1-3. (a) Efuh kuh ninac se enenuh in liye lah tuhlihk mukul srihsrihk se nahtuhl ingacn los ac nwacsnwacs? (b) Efuh kuh Jeova el luhngse mwet kuhlwacnsap lal uh in nwacsnwacs? (c) Ac meac mokle kuht in luhngse in nwacsnwacs ke pacl nuhkewa?

SIE ninac el ac ahkolah tuhlihk mukul srihsrihk se nahtuhl meet liki el som nuh ke sie acn. El ac liye elan yihlac ac nuknuk lal uh in los ac nwacsnwacs. El etuh lah yohk srihpen nwacsnwacs lal uh nuh ke sie mahno wo ac fokoko. El oacyacpac akihlen lah atacn tuhlihk mukul se nahtuhl inge ac kuh in ahkwoye kuh ahkkulukye inen pahpah ac ninac kiyacl uh.

² Jeova suc Pahpah tuhmwacsr inkuhsrao, el luhngse mwet kuhlwacnsap lal uh in nwacsnwacs. Kahs lal uh fahk:  “Kom nwacsnwacs nuh selos suc nwacsnwacs.” * (Psalm 18:26) Jeova el luhngse kuht ac el etuh lah ke kuht nwacsnwacs uh, ma inge ac wo nuh sesr. El oacyacpac luhngse kuht, oacna Mwet Loh lal, in ahkkahlwemye ohiyac wo lal ac pwacnma mwet sahyac uh nuh ke ma pwacye. Ke srihpac se inge, ohiyen nwacsnwacs lasr ke atacsr ac orekma lasr uh ac fah tiac ahkkulukye a sang wolacna nuh sin Jeova ac nuh ke ine muhtahl lal uh.​—Ezekiel 36:22; riti Sie Peter 2:12.

³ Ke kuht etuh lah God el luhngse mwet nwacsnwacs, ma inge ac mokle kuht in nwacsnwacs ke pacl nuhkewa. Kuht luhngse inkacnek in moul lasr uh in sang kaksak nuh sel mweyen kuht luhngse el. Kuht oacyacpac luhngse in muhtana in luhngse lal. Pwacnacng, lwelah kuht in tuni ahkwoyac lah efuh kuht enenuh in nwacsnwacs, meac kalmac in nwacsnwacs, ac kuht kuh in nwacsnwacs fuhkah ke pacl nuhkewa. Ke kuht tuni ma inge, ac kuh in kahsre kuht in liye lah oasr ip ke moul lasr uh ma kuht enenuh in ahkwoye kuh in kapkapwack kac.

4, 5. (a) Meac srihpac yohk se ma pwacnacng kuht enenuh in nwacsnwacs ke pacl nuhkewa? (b) Nwacsnwacs luhn Jeova uh kahlwem fuhkah ke ma oreklac nuhkewa lal ke ma kuht liye uh?

⁴ Sie inkacnek ma Jeova el kol kuht kac uh pa ke mwe srihkasrak lal uh. Kahs lal uh kwacfe kuht in “etahi God.” (Ephesus 5:1) Pa inge srihpac yohk se ma pwacnacng kuht enenuh in nwacsnwacs ke pacl nuhkewa: Jeova, God se suc kuht alu nuh se inge, el nwacsnwacs ac muhtahl in ma nuhkewa.​—Riti Leviticus 11:44, 45.

 ⁵ Nwacsnwacs luhn Jeova uh, in oacna ohiyac ac inkacnek pucspucs sahyac lal uh, arlacna kahlwem ke ma oreklac nuhkewa lal ma kuht liye uh. (Rome 1:20) Facluh oreklac tuh in sie acn nwacsnwacs nuh sin mwet uh in muhta kac. Jeova el oraclah oakwuck wo ke facluh ma sifacna ahknwacsnwacsye eng ma kuht momong kac ac kof uh. Oasr kuh na usrnguck se luhn facluh ma sifacna ahknwacsnwacsyelah acn uh. Ke ma inge, kahlwem lah arlacna yohk srihpen nwacsnwacs nuh sel suc “oraclah facluh.” (Jeremiah 10:12) Enenuh pac in yohk srihpac nuh sesr.

6, 7. Masap ma ituckyang nuh sel Moses ahkkahlwemye fuhkah lah nwacsnwacs uh sie ma enenweyuck sin mwet suc kuhlwacnsuhpuh Jeova?

