1, 2. Orekma fuhkah se kom wi kac uh, ac efuh kuh woiyen orekma se lom inge arlacna yohk srihpac?

SRIHKE petsacelah ke kom wi orekma in muhsah ke sie lohm. Orekma in muhsah se inge orek ke lusen pacl na loeloes ac ma inge srackna fahsr. Ne ingena, orekma se inge arlacna upac tuhsruhktuh kom arlacna engan kac. Finne meac sikyak, kom sulaclah in tu na kuh ac tiac fuhleack kuh alsruhngwesrack, ke srihpen orekma se lom inge ac kuh in kahsruh kuh ahkkulukye moul lom uh ne tok. Efuh? Mweyen lohm se ma muhsahiyuck inge puhpuhlyuckkihnyuck nuh keim sifacna!

² Jude, suc sie mwet tuhma lutlut el ahkkahlwemye yohk srihpaciyen orekma in muhsah se ma kuht oruh kacsr inge. El suhmuhslah: “Sifacna muhsahikowosyak fin luhlahlfongi muhtahl lowos.” (Jude 20, 21) Ke mwet Christian uh oruh ma inge, eltahl fah “muhtana in luhngse luhn God.” Ke pacl inge, kuht ac sifacna ‘muhsahikuhtyak’ fuhkah, tuh in fokoko luhlahlfongi lasr uh? Lwelah kuht in lutlutkihn inkacnek tolu ma kuht kuh in ahkkweye luhlahlfongi lasr uh kac.

3-5. (a) Nuhnak fuhkah Satan el luhngse in oasr yurum ke masap nuhkewa luhn Jeova uh? (b) Nuhnak fuhkah enenuh in oasr yohrohsr ke masap nuhkewa luhn God uh, ac meac ma inge ac oruh nuh sesr? Luhmahlah.

³ Ma se meet, kuht enenuh in ahkkweye luhlahlfongi lasr ke masap luhn God uh. Ke lusen lutlut lom ke puk se inge, kom liye kuhtuh sin masap suwohswohs luhn Jeova nuh ke orekma lasr uh. Meac nuhnak lom kac? Satan el luhngse in kiacpwekomlac tuh kom in puhla muh masap, kahs in kahsruh ac oakwuck luhn Jeova ke Bible uh upaclaclac ac sruok kom liki ma wo sahyac. El nuh orekmakihn na inkacnek kuhtasrihk lal inge muhtwacwacack e ke pacl se emeet ma ma inge orekma nuh sel Adam ac Eve ke imac Eden. (Genesis 3:1-6) Yac inkacnek kuhtasrihk lal inge ac kiacpwekomlac pac? Nuhnak ac ohiyom pa ac ahkkahlwemye uh.

⁴ In luhmahlah: Ke kom fahsr ke sie acn in muhtwacta na kahto, kom akihlen lah sie ipin acn ingacn kalkalyak. Imac ma oan luun kalkal se inge arlacna kahto. Sahp, ke muhtwacwackiyac ah kom nuhnkuh muh kalkal sacn wacngihn srihpac ac ma inge sruok kom liki ma wo ma kom kuh in engankihn luun acn kahto sacn. Tuhsruhktuh, ke kom lohacng nuh ke ma oan luun kalkal sacn, kom liye soko lion suhlallacl ma oan soano ma elan kanglah! Ke pacl sacn, nuhnak lom ke kalkal sacn eklac ac kom liye lah kalkal sacn karihngihn kom. Yac oasr ma suhlallacl ma soano in ahkkulukye kom? Kahs luhn God uh sensenkihn: “Kowos in ngucsrihk ac tawi! Devil, mwet lokoalok lowos, el forfor oacna soko lion ngutngut, sukok mwet elan kanglah.”​—Sie Peter 5:8.

