Arlacna yohk ahsor ma kuht puhla ke pacl se ma sie mwet ke sucu lasr kuh sie mwet suc kuht arlacna fototo nuh se el sisilac liki congregation ke srihpen el tiac auli ke ma kuluk upac ma el oraclah uh. Ohiyacsr nuh ke kahs in kolyuck luhn Bible nuh ke ohiyac se inge ac kuh in ahkkahlwemye luhpan luhngse lasr nuh sin God ac oaru lasr nuh ke oakwuck lal uh. * Nuhnkuh ke kuhtuh kihsen siyuck ma siyuckyuck ke sifac se inge.

Ohiyac fuhkah kuht enenuh in ahkkahlwemye nuh sin sie mwet sisilac? Bible uh fahk: “Kowos in tiac tuhkweni yurin sie mwet suc etweyuck muh el mwet wiyacsr in luhlahlfongi a el moulkihn moul in kosro, kuh rahpkuh, kuh alu nuh sin ma sruhloaclah, kuh el kahskahs in ahkkulukye mwet, kuh sie mwet sruhi, kuh sie mwet pihsrapasr. Kowos in tiacna weluhlos suc oruh ohinge, kuh mongo yohrohlos.” (Sie Corinth 5:11) Mwet nuhkewa suc “tiacna sruokyacna mwe luti luhn Christ,” Bible uh fahk: “Nimet eisacl nuh in lohm suwos uh, ac tiac pac painguhl. Tuh kuhtwena mwet suc paing mwet ohinge, elos mwet ipeis ke orekma kuluk lal.” (Luo John 9-11) Kuht tiac asruoki kuh sramsram ke kuhtwena ma ke alu lasr uh nuh sin mwet sisilac uh. The Watchtower ke September 15, 1981, sra 25, fahk: “Kahs na fihsracsr oacna kahs in paing nuh sin sie mwet ac kuh in pa inge ma se emeet ma kol nuh ke sramsram ac oacyacpac orek kawuck uh. Yac kuht luhngse in oruh step se meet inge nuh sin sie mwet suc sisilac?”

Yac enenuh na pwacye kuht in tiac sramsram ac asruoki yurin mwet sisilac uh? Ahok, ke srihpac pucspucs. Ma se meet, ma inge ahkkahlwemye oaru lasr nuh sin God ac nuh ke Kahs lal uh. Kuht ahkos Jeova tiac ke pacl na ma fihsracsr nuh sesr, tuhsruhktuh kuht oacyacpac ahksol ke pacl ma upac uh. Luhngse lasr nuh sin God uh mokle kuht in ahkos masap nuhkewa lal, ac in akihlen lah el suwohs, oasr luhngse lal ac masap lal uh kol  nuh ke ma wo muhkwena. (Isaiah 48:17; Sie John 5:3) Ahkluo, ke kuht srikuhtlac liki mwet suc oraclah ma kuluk ac tiac auliyak inge, ma inge karihngihn kuht ac mwet nuhkewa ke congregation uh liki mwe ahkkuluk nuh ke fototo lasr nuh sin God ac nuh ke ohiyacsr. Ma inge oacyacpac sang kahsruh in sruokyacna ine wo luhn congregation uh. (Sie Corinth 5:6, 7) Ahktolu, sulaclah lasr in tu na kuh ac ahkos kahs in kahsruh se luhn Bible inge ac kuh pac in kahsruh mwet se ma sisilac inge. Ke kuht ahkkweye sulaclah luhn un mwet elder uh, ma inge ac kuh in sun insiacn mwet se ma oraclah ma kuluk upac inge ac tiac oruh kuhtwena ma in eis kahsruh ma mwet elder uh sang nuh sel. Ke el tilac kuh in sifwil asruoki nuh sin mwet lal uh, ma inge ac kuh in kahsrel in “acsmaklac” ac lohacng nuh ke ma kuluk upac ma el oraclah inge, ac oruh ma enenweyuck nuh sel tuh elan fohlohk nuh yurin Jeova.​—Luke 15:17.

Ac fuhkah fin sucu lasr pa mwet se ma sisilac inge? Ke kain in pacl inge, fototo luhn mwet ke sucu uh ac kuh in mwe srihfe se nuh ke oaru lasr uh. Ohiyac fuhkah enenuh in ahkkahlwemyeyuck nuh sin mwet ke sucu lasr ma sisilac inge? Kuht tiac kuh in ahkuhtweyac ke luhmah ac ohiyac nuhkewa ma ac kuh in sikyak uh, tuhsruhktuh lwelah kuht in lohacng ahkwoyac nuh ke ohiyac luo ma kwacna sikyak uh.

Kuhtuh pacl uh, sie mwet ke sucu se, sahp pahpah, ninac kuh sie tuhlihk nahtuhltahl ma weluhltahl muhta el sisilac. Ke srihpen sisilac lal uh tiac eisacllah liki sucu lal uh, ma nuhkewa ma eltahl oruh ke sucu laltahl uh ke lwen nuhkewa srackna fahsr. Tuhsruhktuh, ke srihpen ohiyac kuluk luhn mwet sisilac sacn, el sulaclah in tui ke ma nuhkewa ma el wi sucu lal an oruh in alu ac kuhlwacnsuhpuh Jeova. Pwacnacng, kuht fin luhngse in ahkkahlwemye oaru lasr nuh sin Jeova, kuht ac tiac sifwil lwelah mwet sisilac se inge in wi ke kuhtwena orekma kuh mukuikui ma kuht oruh in alu nuh sin God kac. Ke sie mwe puhpuhlyuck, fin mwet sisilac sacn oasr luun lohm an ke pacl ma sucu uh tuhkweni oruh lutlut in sucu laltahl uh, el tiac kuh in wi top, puhruhe kuh sramsram kac. Tuhsruhktuh, fin mwet se ma sisilac inge el srackna fuhsr ac muhta ye karihngihnyuck luhn pahpah ac ninac kiyacl uh, srackna ma kunen pahpah ac ninac sacn in lotwel  ac kael. Pwacnacng, pahpah ac ninac sacn kuh in lutlut Bible nuh sin tuhlihk se nahtuhltahl an. *​—Soakas 6:20-22; 29:17.

Ke kuhtuh pac pacl uh, mwet se ke sucu lasr ma sisilac inge el tiac wi kuht muhta. Fin oasr pacl ma komtacl ac enenuh in ohsun in sramsramkuhnlah kuhtuh mwe enenuh luhn sucu uh, kain in ohsun inge enenuh in karihngihnyuck ac enenuh in tiac paht. Mwet Christian oaru uh ac tiac sukok srihpac in sramsram kuh muhta yurin mwet in sucu laltahl ma sisilac ac tiac weluhltahl muhta inge. Oaru laltahl nuh sin Jeova ac nuh ke u lal uh mokleltahl in ahkos oakwuck luhn Bible ke mwet sisilac uh. Oaru laltahl uh ma ac wo nuh sin mwet se suc oruh ma kuluk inge ac kuh pac in kahsrel in orekmakihn ma wo ke mwe kai ma ituckyang nuh sel inge. *—Hebrew 12:11.