“Kowos in mwet luti lac.” (Heb. 5:12) Nuhnkuh kac! Jeova, suc mwet Luti wo emeet inkuhsrao ac fin facluh, el suli kuht in luti mwet sahyac uh kacl! Kuhtwena kunohkohn in luti ma pwacye kacl Jeova, oacna ke sucu, congregation kuh ke orekma in fahkwack pa sie kunohkohn na sacohk ac yohk srihpac. Kuht kuh in oruh fuhkah ma inge ke inkacnek wo?

Top nuh kac uh oasr ke kahs lal mwet sap Paul nuh sel Timothy inge: “Kom in moniyuck in riti Ma Suhmuhslah nuh sin walihl uh, ac in fahkwack ac luti.” Paul el tahfwelah: “Kom fin oruh ohinge, kom ac sifacna molikomlac ac oacyacpac elos suc lohng kom.” (1 Tim. 4:13, 16) Oasr pweng ma kom enenuh in fahkwack ma kuh in molwelah moul luhn mwet uh. Pwacnacng, arlac yohk srihpac in ahkwoye inkacnek in rit ac luti lom an. Mwe rit se inge oreklac in kahsre kom in oruh ma inge. Nuhnkuh ahkwoyac ke kuhtuh ip sahyac kac an.

Jeova pa “Mwet Luti” wo emeet. (Job 36:22) Mwe rit se inge ac fah kahsre kom in ahkwoye inkacnek in rit ac luti lom, tuhsruhktuh esam lah Jeova pa sropon pweng lasr ac el amackihn mwet uh nuh yohrohl. (John 6:44) Ke srihpac se inge, puhruhe pacl nuhkewa ac siyuck ke nguhn muhtahl. Orekmakihn Kahs luhn God pacl nuhkewa. Kwacfeacng in kihfucs nuhnak luhn mwet uh nuh yurin Jeova ac tiac nuh yurum sifacna. Kahsreltahl in ahkyohkye luhngse lalos nuh sel.

Suliyuck kom in luti pweng wo ma yohk srihpac emeet nuh sin mwet uh. Kuht luhlahlfongi lah ke kom fihliyac luhlahlfongi lom ke ‘kuh suc God el usot nuh sum,’ kom ac kuhtanglah.—1 Pet. 4:11.

Mwet lili wiyowos suc wi kowos orekma,

Governing Body luhn Mwet Loh luhn Jeova