Nasemekejilwe mu San Juan Chancalaito, muzhi mucheche waikela mu kibunji kya Chiapas, mu kyalo kya Mexico. Kisemi kyami kyafuma mu mukoka wa bantu batelwa’mba Chol bafumine mu mutundu wa Maya. Munda mwa bamama twasemenwe jikumi na babiji kabiji amiwa yami wa butanu. Byo najinga mwanyike, amiwa, bakolojami ne bankasami betufunjishanga Baibolo ku Bakamonyi ba kwa Yehoba. Kyataminekotu, kechi naingijishanga bintu byo nafunjile mu Baibolo ku bwanyike ne.

Byo nafikizhe myaka 13, natendekele kwingijisha bizhima ne kwiba. Nafumine pa nzubo kabiji natendekele kwikala mu mapunzha apusana pusana. Byo nafikizhe myaka 16, natendekele kwingila mu bujimi bwa jamba. Naingijile mu buno bujimi pa mwaka umo, kabiji juba jimo bufuku byo twatwajilenga jamba na bwato, jibumba ja banabalume baingijishanga bizhima jitulukukile na mata. Pa kuba’mba mpuluke, netayile pa mema ne kuya na kwabukila mukola palepa. Kabiji kechi papichile ne moba avula ne, nanyemejile ku United States.

Mu United States, natwajijile kupotesha bizhima mu bufyamfya kabiji kino kyandengejile kwibika mu lukatazho lukatampe. Byo nafikizhe myaka 19, bankashile na mambo a bwivi ne kwipayañana. Mu kaleya, naikele mu kajibumba ka bantu bakanama bingi kabiji twaubilenga bintu byatama bingi. Na mambo a kino, bakulumpe ba kaleya bamfumishemo ne kuntwala mu kaleya kakatampe mu muzhi wa Lewisburg, mu Pennsylvania.

Mu kaleya ka Lewisburg byubilo byami byakijilemo ne kutama. Na mambo a kuba’mba najinga na nnembo pa mubiji ya bansongwalume bakatazha bantu, nafikenejiletu kukwatankana na bansongwalume bo nataainemo bajinga na bino byubilo. Nakijilemo ne kukilamo byubilo bya bukapondo kabiji nalwanga bingi na bantu. Juba jimo jibumba jetu jalwilenga na jibumba jikwabo monka mu kaleya. Twalwile kya mama nafwa, kwingijisha tukonkolo ne tushimbi to bengijisha pa kukaya makayo akosesha mubiji. Pa kuba’mba balekeshe ino nkondo, baota batayilepo mpilimpili. Kufuma popo, baota bantwajile mu kakibamba mo balamina bambanzhi bashinta bingi monka mu kaleya. Najinga bingi na bukaji kabiji najinga bingi na mwenga. Kechi natayanga kimye kupuma muntu ne. Kupumana kyo kintu kyo natemenwe bingi. Kechi nelangulushangapo pa bino byubilo byami ne.

Mu ka kibamba mo bambikile kechi nalupukangamo ne, onkao mambo, pa kuba’mba mpwishe mukose, natendekele kutanga Baibolo. Mu kuya kwa kimye, muota wampele buku wa kuba’mba You Can Live Forever in Paradise on Earth (Mwakonsha Kwikala Myaka ne Myaka mu Paladisa Pano pa Ntanda). * Byo natangilenga uno buku ulumbulula Baibolo, navulukile bintu byavula bingi byo nafunjile ku bwanyike kimye kyo nafundanga Baibolo na Bakamonyi. Kepo nalangulukilepo bingi pa byo neletelejile na mambo a kutemwa bukapondo. Kabiji nalangulukile ne pa kisemi kyami. Na mambo a kuba’mba banyenga yami babiji baikele Bakamonyi ba kwa Yehoba, nalangulukile kuba’mba, ‘Bakekala myaka ne myaka.’ Kepo neipwizhe amiwa mwine namba, ‘Nanchi ne amiwa kechi nakonsha kwikala myaka ne myaka nenyi?’ Kino kyandengejile kufuukulapo kupimpula bwikalo bwami.