⁵ Satan el sie mwet lokoalok suc suhlallacl na pwacye.  Ke srihpen Jeova el sruhnga Satan elan ahkkulukye kuht, pwacnacng el oakiyac masap pucspucs in karihngihn kuht liki orekma “kuhtasrihk” luhn mwet suhlallacl se inge. (Ephesus 6:11) Ke kuhtwena pacl ma kuht nuhnkuh yohk ke masap luhn God uh, wo kuht in liye ma inge oacna luhngse luhn Pahpah tuhmwacsr inkuhsrao. Kuht fin nuhnkuh ohinge ke masap luhn God uh, ma inge ac kuh in mwe karihngihn se nuh sesr ac ahkinsewowoye kuht. Mwet tuhma lutlut James el suhmuhslah: “Kuhtwena mwet suc arlacna lohacng nuh ke ma sap wowo suc ahksukohsohkye mwet uh, ac el kwacfeacng in nuhnkuh na kac, . . . mwet ohinge uh God El ac fah ahkinsewowoye in ma el oruh.”​—James 1:25.

6. Piyac inkacnek se ma wo emeet kom in muhsaheack luhlahlfongi lom nuh ke masap ac kahs in kahsruh suwohswohs luhn God uh? Sang sie mwe puhpuhlyuck an.

⁶ Inkacnek se ma wo emeet kuht in muhsaheack luhlahlfongi lasr nuh sin Jeova ac nuh ke masap lahlmwetmwet lal uh pa in moulkihn masap lal uh. Ke sie mwe puhpuhlyuck, “masap luhn Christ” uh wekuhnacng pac masap se lal in som luti nuh sin mwet sahyac “in ahkos ma nuhkewa [ma el] sapkihn.” (Galatia 6:2; Matthew 28:19, 20) Arlacna yohk srihpac mwet Christian uh in oacyacpac ahkos masap se inge in tuhkweni nuh sie ke alu ac in muhsaheack sie sin sie. (Hebrew 10:24, 25) Masap luhn God uh oacyacpac kwacfe kuht in puhruhe nuh sin Jeova pacl nuhkewa ke insiacsr kewa. (Matthew 6:5-8; Sie Thessalonica 5:17) Ke kuht moulkihn kain in masap inge, kuht liye arlac kahlwem lah masap inge mwe kahsruh na wo nuh sesr. Ke kuht ahkos uh, ma inge acse siena kain in insewowo ac engan ma kuht tiac kuh in puhla ke kuhtwena acn sahyac ke facl na kuluk se inge. Ke kom nuhnkuh yohk ke ma wowo pucspucs ma kom sifacna eis ke kom moulkihn masap luhn God uh, yac ma inge tiac ahkkweye luhlahlfongi lom an?

7, 8. Kahs luhn God uh ahkkweye fuhkah mwet suc sensen muh eltahl ac tiac kuh in tahfwelah na in oruh ma suwohswohs?

 ⁷ Kuhtuh pacl uh, oasr mwet suc sensen muh ac upac nuh seltahl in tu na kuh ac ahkos masap luhn Jeova uh tukun yac pucspucs. Eltahl sahngweng muh eltahl ac puhtatlac. Fin oasr pacl kom puhla ohinge, esam kahs inge: “God muhtahl luhn Israel, LEUM GOD suc molikowoslac, El fahk, ‘Nga LEUM GOD lowos, Suc luhngse luti kowos ke ma ac wo nuh suwos sifacna, ac in kol kowos nuh ke inkacnek ma fal kowos in fahsr kac. Kowos fuhnuh lohacng nuh ke ma sap luhk, mwe insewowo luhkuhn kahk ma oacna soko infacl ma tiac wi mihnlac. Kuhtanglah luhkuhn tuhkuh nuh suwos oacna noa ma tok we acn uh.” (Isaiah 48:17, 18) Yac nuh oasr pacl ma kom tui ac nuhnkuh ke mwe ahkkweye ma tuhkuh ke kahs inge?

