MWE LUTLUT AHK 14
Ahkkahlwemye in Kahlwem Mwe Lutlut Yohk Srihpac
Hebrew 8:1
MA KOM KUH IN ORUH: Kahsruh mwet in walihl sacn in ukwe sramsram lom an, ac oruh in kahlwem lah fuhkah kais sie ma yohk srihpac kac an kuhpahsr nuhke ma kom luhngse in ahkpwacyeye an ac sifac ke mwe sramsram lom an.
OREK FUHKAH:
-
Oraclah nien sun kuh mwe finsrak. Lohacng ahkwoyac fin sramsram lom an orek in ahkkahlwemye ma uh, in oruh mwet suc lohng an in luhlahlfongi kac, kuh in mokle insiacn mwet suc lohng an, ac ahkfalye ma inge in fal nuhke mwe sramsram ma kom ac fah oraclah an. Kom in ahkpwacyeye lah mwe lutlut yohk srihpac inge nuhkewa kahsre kom in sun mwe finsrak lom an.
-
Ahkkahlwemye mwe lutlut yohk srihpac ke mwe sramsram lom an. Kais sie mwe sramsram oasr mwe lutlut yohk srihpac se kac. Kom fin luhngse mwet uh in esamyac mwe lutlut yohk kac an, kom enenuh in kalweni ke lusen sramsram lom an. Sulaclah kahs ac mwe puhpuhlyuck ma ac kahsruh mwet in walihl sacn in esamyac ma yohk srihpac kuh sifac se ke mwe sramsram lom an.
-
Oruh in kahlwem ac fihsracsr mwe lutlut yohk srihpac. Sulaclah mwe lutlut yohk srihpac ma kuhpahsr muhkwena nuhke sifac lom an ac ma kom kuh in luti ke inkacnek wo ke lusen pacl ma pakiyucki nuh kac an. Sulaclah na mwe lutlut yohk srihpac, ahkkahlwemye in kahlwem kais sie mwe lutlut yohk kac an, tui kihtin pacl meet liki kom tahfwelah, ac ahkuhtweyac in kahlwem meet liki kom som nuhke mwe lutlut se tohkoh an.