⁶ Sie pac srihpac ma pwacnacng kuht enenuh in nwacsnwacs pacl nuhkewa uh pa mweyen Jeova, suc mwet kol fuhlwactlacna lasr, el luhngse mwet kuhlwacnsap lal uh in nwacsnwacs. Ye masap ma Jeova el sang nuh sin mwet Israel ah, nwacsnwacs laltahl uh kuhpahsr pac nuh ke alu laltahl uh. Masap inge ahkuhtweyac lah ke lwen in elah ma kuluk, mwet tol fuhlwact el enenuh in yihlac tiac pacl se na a pacl luo. (Leviticus 16:4, 23, 24) Mwet tol fuhlwact nuhkewa enenuh in ohllah paholtahl ac niyacltahl meet liki eltahl oruh mwe kihsac uh nuh sin Jeova. (Exodus 30:17-21; Luo Chronicle 4:6) Masap inge ahkkahlwemye lah, kain in inkacnek 70 kuhtuh ke fohkfohk luhn mahno ac inkacnek ma tiac nwacsnwacs in alu nuh sin God kac. Ke pacl se mwet Israel se suc tiac nwacsnwacs el som in oruh alu lal, mwe kai nuh ke ohiyac se inge pa misac. (Leviticus 15:31) Kuhtwena mwet suc sruhnga oruh ma enenweyuck in nwacsnwacs, wekuhnacng in yihlac ac ohllah nuknuk la, “ac fah tiac sifwil pac oacwaclah muh el sie mwet luhn God,” kalmac pa el ac fah acnwucki.​—Oekyuk 19:17-20.

⁷ Kuht finne tiac muhta ye masap ma tuh ituckyang nuh sel Moses ac, ma inge kahsre kuht in kahlwem ke nuhnak  luhn God ke ip luhn nwacsnwacs. Masap uh lihksreni na ahkkahlwemye lah nwacsnwacs uh sie ma enenweyuck sin mwet kuhlwacnsap luhn God uh. Jeova el tiac ekyek. (Malachi 3:6) El ac tiac insewowo ke alu lasr nuh sel uh kuht fin tiac “pwacye ac nwacsnwacs.” (James 1:27) Ke srihpac se inge, kuht enenuh in etuh lah meac el siyuck sesr ke ma inge.

8. Ke inkacnek fuhkah Jeova el luhngse kuht in nwacsnwacs pacl nuhkewa?

⁸ Ke Bible uh, nwacsnwacs uh tiac kalmackihnyuck muhkwena nuh ke nwacsnwacs luhn mahnosr. In nwacsnwacs ye muhtuhn God, ma inge kalmackihn nuh ke ip nuhkewa ke moul lasr uh. Jeova el luhngse kuht in nwacsnwacs pacl nuhkewa ke inkacnek ahkosr inge: Ke alu lasr nuh sel, ke ohiyen moul lasr, ke nuhnak lasr ac ke mahnosr ac ma lasr. Lwelah kuht in sramsramkihn inkacnek ahkosr ma kuht kuh in alu nuh sin Jeova kac ke inkacnek nwacsnwacs.

9, 10. Meac kalmen alu lasr in nwacsnwacs pacl nuhkewa? Ac meac mwet Christian pwacye uh fahsr liki?

⁹ Alu lasr in nwacsnwacs. Ke kahs fototo, kalmen alu lasr in nwacsnwacs pa kuht in tiac oracni alu kikiacp nuh ke alu pwacye. Ke pacl se mwet Israel ah som liki acn Babylon ac fohlohklac nuh Jerusalem, eltahl enenuh in ahkos kahs ma sihmlac ac kwacfeyuck nuh seltahl inge: “Som liki acn [se inge]. . . Nikmet kahlyac kuhtwena ma suc tiac fal in puhsralyuck! Karihngihn kowos sifacna in muhtahl” kuh nwacsnwacs. (Isaiah 52:11) Srihpac yohk se ma pwacnacng mwet Israel ah fohlohklac nuh yen seltahl inge tuh in fohlohkuhnack alu pwacye. Alu inge enenuh in nwacsnwacs ac tiac fohkfohk ke kuhtwena mwe luti, orekma ac facsin ke alu luhn mwet Babylon ma tiacna ahkfuhlwactye God.