⁸ Ke fuhs inge, Jeova el ahkacsmakihnye kuht lah kuht kuh in insewowo ke pacl ma kuht ahksol uh. El wuhlelah ke mwe insewowo luo ma kuht kuh in eis kuht fin oruh ma inge. Ma se meet, mislac ma oasr yohrohsr uh fah oacna soko infacl mihs, ma yohk kof kac ac tiac tui ke sohrohr uh. Ahkluo, suwohswohs lasr uh fah oacna noa in meoa. Kom fin tu lihkihn pot uh ac liye ke noa uh tok we acn uh, kom puhla muh wacngihn sahflahiyen ma inge. Kom etuh lah noa inge ac tiac tui. Finne tukun yac pucspucs ac srackna tok we acn uh. Jeova el fahk lah suwohswohs lom kuh orekma wo lom in oruh ma suwohs uh ac kuh in ohinge. Kom fin kwacfeacng in oaru nuh sel, el ac tiacna lwelah kom in puhtatlac! (Riti Psalm 55:22.) Yac wuhlelah na wo inge tiac muhsaheack luhlahlfongi lom nuh sin Jeova ac nuh ke masap suwohswohs lal uh?

9, 10. (a) Efuh kuh wo in oasr finsrak luhn mwet Christian in ahkkweye fototo laltahl nuh sin Jeova uh? (b) Fototo lasr nuh sin Jeova uh ac kahsre kuht fuhkah in engan?

⁹ Ip se ahkluo ke orekma in muhsah se lom inge  ahkkahlwemyeyuck ke kahs in Bible inge: “Kuht in fahsr nuh meet nuh ke . . . mwet pah tari.” (Hebrew 6:1) Arlacna wo fin nien sun kuh finsrak luhn sie mwet Christian pa elan pah in nuhnak. Mwet Christian uh kuh in sun finsrak se inge. Tuhsruhktuh, fin nien sun kuh finsrak lal uh pa elan suwohs in ma nuhkewa, ma inge ac tiac kuh in sikyak ke pacl inge. Sahyen ma inge, mwet Christian uh arlacna engan in kuhlwacnsuhpuh Jeova ke eltahl kapkapwack ac pah tari. Efuh?

¹⁰ Sie mwet Christian suc fototo nuh sin Jeova el nuhnkuh ke ma nuhkewa oacna ke inkacnek ma Jeova el nuhnkuh kac uh. (John 4:23) Paul el suhmuhslah: “Elos suc moulkihn moul in ikoac, nuhnak lalos suk na ma luhn ikoac. Elos suc moulkihn moul in nguhn, nuhnak lalos suk ma luhngse luhn nguhn.” (Rome 8:5) Nuhnak luhn mwet suc moul in ikoac uh tiac puhla engan yohk ke srihpen eltahl kwacna nuhnkuh kacltahl sifacna, eltahl tiac nuhnkuh ke pacl fahsruh uh kuh lohacng yohk nuh ke ma pucspucs luhn facluh. Mwet suc nuhnak laltahl uh oacna nuhnak luhn God eltahl insewowo, mweyen eltahl nuhnkuh yohk kacl Jeova, sie God suc insewowo. Sie mwet suc  nuhnak la uh oacna Jeova, el engan in ahkinsewowoye Jeova ac el engan finne ke pacl upac. Efuh? Ma upac uh sang pacl wo nuh sel in ahkpwacyeye lah Satan el kikiacp ac elan kuh in muhsaheack ohiyen oaru lal ma ahkinsewowoye Pahpah tuhmwacsr inkuhsrao.​—Soakas 27:11; riti James 1:2, 3.

11, 12. (a) Meac Paul el fahk ke kuh luhn sie mwet Christian in “akihlen inmahsrlon ma wo ac ma kuluk” uh, ac meac kalmen kahs se inge ma luhngasyucklac oacna ‘ahkpahyeyuck’? (b) Kain in ahkpah fuhkah ma ahwowo ac oacyacpac gymnast uh enenuh?

