in wi ke kuhtwena orekma ma kuhnahoslah masap luhn God uh.​—Riti Sie John 5:3.

¹⁶ Yac orekma ma kuht oruh inge oraclah oacna in muh oasr kuhpahsr lasr kuh kuht ahkkweye sie orekma kuluk? Nuhnkuh ke mwe puhpuhlyuck se inge. Tiac kuluk in orekma oacna sie mwet kamtuh. Tuhsruhktuh, ac fuhkah fin siyuckyuck  sin sie mwet Christian elan muhsahelah sie lohm luhn sie pacna alu? Pwacye lah orekma lal uh tiac oruh elan epahsrlah ac alu nuh sin sie pacna god. Tuhsruhktuh, yac orekma se lal inge ac tiac sang kahsruh nuh ke mwe luti kikiacp ma tiac fal nuh ke Kahs luhn God? (Fwackyuk 18:4) Ke srihpen kuht luhngse Jeova, kuht ac tiac luhngse in oruh kuhtwena orekma ma kuhpahsr nuh ke orekma ma tiac fal nuh ke Bible.

17. (a) Nuhnak ac puhlakihn lasr uh ac kahsre kuht fuhkah in oruh sulaclah ma ac ahkinsewowoye God? (b) Meac kuhtuh pac ma sahyac ma kuht kuh in nuhnkuh kac meet liki kuht sulaclah sie orekma? (Liye pohk se inge “ Yac Wo Nga In Sruokyac Orekma Se Inge?”)

¹⁷ Inkaiyen kihsen siyuck ke orekma inge ac kuh in topukyucklac fin tuniyuck ahkwoyac top nuh ke kihsen siyuck luo ma ahkkahlwemyeyuck ke paragraph 15 ac 16. In wekuhnacng ma inge, oasr pac kuhtuh ma sahyac ma ac wo kuht in nuhnkuh kac meet liki kuht sulaclah sie orekma. Kuht tiac kuh in nuhnkuh muh mwet kuhlwacnsap oaru ac lahlmwetmwet eltahl ac oraclah masap nuh ke kais sie ma ma ac kuh in sikyak. Pa inge pacl ma liyactwen lasr uh ac enenweyuck. In oacna ma kuht lotwelah ke Sapta 2, kuht enenuh in luti ac ahkpahye nuhnak ac puhlakihn lasr sifacna ke kuht lutlutkihn Kahs luhn God in liye lah kuht ac orekmakihn fuhkah nuh ke moul lasr ke lwen nuhkewa. “Ke orekma ac pahlah lasr,” kuht fin etwaclah in “akihlen inmahsrlon ma wo ac kuluk,” nuhnak ac puhlakihn lasr uh ac kuh in kahsre kuht in oruh sulaclah ma ac ahkinsewowoye God ac oruh kuht in muhtana in luhngse lal uh.​—Hebrew 5:14.

18. Efuh kuh tiac fihsracsr in oruh sulaclah ma ac ahkinsewowoye Jeova pacl nuhkewa?

¹⁸ Ke srihpen “mwe ongaiyac luhlahp” ma sikyak ke  “lwen sahflah” inge, tiac fihsracsr in oruh sulaclah ma ac ahkinsewowoye Jeova pacl nuhkewa. (Luo Timothy 3:1) Ac kuh in upac nuh sesr in konwacack sie orekma ac sruokyacna.  Tuhsruhktuh, in oacna mwet Christian pwacye, kuht akihlen yohk srihpaciyac in orekma upac nuh sin sucu lasr uh. Kuht fin tiac taran, mwe ahkkuluk ke acn in orekma kuh nuhnak kuluk luhn facl se inge nuh ke mwe kahsruhp ac kuh in ahkkulukyelah kwacfeacng lasr in tahfwelah in kuhlwacnsuhpuh ac alu nuh sin God. (Sie Timothy 6:9, 10) In sruokyac sie nuhnak wo ac fal, lwelah kuht in sramsramkihn “ma suc arlacna wo” ac yohk srihpac.​—Philippi 1:10.