¹⁰ Ke pacl inge, mwet Christian uh enenuh in arlacna taran eltahl in tiac ahkfohkfohkyeyucklac ke alu kikiacp.  (Riti Sie Corinth 10:21.) Arlacna yohk srihpac kuht in sensenkihn ma inge, ke srihpen mwe ahkkuluk luhn alu kikiacp uh raunikuhtlac. Ke acn pucspucs, oasr kain in facsin, mukwikwi, ac mwe ahkfuhlwact ma kuhpahsr nuh ke mwe luti luhn alu kikiacp, oacna nuhnak inge muh oasr nguhn se ma som liki monin sie mwet tukun el misac. (Ecclesiastes 9:5, 6, 10) Mwet Christian pwacye uh fahsr liki facsin nuhkewa ma kuhpahsr nuh ke luhlahlfongi luhn alu kikiacp. * Kuht ac tiac lwelah mwe ahkkuluk luhn mwet sahyac uh in oruh kuht in fuhleack oakwuck luhn Bible ke alu nwacsnwacs.​—Orekma 5:29.

11. Meac kalmac in nwacsnwacs ke ohiyen moul lasr uh? Ac efuh kuh yohk srihpac kuht in nwacsnwacs pacl nuhkewa ke ip se inge?

¹¹ Ohiyen moul lasr in nwacsnwacs. In nwacsnwacs pacl nuhkewa ke ohiyen moul lasr uh, kalmac pa kuht in fahsr liki inkacnek nuhkewa ke orekma in kosro. (Riti Ephesus 5:5.) Arlacna yohk srihpac kuht in nwacsnwacs ke ohiyen moul lasr uh. In oacna ma kuht ac fah liye ke sapta se tohkoh an ke puk se inge, kuht enenuh in “kahing liki inkacnek in kosro” kuht fin luhngse in muhtana ke luhngse luhn God. Mwet suc tiac auliyak ke orekma in kosro laltahl uh ac “fah tiac ipeis ke Tohkohsrahi luhn God.” (Sie Corinth 6:9, 10, 18) Ye muhtuhn God, kain in mwet inge wi ke mwet suc “moulkihn luhmah fohkfohk.” Eltahl fin tiac ahkfalye moul laltahl in nwacsnwacs, “acn selos pa . . . misac ahkluo.”​—Fwackyuk 21:8.

12, 13. Meac kuhpahsr luhn nuhnak ac ma kuht oruh uh? Ke inkacnek fuhkah kuht kuh in sruokyacna sie nuhnak nwacsnwacs?

¹² Nuhnak lasr in nwacsnwacs. Ma kuht oruh uh kwacna tuhkuh ke ma kuht nuhnkuh uh. Kuht fin lwelah nuhnak fohkfohk in oan ke nuhnak lasr ac insiacsr, kuht ac kuh in oraclah ma na kuluk. (Matthew 5:28; 15:18-20) Tuhsruhktuh,  kuht fin nwacklah nuhnak lasr uh ke ma wo ac nwacsnwacs, na ma inge ac fah mokle kuht in oruh ma wo kuh ohiyac nwacsnwacs. (Riti Philippi 4:8.) Kuht ac oruh fuhkah nuhnak lasr uh in nwacsnwacs? Sie inkacnek ma kuht kuh in nuhnkuh kac uh pa, kuht enenuh in fahsr liki kuhtwena mwe ahkengan ma ac kuh in ahkkulukye nuhnak lasr uh. * In wekuhnacng, kuht kuh in nwacklah nuhnak lasr uh ke ma nwacsnwacs ke kuht lutlutkihn Kahs luhn God ke pacl nuhkewa.​—Psalm 19:8, 9.

¹³ In muhtana ke luhngse luhn God, arlacna yohk srihpac kuht in tahfwelah in nwacsnwacs ke alu lasr, ohiyen moul lasr ac ke nuhnak lasr uh. Ip pucspucs ke ohiyac nwacsnwacs inge sramsramkihnyuck yohk ke kuhtuh pac sapta sahyac ke mwe rit se inge. Lwelah kuht in tuni ip se  ahkahkosr inge​—nwacsnwacs ke mahno ac ke ma nuhkewa lasr uh.