Nangwa byonkabyo, nayukile kuba’mba mbena kukebewa bukwasho pa kuba’mba mpimpule byubilo byami. Onkao mambo, kintu kitanshi kyo naubile ke kulomba kwi Yehoba Lesa kuba’mba ankwashe. Kyalondejilepo, nanembele nkalata ku ofweshi wa musampi wa Bakamonyi ba kwa Yehoba mu United States ne kulomba kuba’mba bamfunjishenga Baibolo. Ofweshi wa musampi wisambile na kipwilo kyajinga pepi kuba’mba bakeye na kummona. Bino pa kikye kimye kechi baswishishe bantu bangi kwiya na kumpempula ne, kanatu balongo bami, onkao mambo, Bakamonyi batendekele kuntumina makalata a lutundaiko ne mabuku alumbulula Baibolo, kabiji bino bintu byandengejile kukebesha kupimpula byubilo.

Nafukwilepo kuleka kupwanañana na jibumba ja bambanzhi jo napwanañenenga najo pa myaka yavula bingi. Wajinga ntangi wa jino jibumba naye bamubikile mu kakibamba ka bunke, onkao mambo, nayilemo pa kimye kyo twakayanga makayo ne kumubuula kuba’mba nakebelenga kwikala Kamonyi wa Yehoba. Nakuminye bingi byo añambijile’mba: “Inge byo byo wafuukulapo, uba byonkabyo. Kechi nakonsha kukukanya kwingijila Lesa ne. Pano inge ubena kukebatu kufuma mu jino jibumba, wayukilatu ne jimo bikafumamo.”

Pa myaka ibiji yalondejilepo, bakulumpe batala pa kaleya bamwene byo napimpwile byubilo byami. Na mambo a kino, baota batendekele kundangulukilako. Bankasululanga nshimbi inge babena kuntwala ko twaowelanga. Muota umo waishile ne kuntundaika kuba’mba ntwajijile kupimpula byubilo byami. Mu kuya kwa kimye, bakulumpe ba kaleya bantwajile ku kaleya ka pangye kajinga kwipi na kaleya kakatampe, kabiji koko naikele mwaka umo wapeleleko mu kaleya. Bankasulwile mu kaleya mu 2004 saka napwishamo myaka jikumi kabiji bambwezhezhe ku Mexico na motoka wa kaleya.

Byo nafikile ku Mexico, papichiletu kimye kicheche, nayile na kukeba kwajinga Nzubo ya Bufumu ya Bakamonyi ba kwa Yehoba. Nayile na kupwila kimye kitanshi saka navwala bivwalo bya mu kaleya, mambo byo bivwalo byonka byo najinga nabyo byamwekelengako bulongo. Nangwa kya kuba kechi namwekelenga kipale ne, Bakamonyi bantambwijile bingi bulongo. Byo namwene kifyele kyo bangubijile, nashiinwe kuba’mba nataana bena Kilishitu ba kine. (Yoano 13:35) Byo twapwishishe kupwila, bakulumpe mu kipwilo banengezhezhe Kamonyi wa kumfunjisha Baibolo. Byo papichiletu mwaka umo, nabatizhiwe ne kwikala Kamonyi wa kwa Yehoba pa 3 September, 2005.

Mu January 2007, natendekele mwingilo wa kimye kyonse, wa kwingila maawala 70 pa ñondo wa kufunjisha bantu Baibolo. Mu 2011 nataainwe ku Sukulu wa Baibolo wa Balongo Bakatanda (luno utelwa’mba Sukulu wa Basapwishi ba Bufumu). Uno sukulu wankwasha bingi kuyuka bya kwingila mingilo mu kipwilo.

Mu 2013, nasongwele mwinakwami ye natemwa bingi aye Pilar. Mwinakwami wamba na lusekelo amba kechi uswa inge nebalumbulwila mwapita bwikalo bwami ne. Kechi mmweshapo byubilo byo najinga nabyo kala ne. Amiwa ne benakwami twaswa kuba’mba Baibolo uji na bulume bwa kupimpula bwikalo bwa bantu.—Loma 12:2.

Mmona kuba’mba byambo bya kwa Yesu biji pa Luka 19:10 byafikile kwi amiwa. Yesu waambile’mba: “[Naishile] na kukeba ne kupulusha balubilamo.” Nalubijilemo pano namweka. Luno kechi mpitañana na kupuma bantu ne. Nsanta bingi pa Baibolo byo ankwasha kupimpula byubilo byami, nayuka ene mambo o naikelako, ngikala mu mutende na bantu, kabiji ne kyakilamo kunema, nji na bulunda bwawama na Mulenga wami, Yehoba.