19. Efuh kuh fal kuht in luhlahlfongi Jeova ke insiacsr kewa, ac meac luhlahlfongi lasr inge ac kahsre kuht in fahsr liki?

¹⁹ Luhlahlfongi Jeova ke insiom kewa. (Riti Soakas 3:5, 6.) Yac tiac fal kuht in luhlahlfongel? El nuhnkuh kacsr. (Sie Peter 5:7) El etuh mwe enenuh lasr uh liki kuht ac el ahkolah in kahsre kuht. (Psalm 37:25) Pwacnacng, wo kuht in lohacng ke pacl ma Kahs lal uh ahkacsmakihnye kuht: “Kowos in tiac nuhnkuhn mani, a kowos in falkihn ma oasr yuruwos, tuh God el fahk, ‘Nga ac fah tiacna fahsr liki kom, nga fah tiac siskomlac.’” (Hebrew 13:5) Mwet pucspucs suc wi ke orekma in kuhlwacnsap ke inkaiyen pacl laltahl uh kuh in fahk na pwacye ke kuh luhn Jeova in acse mwe enenuh luhn mwet lal uh in moul. Kuht fin luhlahlfongi lah Jeova el ac fah karihngihn kuht, kuht ac tiac arlacna fosrngah ke mwe enenuh luhn sucu lasr uh. (Matthew 6:25-32) Kuht ac tiac lwelah orekma sahyac in tulokihnyac alu ac kuhlwacnsap lasr nuh sin Jeova uh, oacna orekma in luti ac in wi ke miting.​—Matthew 24:14; Hebrew 10:24, 25.

20. Meac kalmen motom in kahlwem, ac kom ac sruokyac fuhkah nuhnak ohinge?

²⁰ Oruh motom in kahlwem. (Riti Matthew 6:22, 23.) Kalmen motom in kahlwem pa kom in tiac ahkfohsye moul lom ke ma pucspucs ma wacngihn srihpac. Sie mwet Christian suc kahlwem muhta el lohacng na nuh ke ma sefanna, pa in oruh ma luhngse luhn God. Pwacnacng  muhtahsr fin kahlwem, kuht ac tiac nuhnkaclah na in suk orekma ma yohk molo kuh in moulkihn sie moul luhn mwet kahsruhp. Kuht ac tiac pac lohsrlah in suk pacl nuhkewa ke ma sasuc ac ma wo emeet suc mwet kuhka pucspucs eltahl oruh kuht in nuhnkuh muh kuht enenuh tuh kuht in insewowo. Kom ac oruh fuhkah motom in kahlwem? Tiac ahkfohsye moul lom sifacna in orek misac ke ma pucspucs ma tiac enenweyuck. Nikmet ahkkahfofoye kom in eis ma pucspucs ma ac eslah pacl ac lohacng yohk lom. Lohng kahs in kahsruh luhn Bible inge, “fin oasr yohrohsr mwe mongo nwacsr ac nuknuk lasr, lwelah kuht in falkihn ma inge.” (Sie Timothy 6:8) Suk inkacnek nuhkewa ma kom kuh in ahkfihsracsrye moul lom ke kuhiyom.

21. Efuh kuh kuht enenuh in oakiyac ma yohk srihpac emeet nuh sesr uh, ac meac enenuh in yohk srihpac emeet nuh ke moul lasr uh?