14. Efuh kuh nwacsnwacs luhn mahnosr ac ma nuhkewa lasr uh tiac ma kais sie mwet ac oruh sulaclah lal nuh kac?

¹⁴ Kalmen nwacsnwacs pa kuht ac oruh pac mahnosr ac ma nuhkewa lasr uh in nwacsnwacs pacl nuhkewa. Yac ohiyen nwacsnwacs uh sie ma kais sie mwet enenuh in oruh sulaclah lal nuh kac ac tiac elyah ke ma mwet sahyac uh nuhnkuh kuh fahk? Moh, tiac ohinge nuh sin mwet kuhlwacnsap luhn Jeova uh. In oacna ma ahkkahlwemyeyuck tari ac, nwacsnwacs lasr ke mahnosr ac ke ma nuhkewa lasr uh arlacna yohk srihpac nuh sin Jeova ke srihpen ma inge ac wo nuh sesr ac oacyacpac sang kaksak nuh sel. Srihke nuhnkuh ke mwe puhpuhlyuck se ke muhtwacwacyen mwe lutlut se inge. Kom fin liye sie tuhlihk suc fohkfohk ac tiac nahweyucklac wo ke pacl nuhkewa, pwacye lah ma inge ac oruh tiac wo nuhnak lom ke pahpah ac ninac kiyacl uh. Kuht tiac luhngse kuhtwena ma ke atacsr kuh ke ohiyen moul lasr uh in ahkkulukye pweng ma kuht fahkwack kac kuh ke Pahpah tuhmwacsr suc inkuhsrao. Kahs luhn God uh fahk: “Kuht tiac luhngse kuhtwena mwet in pahngon muh oasr ma suhtuh ke orekma lasr, ke ma inge kuht srihke in tiac oruh mwe tikuclkucl nuh sin kuhtwena mwet. A in ma nuhkewa kuht oruh, . . . tuh in kahlwem lah kuht mwet kuhlwacnsap luhn God.” (Luo Corinth 6:3, 4) Pwacnacng, kuht ac oruh in nwacsnwacs fuhkah mahnosr ac ma nuhkewa lasr uh ke pacl nuhkewa?

15, 16. Meac kuhtuh ma enenweyuck nuh ke nwacsnwacs luhn sie mwet ke pacl nuhkewa? Enenuh in fuhkah atacn nuknuk lasr uh?

¹⁵ Nwacsnwacs ac nahweyuck luhn kais sie mwet. Finne facsin ac ohiyen moul ke muhtuhnfacl pucspucs uh tiac oacna sie, kuht kuh in konwacack soap ac kof nwacsnwacs  in yihlac kac pacl nuhkewa ac in liyacacng tuh kuht ac tuhlihk nahtuhsr uh in nwacsnwacs. Kuhtuh inkacnek wo ac nwacsnwacs uh pa ke kom ohllah poum ke soap ac kof meet liki kom mongo kuh kahl mongo, tukun kom orekmakihn lohm fahsr, ac tukun kom ahknwacsnwacsye kuh ahollah pamper luhn sie ahwowo. In owo paho ke soap ac kof, ac kuh in kosraclah mas ac molwelah moul luhn mwet. Ohiyac inge ac kuh in tulokihnyac fahsrelihk luhn mas ac wet ma arlacna srihk, in kahsruh mwet uh in tiac maskihn fohk sohrohr. Ke acn ma wacngihn lohm fahsr ke lohm we inge, sahp ac kuh in puckpuckyak sie acn in sang afihnyac ma fahsr tok in oacna ma orek ke pacl luhn mwet Israel ah.​—Deuteronomy 23:12, 13.

¹⁶ Nuknuk lasr uh enenuh pac in owo ke pacl nuhkewa tuh in nwacsnwacs ac wo. Sie mwet Christian el tiac enenuh nuknuk ma yohk molo kuh style sasuc, tuhsruhktuh in los, nwacsnwacs ac fal in nukumyuck. (Riti Sie Timothy 2:9, 10.) Kuht finne muhta oyac, kuht luhngse atacsr “in nahwelah mwe luti ke God.”​—Titus 2:10.

17. Efuh kuh lohm sesr ac ma lasr uh enenuh in nwacsnwacs ac oreklac wo?

¹⁷ Lohm sesr ac ma lasr uh. Finne lohm sesr uh tiac arlacna kahto kuh yohk molo, tuhsruhktuh enenuh in nwacsnwacs ac oreklac wo. In oacpacna, kuht fin kahsruhsrkihn stosah soko in wucn kuht nuh ke toeni uh ac nuh ke orekma in luti uh, kuht kuh in oraclah in arlacna nwacsnwacs acn loac ac luhkuh an. Lwelah kuht in tiac muhlkuhnlah lah fin lohm sesr ac ma lasr uh nwacsnwacs, ma inge sang ma loh ke God lasr uh. Sahyen ma inge, kuht luti nuh sin mwet uh lah Jeova el sie God nwacsnwacs ac el ac fah “kuhnahoslah mwet suc kuhnahoslah facluh,” ac Tohkohsrahi lal uh ac fah ekuhllah facluh nuh ke sie paradise ke pacl na sa. (Fwackyuk 11:18; Luke 23:43) Pwacye lah, kuht luhngse atacn lohm sesr ac ma lasr uh in ahkkahlwemye nuh sin  mwet sahyac uh lah finne ke pacl inge, kuht ahkpahye kuht sifacna in nwacsnwacs in fal nuh ke facl sasuc uh.

