Nakuminye bingi pa kumvwa byambo bya kuba’mba: “Inge ukeba kuyuka Lesa, twajijila kupwanañana na Bakamonyi ba kwa Yehoba.” Abino byambo bebyambile saka papitako ne kimye kufuma po natendekejile kufunda Baibolo na Bakamonyi ba kwa Yehoba. Pano pa kuba’mba muyuke byo naubile pa kumvwa bino byambo, lekai nemulumbulwileko pacheche mwapita bwikalo bwami.

Nasemekejilwe mu muzhi wa Quezaltepeque mu kyalo kya El Salvador. Munda mwa bamama twasemene 15, kabiji amiwa yami wa butanu na umo. Bansemi baesekeshe kumfunjisha kwikala muntu wa kishinka kabiji ukookela mizhilo. Kabiji Leonardo ne Bakamonyi ba kwa Yehoba bakwabo baiyanga bimye bimo na kwitufunjisha Baibolo. Bino nalengulwile bingi bintu byo twafundanga kabiji kechi nafuukulanga bintu bulongo ne. Byo nafikizhe myaka ya kusemwa 14, natendekele kutoma maalwa ne kwingijisha bizhima na bakwetu mo twafunjilanga sukulu. Bano balunda nami bonse balekele sukulu ne kuya na kutwela mu jibumba ja tupondo, kabiji ne amiwa nalondejile. Moba avula twataanwangatu mu mikwakwa na kuzakamisha bantu kuba’mba betupe mali ne kwiba pa kuba’mba twiingijishenga mu bintu byatama byo twaubanga.

Jibumba ja tupondo jo jaikele nobe kisemi kyami. Nashiinwe kuba’mba nafwainwa kwikala wa kishinka ku jino jibumba. Juba jimo, mukwetu umo mu jino jibumba saka apendwa bizhima wakozhezhe bingi mwanamulume umo ye twaikalanga nanji kipikipi. Byo balwilenga, uno mwanamulume washinjile mulunda nami kabiji waichile ne bakapokola. Nazhingijile bingi kya kuba natendekele kulalaula motoka wa uno mwanamulume na kakonkolo pa kuba’mba alekeko mulunda nami. Uno muntu waesekele kunsashijila kuba’mba ndeke kulalaula motoka wanji, bino kechi nateleko ne muchima ne.

Byo nafikizhe myaka 18, jibumba jetu jalwile na bakapokola. Byo naubile’mba ntaye bomba wa nkondo ye twalengele atweba bene, watubikile saka akiji mu kuboko kwami, kechi nayuka ne kyamwekele ne. Kyo mvulukakotu ke kumona kuboko kwami byo kwasansaikile, kabiji ponkapo naponene panshi napungila ne kupungila. Byo napupulukijile mu kipatela, namwene kuba’mba kuboko kwa kilujo kwaonaikile, kabiji kutwi kwa kilujo nako kwashinkile kabiji kwashajiletu pacheche jiso ja ku kilujo najo kusabika.

Nangwa kya kuba najinga na bino bikozha, byo nafuminetu mu kipatela nabwelele mu jibumba jami ja tupondo. Bino kechi pabanjile ne, bankwachile ku bakapokola ne kuntaya pa kazhima. Byo najinga mu kaleya, bulunda bwami na bakwetu ba mu jibumba jo najingamo bwakosejileko. Twaubilanga bintu pamo, kutendekatu kimye kya lukelo kyo twajanga kajo ka kwiaula ne kupepela pamo jamba kufikatu ne kimye kya kulaala.

Byo najinga mu kaleya, Leonardo waishile na kumpempula. Byo twisambilenga watongwele munwe pa nnembo yajinga pa mukoko wami kwa ku kilujo ne kungipuzha’mba, “Wayuka aye nnembo isatu byo ilumbulula nyi?” Naambile’mba: “Ee, nayuka, ilumbulula bulalelale, bizhima, ne nyimbo muji bijimba bivuma bingi kya kuba ne mushiji ke atente.” Bino Leonardo wakumbwile’mba: “Amiwa nsakwamba’mba ilumbulula kipatela, kaleya, ne lufu. Wajinga mu kipatela, pano luno uji mu kaleya. Wayuka kyashalako nyi?”

Nabokaminetu pa kumvwa byaambile Leonardo. Waambile kishinka. Nabikilenga bumi bwami mu kizumba. Leonardo wangipwizhe inge nakonsheshe kuswa kufunda Baibolo ne aye, kabiji naswile. Byo nafunjilenga mu Baibolo byapimpwile bwikalo bwami. Kinembelo kimo kya mu Baibolo kyaamba’mba “kupwanañana na babi konauna byubilo byawama.” (1 Kolinda 15:33) Onkao mambo, kintu kitanshi kyo naubile, ke kulenga balunda bangi. Na mambo a kino, nalekele kuya ku misambo ya jibumba ja tupondo jo najingamo, kabiji natendekele kupwila pamo na Bakamonyi ba kwa Yehoba ku kupwila ko banengezhezhe monka mu kaleya. Byo nayile na kupwila na Bakamonyi nataaine kaili mukwetu wa jizhina ja Andrés wabatizhiwe ne kwikala Kamonyi wa Yehoba saka aji mu kaleya. Wangichile’mba nkaye na kujiila nanji pamo kajo pa kwiaula. Mu kuya kwa kimye, nalekele kupepa jamba lukelo. Pakuba moba onse lukelo amiwa ne Andrés twisambanga kyepelo kimo kya mu Baibolo.