²¹ Oakiyac ma yohk srihpac emeet ke alu ac kuhlwacnsap lom uh ac tu na kuh kac. Ke srihpen oasr na ma kuht kuh ac tiac kuh in oruh ke lwen sefanna, kuht enenuh in oakiyac ma yohk srihpac emeet uh. Kuht fin tiac, ma tiac arlac yohk srihpac uh ac kuh in eslah pacl lasr ac wacngihnlac pacl nuh ke ma yohk srihpac emeet uh. Meac enenuh in yohk srihpac emeet ke moul lasr uh? Puhs mwet fin facluh ma kwacfeacng in wi ke lutlut fuhlwact tuh eltahl in konwacack sie orekma wo ac yohk molo. Tuhsruhktuh, Jesus el kwacfe mwet tuhma lutlut lal ah in “nuhnkuh meet ma nuh ke Tohkohsrahi luhn God.” (Matthew 6:33) Ahok, in oacna mwet Christian pwacye, kuht fihliyac Tohkohsrahi luhn God uh in pa ma se ma yohk srihpac emeet ke moul lasr uh. Inkacnek in moul lasr, sulaclah ma kuht oraclah, finsrak ma kuht oakiyac ac kain in orekma ma kuht wi kuh oruh uh ac kuh in ahkkahlwemye lah ma nuh ke Tohkohsrahi ac ma luhngse luhn God uh pa yohk srihpac emeet nuh sesr liki na mwe kahsruhp ac ma pucspucs sahyac.

22, 23. (a) Piyac orekma se ma yohk srihpac emeet nuh sin mwet Christian uh, ac kuht ac ahkkahlwemye fuhkah lah orekma se inge pa yohk srihpac emeet nuh sesr uh? (Liye pohk se inge “ Sulaclah Luhk uh Oruh Nga Engan ac Insewowokihn Moul Luhk uh.”) (b) Meac kom luhngse in kwacfeacng in oruh ke orekma sahyac lom uh?

²² Ke srihpen kuht muhta ke lwen sahflah, pwacnacng kuht enenuh in lohacng ahkwoyac nuh ke orekma yohk srihpac emeet nuh sin mwet Christian pwacye, pa in som fahkwack ac orek mwet tuhma lutlut. (Matthew 24:14; 28:19, 20) In oacna Jesus, suc mwe srihkasrak lasr kuht luhngse in arlacna kahfofo ke orekma in molwelah moul luhn mwet uh. Kuht ac ahkkahlwemye fuhkah lah orekma se inge yohk srihpac nuh sesr? Inkaiyen mwet luhn God uh sang kuhiyacltahl kewa ke orekma in fahkwack se inge. Kuhtuh seltahl oraclah oakwuck in kuhlwacnsap oacna pioneer kuh missionary. Ke srihpen pahpah ac ninac pucspucs eltahl akihlen yohk srihpaciyac in oakiyac finsrak nuh ke orekma in kuhlwacnsap uh, eltahl ahkkweye tuhlihk nahtuhltahl inge in sackuhnlah inkaiyen pacl laltahl in kuhlwacnsuhpuh Jeova oacna sie pioneer kuh in oruh pac kuhtuh orekma sahyac. Yac mwet moniyuck in fahkwack ke Tohkohsrahi uh engankihn orekma upac laltahl uh? Ahok, eltahl arlacna engankihn! Wacngihn ahlohloh kac lah in kuhlwacnsuhpuh Jeova ke insiacsr kewa, pa inkacnek se ma kol nuh ke engan ac mwe insewowo yohk.​—Riti Soakas 10:22.

²³ Inkaiyacsr enenuh in orekma ke lusen ao pucspucs tuh kuht in sang mwe enenuh luhn sucu lasr uh. Esam lah Jeova el luhngse kuht in engankihn orekma upac lasr uh. Ohiyacsr ac orekma lasr uh fin fal nuh ke nuhnak luhn Jeova ac nuh ke kahs in kahsruh luhn Bible, kuht kuh in engankihn orekma lasr uh. Kuht enenuh in kwacfeacng in tiac lwelah kuhtwena orekma sahyac in ahkkulukye kuht liki orekma se ma yohk srihpac emeet uh, pa in som fahkwack pweng wo ke Tohkohsrahi luhn God. Ke kuht oruh orekma se inge in pa yohk srihpac emeet ke moul lasr uh, kuht ahkkahlwemye luhngse lasr nuh sin Jeova ac muhtana in luhngse lal uh.