18. Kuht ac ahkkahlwemye fuhkah suhnak nuh ke Lohm in Toeni lasr uh?

¹⁸ Lohm in toeni lasr uh. Luhngse lasr nuh sin Jeova uh mokle kuht in ahkkahlwemye suhnak nuh ke Lohm in Toeni lasr uh, pa ingacn acn in alu lasr nuh sin God uh. Ke pacl se mwet sasuc uh tuhkuh nuh ke acn in toeni uh, kuht luhngse in wo ma eltahl liye ke acn in toeni lasr uh. Ke pacl nuhkewa, enenuh in ahknwacsnwacsyeyuck ac ahkwoyeyuck tuh in kahto ac wo acn in toeni uh. Kuht ahkkahlwemye lah kuht suhnakihn Lohm in Toeni lasr uh ke kuht karihngihn ac oruh in nwacsnwacs pacl nuhkewa. Sie kunohkohn na wo in oraclah pacl lasr in wi kahsruh ke ahknwacsnwacs ac “orekma in ahkwoye” acn in toeni uh. (Luo Chronicle 34:10) Kahs in kahsruh se inge orekmakihnyuck pac ke pacl ma kuht oruh Toeni Luhlahp lasr kuh ke kuht orekmakihn lohm sahyac nuh ke toeni inge nuhkewa.

19. In nwacsnwacs ke mahnosr, meac kuht enenuh in fahsr liki ac Bible uh kahsre kuht fuhkah in oruh ma inge?

¹⁹ In nwacsnwacs ke mahnosr, kuht enenuh in fahsr liki ohiyac ac orekma fohkfohk nuhkewa, ma oacna sismohk, chew betel nut, sruhi, ac ono kuluk pucspucs ma ahkkulukye nuhnak luhn sie mwet. Bible uh tiac fahk orekma fohkfohk ac ma kuluk nuhkewa ma kwacna orek ke pacl inge. Tuhsruhktuh, Bible uh use kahs in kahsruh ma ac kuh in kahsre kuht in etuh puhlakihn luhn Jeova ke ma inge nuhkewa. Ke srihpen kuht etuh nuhnak luhn Jeova ke ohiyac ac orekma inge nuhkewa, luhngse lasr nuh sel uh mokle kuht in fahsr ke inkacnek ma el insewowo kac. Lwelah kuht in tuni limekohsr kahs in kahsruh luhn Bible kac inge.

20, 21. Kain in orekma ac ohiyac fuhkah Jeova el luhngse kuht in tiac oruh? Srihpac na kuh fuhkah se oasr yohrohsr in ahkos ma inge?

 ²⁰ “Ke ma inge, mwet kuloh, ke wuhleacng inge oasr yohrohsr, lwelah kuht in sifacna ahknwacsnwacsye kuht liki ma fohkfohk nuhkewa in ikoac ac nguhn, ac in ahkwoye ma muhtahl in sahngweng sin God.” (Luo Corinth 7:1, BMK) Jeova el ac tiac luhngse kuht in oruh orekma kuluk nuhkewa ma ahkfohkfohkye mahnosr ac ahkkulukye elah lasr ac nuhnak lasr uh. Ke srihpac se inge, kuht enenuh in fahsr liki ohiyac kuh elah ma kuht pahlah kac ma etweyuck muh mwe sensen nuh ke mahnosr ac nuhnak lasr uh.

²¹ Bible uh acse sie srihpac na kuh nuh sesr in “ahknwacsnwacsye kuht liki ma fohkfohk nuhkewa.” Nuhnkuh ke muhtwacwacyen Luo Corinth 7:1: “Ke wuhleacng inge oasr yohrohsr.” Wuhleacng fuhkah se inge? In oacna ke ahkkahlwemyeyuck ke fuhs ekahsr meet inge, Jeova el wuhlelah ma inge: “Nga fah insewowo in eis kowos. Nga ac fah pahpah tomowos.” (Luo Corinth 6:17, 18) Srihke luhmahlah ke nuhnak lom an: Jeova el wuhlelah muh el ac fihlikowi ye karihngihnyuck lal ac el ac luhngse kom oacna sie pahpah suc luhngse tuhlihk mukul kuh muhtwacn se nahtuhl. Tuhsruhktuh, Jeova el ac fah ahkpwacyeye wuhlelah nuhkewa inge kom fin fahsr liki kuhtwena ma ma ac kuh in ahkfohkfohkye kuh ahkkulukye ‘monum ac nguhnum.’ Sie sulaclah na kuluk pa in lwelah ohiyac kuh orekma kuluk in eislah fototo wo ac sacohk lom nuh sin Jeova!