Bajinga mu jibumba ja tupondo jo najingamo kala, bamwene kuba’mba natendeka kupimpula byubilo byami. Onkao mambo, umo pa batangijilanga jino jibumba waambile’mba wakebelenga kwisambako ne amiwa. Naakaminwe bingi. Kechi nayukile byo asakunguba inge wayuka byo nafuukwilepo kuba ne, mambo kechi kyapelele kufuma mu jibumba ja tupondo ne. Wañambijile’mba: “Twamona kuba’mba waleka kwiya ku misambo yetu, bino ubena kuya na kupwila pamo na Bakamonyi ba kwa Yehoba. Ubena kukeba kuba ka?” Namubuujile namba mbena kukeba kutwajijila kufunda Baibolo ne kupimpula bwikalo bwami. Nakuminye bingi byo ambuujile’mba jibumba ja tupondo jisakunemeka bintu byo nafuukwilepo inge kya kuba kine nakebelenga kwikala Kamonyi wa Yehoba. Kepo aambile’mba: “Inge ukeba kuyuka Lesa, twajijila kupwanañana na Bakamonyi ba kwa Yehoba. Twaketekela usakuleka byubilo byatama. Mbena kukusanchila bingi pa kyo wafuukulapo kuba. Wasalapo jishinda jawama. Bakamonyi bakakukwasha bingi. Bamfunjishepo Baibolo byo najinga mu United States, kabiji ba mu kisemi kyami bamo nabo Bakamonyi ba kwa Yehoba. Kwakamwa ne. Twatwajijila kuba byo wafuukulapo.” Naumvwine bingi moyo, kabiji pa kimye kimotu, nasangalele bingi. Nasanchijile Yehoba Lesa mu muchima wami. Naumvwinetu nobe kañonyi ko bafumya mu kikumbi, kabiji naumvwishishe byambo bya kwa Yesu bya kuba’mba: “Mukayuka bukine, ne bukine bukemukasulula.”—Yoano 8:32.

Pano bino, bamo bajinga balunda nami kala bangesekelenga kupichila mu kumpa bizhima. Bimye bimo natambulanga inge bampa ne kwibingijisha. Pano bino, mu kuya kwa kimye, na mambo a kulombapo na mukoyo, nashinjile bino byubilo.—Salamo 51:10, 11.

Kimye kyo bankasulwile mu kaleya, bavula balangulukilenga’mba nkabwela ku bwikalo bwami bwa kala, pano bino kechi byo byo naubile ne. Pakuba nabwelanga ku kaleya na kufunjishako bakaili bintu byo nafunjile mu Baibolo. Kabiji bajinga balunda nami kala bashiinwe kuba’mba napimpula bwikalo bwami. Pano bino, bajinga balwanyi bami kala abo kechi baswile’mba napimpula byubilo byami ne.

Juba jimo byo nayilenga na kusapwila, mukwetu ye najinga nanji bamutayile mu kañumbwañumbwa ku jibumba ja tupondo jajinga na mata jo twikatazhanga najo kala kimye kyo najinga mu jibumba ja tupondo. Bano bantu bakebelenga kungipaya. Uno musapwishi mukwetu waambile na mushingi bino kwa kubula moyo kwibalumbulwila kuba’mba kechi nakijinga mu jibumba ja tupondo ne. Amiwa kafwako kyo naambilepo ne. Bampumine ne kuñambila’mba kechi nafwainwe kutwela mu yoya nyaunda jibiji ne, kabiji babwelele bapakata mata abo betulekako ne kwitulekako. Kine, Baibolo wapimpwile bwikalo bwami. Kala saka nkyangye kufunda Baibolo, inge nashinkenye nabo. Bino pa kikye kimye, naumvwijile lujimuno lwa mu Baibolo luji pa 1 Tesalonika 5:15 lwa kuba’mba: “Kange muleke muntu nangwa umo ashinkanye na mukwabo wamulenga mambo ne, bino kimye kyonse mwafwainwa kwiubilanga byawama anwe bene na bene ne ku bantutu bakwabo.”

Kufumatu kimye kyo naikele Kamonyi wa Yehoba, nebikako kwikala muntu wa kishinka. Kechi kyampelejile ne. Pano bino, na bukwasho bwa Yehoba Lesa, lujimuno lwa mu Baibolo, ne bukwasho bwa balunda nami ba mu kipwilo, natwajijila kwikala wa kishinka. Kechi nkeba kubwela jibiji ku byubilo byami bya kala ne.—2 Petelo 2:22.

Kala nakanamine bingi kabiji najinga bingi na bukaji. Nashiinwa kuba’mba inge natwajijile na bobwa bwikalo, inge nafwile kala. Byo nafunda mu Baibolo byankwasha bingi kupimpula byubilo byami. Nashinjile miteeto yami ya kala. Nafunda bya kwikala mu mutende na bantu bajinga balwanyi bami kala. (Luka 6:27) Kabiji luno nji na balunda bankwasha kwikala na byubilo byawama. (Byambo bya Maana 13:20) Nji lusekelo kabiji nayuka kyo naikelako, kwingijila Lesa yenka waswila jimo kundekelako mambo ami onse.—Isaya 1:18.

Mu 2006, nataainwe ku sukulu wa bena Kilishitu bakatanda. Byo papichile myaka, nasongwele mukazhami ye natemwa bingi, kabiji tubena kwingijila pamo kukomesha mwanetu wamukazhi. Luno kimye kyabaya nekingijisha mu kufunjisha bantu mafunde a mu Baibolo onka ankwashishe. Kikwabo, nemukulumpe mu kipwilo, kabiji nkwasha banyike kuchinuzhuka kuba bintu byo naubanga saka nji pa jifumbi jo bajipo. Luno kechi mbika bumi bwami mu kizumba ne, bino mbena kukosesha luketekelo lwami mu bwikalo bwa kulutwe bwalaya Lesa mu Baibolo.