¹¹ Sie mwet suc ahkpahyeyuck, el kuh in kapkapwack oacna sie mwet suc pah in nuhnak ac in nuhnak oacna Jeova. Nuhnkuh ke fuhs se inge: “Kuhtwena mwet suc srackna nihm titi, el srackna tuhlihk srihsrihk, ac wacngihn etuh lal ke ma pwacye ac ma tiac pwacye. A mongo ma kwekwe uh ma nuh sin mwet mahtuh, suc ke orekma ac pahlah lal el kuh in akihlen inmahsrlon ma wo ac ma kuluk.” (Hebrew 5:13, 14) Ke pacl se ma Paul el fahk lah enenuh in ‘ahkpahyeyuck’ kuh lasr in akihlen inmahsrlon ma wo ac ma kuluk, el orekmakihn sie kahs Greek ma kwacna orekmakihnyuck ke acn in sritacl fin acn Greece. Kalmen kahs se inge pa ‘in ahkpahyeyuck oacna sie gymnast’ kuh tuhlihk sritacl. Nuhnkuh lah kain in ahkpah fuhkah ma enenweyuck nuh kac uh.

¹² Ke pacl se ma kuht isuslac uh, mahnosr soenna ahkpahyeyuck in oruh kuhtwena ma. Ke sie mwe puhpuhlyuck, ahwowo se tiac arlac kuh in orekmakihn pahol ac niyacl. Finne ohinge, ahwowo se ac kuh in kohlwack pahol ac mokle kuh in oacyacpac puokyac muhtahl sifacna ma ac kuh pacna in oruh elan lut ac tuhngyak. Kais kuhtuh na ke el orekmakihn pahol ac niyacl, mahnol ac kuh in pahlah. Ke muhtwacwacackiyac ah, ahwowo se el etwaclah in orahk, na tukun pacl se el etwaclah in fahsr ac tok el kuh pac in kahsruhsr. Tuhsruhktuh, fuhkah nuh sin sie gymnast? Ke pacl se ma kom liye sie mwet sritacl el ahtu ac  for e lucng ac arlac fwel mukuikui nuhkewa lal inge, wacngihn ahlohloh ke nuhnak lom an lah, monin mwet se inge ahkpahyeyuck ke lusen pacl loeloes tuh elan kuh in oruh ma inge. Suhmaht luhn gymnast se inge tiac ma sikyak na, tuhsruhktuh yohk pacl ma el orekmakihn in ahkpahyacl. Bible uh ahkkahlwemye lah kain in ahkpah ma orek nuh ke monin sie mwet “ahkkweye mahno” ke kihtin pacl na. Kahlwem lah ahkpah lasr in akihlen inmahsrlon ma wo ac ma kuluk uh yohk srihpac liki na!​—Sie Timothy 4:8.

13. Kuht ac ahkpahye fuhkah kuh lasr in akihlen inmahsrlon ma wo ac ma kuluk?

¹³ Ke puk se inge, kuht sruhmuhn ma pucspucs ma ac fah kahsre kom in ahkpahye kuh lom in akihlen ma wo ac ma kuluk uh, tuh kom in sruokyacna oaru lom nuh sin Jeova oacna sie mwet suc ahkkahlwemye nuhnak lal. Ke kom nuhnkuh yohk ke kahs in kahsruh ac masap luhn God uh, oacyacpac puhruhe kac tuh kom in oruh sulaclah wo ke kais sie lwen in moul lom. Ke sulaclah nuhkewa ma kom oruh uh, siyuck sum sifacna: ‘Meac masap kuh kahs in kahsruh luhn Bible nuh ke ma inge? Nga ac orekmakihn fuhkah? Inkacnek in moul fuhkah ac ahkinsewowoye Pahpah tuhmuhk inkuhsrao uh? (Riti Soakas 3:5, 6; James 1:5.) Pwacnacng, kom fin oruh sulaclah nuhkewa lom ke inkacnek ohinge, kom ac tahfwelah na in ahkpahye kuh lom in akihlen inmahsrlon ma wo ac ma kuluk uh. Kain in ahkpah inge ac fah kahsre kom in eklac ac sruokyacna ohiyen sie mwet suc ahkkahlwemye nuhnak luhn Jeova uh.