22-25. Kahs in kahsruh fuhkah ke Bible uh ac kuh in kahsre kuht in fahsr liki ohiyac ac orekma fohkfohk?

²² “Kom fah luhngse Leum [Jeova] God lom ke insiom kewa, ke nguhnum kewa, ac ke nuhnkom kewa.” (Matthew 22:37) Jesus el fahk muh pa inge masap se ma yohk srihpac emeet uh. (Matthew 22:38) Arlacna fal kuht in ahkkahlwemye kain in luhngse inge nuh sin Jeova. In ahkkahlwemye lah kuht luhngse el ke insiacsr kewa, nguhnasr  kewa ac nuhnkacsr kewa, kuht enenuh in fahsr liki orekma ma ac kuh in ahkfototoyelah moul lasr kuh ahkmuhnahsyelah kuhiyen nuhnak lasr uh.

²³ “[Jeova] pa sang moul ac momong ac ma nuhkewa nuh sin mwet nuhkewa.” (Orekma 17:24, 25) Moul lasr uh sie mwe sang sin God me. Kuht luhngse El suc acse moul nuh sesr, pwacnacng kuht luhngse in ahkkahlwemye suhnak nuh ke mwe sang se inge. Kuht fahsr liki kuhtwena ohiyac kuh orekma ma ac mwe sensen nuh ke mahnosr, mweyen kuht akihlen lah kain in orekma inge ahkkahlwemye lah wacngihn suhnak nuh ke mwe sang se inge ke moul.​—Psalm 36:9.

²⁴ “Kom fah luhngse mwet tuhlan lom oacna kom luhngse kom sifacna.” (Matthew 22:39) Ohiyac ac orekma fohkfohk uh kwacna ahkkulukye mwet se ma oruh an ac oacyacpac mwet suc raunellah uh. Ke sie mwe puhpuhlyuck, arlacna yohk mwe sensen ke pacl se sie mwet el ngusrok fofosr ke paip ma sie pacna mwet el mokko. Mwet se suc ahkngalye mwet suc muhta siskacl uh, el kuhnahoslah masap luhn God in luhngse mwet tuhlan lasr. Ke orekma lal uh, el ahkkahlwemye lah el tiac pwacye ke pacl ma el fahk muh el luhngse God.​—Sie John 4:20, 21.

²⁵ “Ahkacsmakihnyaclos tuh elos in puhsisacl nuh sin mwet kol ac mwet wal fuhlwact, in ahksolos.” (Titus 3:1) Ke acn pucspucs, sie mwet el kuhnahoslah masap ke el sruok kuh orekmakihn ono kuluk. In oacna mwet Christian pwacye, kuht tiac sruok kuh orekmakihn kuhtwena ono kuluk.​—Rome 13:1.

26. (a) Meac kuht enenuh in oruh, tuh kuht in muhtana in luhngse luhn God? (b) Efuh kuh inkacnek se ma wo emeet in moulkihn moul lasr uh pa ke kuht kwacfeacng in nwacsnwacs ye muhtuhn God?

²⁶ In muhtana ke luhngse luhn God, kuht enenuh in nwacsnwacs pacl nuhkewa, tiac ke ip se kuh luo na,  tuhsruhktuh ke ip nuhkewa ke moul lasr uh. In sislah ac tiac oruh ohiyac kuh orekma fohkfohk, sahp ac tiac fihsracsr, tuhsruhktuh kuht kuh. * Pwacye, pa inge inkacnek se ma wo emeet in moulkihn moul lasr, mweyen Jeova el luti kuht ke ma ac wo nuh sesr uh. (Riti Isaiah 48:17.) Yohk liki ma inge, ke kuht kwacfeacng in nwacsnwacs kuht kuh in puhla mwe insewowo ma tuhkuh ke kuht etuh lah kuht ahkinsewowoye God suc kuht luhngse, ac muhtana in luhngse lal.