14. Kain in kena fuhkah se kuht enenuh in ahkyohkye tuh kuht in kapkapwack ke fototo lasr nuh sin Jeova uh? Tuhsruhktuh, mwe sensen fuhkah kuht enenuh in esam?

¹⁴ Finne sie mwet el pah in nuhnak, srackna puhs ma el kuh in kapkapwack kac. Sie mwet el enenuh mongo tuh elan kapkapwack. Ke srihpac se inge Paul el fahk: “Mongo ma kwekwe uh ma nuh sin mwet mahtuh.” Sie ma  yohk srihpac in muhsaheack luhlahlfongi lom an pa kom in tahfwelah na eis mongo kwekwe ke kahs luhn God uh. Sie inkacnek lahlmwetmwet pa in orekmakihn ma kom lotwelah uh. Bible uh fahk lah: “Ma se ma yohk srihpac emeet nuh sum pa in suk lahlmwetmwet.” Pwacnacng, kuht enenuh in ahkyohkye kena lasr nuh ke ma sacohk ac pwacye suc Pahpah tuhmwacsr el acse nuh sesr. (Soakas 4:5-7; Sie Peter 2:2) Pwacye, ke kuht ahkyohkye etwacack lasr ke lahlmwetmwet luhn God, kuht tiac pac enenuh in inse fuhlwactack. Kuht enenuh in tuni kuht sifacna pacl nuhkewa tuh kuht in taran ohiyen inse fuhlwact kuh kuhtuh pac ohiyac sesuwohs sahyac in tiac muhtwacwacack in oasr yohrohsr. Paul el suhmuhslah: “Kowos in sifacna srihke kowos ac nuhnuhnkekowos, in konwacack lah kowos moul in luhlahlfongi kuh tiac.”​—Luo Corinth 13:5.

15. Efuh kuh luhngse uh yohk srihpac nuh ke kapkapack lasr in fototo nuh sin Jeova?

¹⁵ Finne sahflah muhsah ma orek nuh ke sie lohm, srackna oasr orekma ma enenweyuck. Enenuh in ahkwoyeyuck ac karihngihnyuck ma pucspucs kac, sahp oasr infuckihl sahyac ma enenuh in oreklac fin pa oasr eklac ke ohiyen moul luhn mwet inge. Meac kuht enenuh in oruh tuh kuht in fototo nuh sin Jeova ac in karihngihn fototo se inge? Ma se ma yohk srihpac emeet uh pa luhngse. Kuht enenuh in tahfwelah na in kapkapwack ke luhngse lasr nuh sin Jeova ac nuh sin mwet lili wiyacsr uh. Fin wacngihn luhngse yohrohsr, na etwacack ac orekma  nuhkewa lasr uh wacngihn srihpac. (Sie Corinth 13:1-3) Fin oasr luhngse yohrohsr, kuht kuh in fototo nuh sin Jeova ac tahfwelah na in kapkapwack ke fototo lasr nuh sel uh.

16. Kain in nuhnak fuhkah Satan el orekmakihn uh, ac mwe kahsruh fuhkah Jeova el acse nuh sesr uh?

¹⁶ Lwelah kuht in nuhnkuh ke sie pac ip ke muhsah se ma kom oruh inge. Kom fin luhngse in muhsaheack moul lom in oacna sie mwet tuhma lutlut oaru luhn Christ, kom enenuh in karihngihn nuhnak lom an. Satan pa kol facluh ac el suhmahtlac ke ahkmuhnahsye mwet uh in nuhnak kuluk, nuhnak ahlohloh, wacngihn luhlahlfongi ac wacngihn finsrak. (Ephesus 2:2) Kain in nuhnak inge arlacna sensen nuh sin sie mwet Christian in oacna ke won ac wet srihsrihk uh mwe sensen nuh ke sahk ke sie lohm. Tuhsruhktuh, Jeova el use nuh sesr mwe kahsruh na yohk ma ac kuh in karihngihn kuht pa finsrak lasr uh.

17. Kahs luhn God uh ahkkahlwemye fuhkah yohk srihpaciyen finsrak lasr uh?

¹⁷ Bible uh tahkuhnlah ip pucspucs ma oasr ke mwe loeyuck in karihngihn fototo lasr nuh sin Jeova ma kuht ac enenuh tuh kuht in lainuhl Satan ac facl se inge. Sie ip yohk srihpac kac uh pa mwe loeyuck nuh ke insifacsr, pa “finsrak lasr nuh ke molwelah.” (Sie Thessalonica 5:8) Sie mwet mweun in pacl meet ah el etuh lah el ac tiac kuh in moullac ke sie mweun fin wacngihn mwe loeyuck nuh ke insifacl. Ma inge kwacna oreklac ke osra ac ituckyang nuh fin susu ma oreklac ke nuknuk. Mwe loeyuck insucf inge karihngihn insifen mwet uh liki kuhtwena ma ac kuh in ahkngalye, tuh in tiac yohk ma upac sikyak. Finsrak lasr uh pa ac kuh in karihngihn nuhnak lasr uh, oacna ke sie mwe loeyuck ma karihngihn insifacsr.

18, 19. Mwe srihkasrak fuhkah se Jesus el oakiyac ke el sruokyacna finsrak lal, ac kuht ac etahel fuhkah?

 ¹⁸ Jesus el oakiyac mwe srihkasrak se ma wo emeet in sruokyacna finsrak lal uh. Esam ma el muhtwacnglah ke fong sahflah se lal fin facluh ah. Sie sin kawuck na fototo lal inge orek kuhtasrihk nuh sel ke srihpen mani. Sie pac kawuck lal uh lahfwekuhnuhl. Mwet sahyac lal uh som luhkel. Mwet ke acn sel uh foracng lainuhl, ac wowoyak nuh sin solse luhn acn Rome eltahl in ahkkweokyacl ac unilyac. Fal kuht in fahk muh Jesus el sun ma na upac pucspucs ma wacngihn sie pacl kuht ac muh sun. Meac kahsrel? Bible uh tohpohklah ohinge: “Ke engan ma fihliyucki ye muhtahl, el muhtweng ke kweok fin sahk uh, el pihlacsraclah mwekihn, ac el muhta lacpo lacyot ke tron luhn God.” (Hebrew 12:2, NW) Wacngihn sie pacl ma Jesus el muhlkuhnlah “engan ma fihliyucki ye muhtahl” uh.

¹⁹ Engan fuhkah se oan ye muhtahl Jesus uh? El etuh lah el fin muhtweng ke mwe kweok ma el sun uh, oasr ip kunacl in ahkfuhlwactye ine muhtahl luhn Jeova. El oraclah mwe ahkpwacyeye se ma yohk emeet nuh kac lah Satan el kikiacp. Wacngihn kuhtwena finsrak sahyac ma kuh in ahkenganyacl Jesus oacna ma inge. El etuh pac lah Jeova el ac fah ahkinsewowoye ohiyen oaru lal uh, lah kihtin pacl tok oasr pacl wowo se ma el ac kuh in sifwil muhta yurin Pahpah tuhmwacl uh. Jesus el sruokyac kuh finsrak se inge ke nuhnak lal uh ke pacl ma el sun ma upac uh. Kuht enenuh in oruh oacpacna. Oasr mwe insewowo ma fihliyucki pac ye muhtahsr. Jeova el use nuh sin kais sie sesr kunohkohn na wo in ahkfuhlwactye inel. Kuht kuh in ahkpwacyeye lah Satan el kikiacp ke kuht sulacllah Jeova oacna Mwet Kol lasr ac kuht muhtana in luhngse luhn Pahpah tuhmwacsr uh finne ke pacl upac kuh fin oasr ma upac kuht sun.

20. Meac ac kuh in kahsre kom in lohacng nuh ke nuhnak wo ma oasr finsrak kac uh?

 ²⁰ Jeova el tiac luhngse muhkwena in ahkinsewowoye mwet kuhlwacnsap oaru lal uh ac el oacyacpac engan in oruh ma inge. (Isaiah 30:18; riti Malachi 3:10.) El engan in sang nuh sin mwet kuhlwacnsap lal uh kena wo luhn insiacltahl. (Psalm 37:4) Pwacnacng, lohacng ahkwoyac nuh ke finsrak se ma oan ye motom inge. Nik kom fuhleack ke srihpen nuhnak kikiacp ac nuhnak kuluk luhn facl se lal Satan inge. Kom fin akihlen lah ohiyac luhn facl se inge muhtwacwacack in ilyak nuh ke nuhnak lom ac insiom, sikaleni in puhruhe nuh sin Jeova in eis “mislac luhn God, suc yohk liki ma mwet uh kuh in kahlwem kac.” Mislac luhn God inge ac fah karihngihn insiom ac nuhnak lom an.​—Philippi 4:6, 7.

21, 22. (a) Finsrak wo fuhkah se ma mwet ke “u na luhlahp” se inge ahksacohkye? (b) Ip fuhkah ke finsrak luhn mwet Christian uh yohk srihpac emeet nuh sum, ac meac sulaclah lom uh?

²¹ Finsrak na wo se pa inge kom fin nuhnkuh kac! Kom fin wi ke “u na luhlahp se” ma ac fah painmoullac ke pacl in ongaiyac luhlahp uh, srihke nuhnkuh ke moul se ma kom ac fah engankihn ke pacl na sa uh. (Fwackyuk 7:9, 14) Ke Satan ac demon lal uh wacngihnlac, kom ac puhla  mongi yohk ma kom tiac kuh in petsacelah ke pacl inge. Mweyen, wacngihn sie inmahsrlosr suc puhla tari sie moul ma tiac ahkkulukyeyuck sel Satan. Mwe ahkkuluk se inge fin wacngihnlac, arlacna yohk engan ma kuht ac puhla ke kuht orekma in ekuhllah facluh nuh ke sie paradise ye kolyuck lal Jesus ac mwet kol 144,000 suc ac fah weluhl inkuhsrao! Kuht arlacna engan in nuhnkuh ke pacl se ma kuht ac fah liye ke mas ac suhkahpahs nuhkewa wacngihnlac, ke kuht ac paing mwet lasr suc ilme liki kuclyuck uh, ke kuht ac kuh in moulkihn moul lasr in fal nuh ke ma God el oakiyac nuh sesr in moulkihn ke muhtwacwacackiyac ah! Ke kuht ac eklac suwohswohs, sie mwe sang suc yohk liki ma inge ac fah oacyacpac ituckuh, pa ke wuhlelah se ma ahkkahlwemyeyuck ke Rome 8:21, ke kuht ac wi “ipeis ke sukohsohk wolacna luhn tuhlihk nuhtin God.”

²² Jeova el luhngse kom in engankihn sie kain in sukohsohk yohk ma kom ac tiac kuh in petsacelah. Ahkostwen lom uh pa ac kol kom ke inkacnek in eis sukohsohk se inge. Yac tiac oasr srihpac nuh sum in kwacfeacng ke pacl inge in ahkos Jeova lwen nuhkewa? Ke ma inge, tahfwelah na in muhsahikomyak fin luhlahlfongi muhtahl lom, tuh kom in muhtana in luhngse luhn God ne tok ma pahtpaht!