Nasemekejilwe mu muzhi mukatampe wa Montreal mu kibunji kya Quebec mu kyalo kya Canada. Amiwa, kolojami wamukazhi ne bankasami babalume babiji betukomeshe ku bansemi bajinga bingi na butemwe mu muzhi wa Rosemont. Twaikalanga mu mutende mu kisemi kyetu.

Byo najinga kalombwana, natemenwe bingi Baibolo. Mbena kuvuluka byo najinga na myaka 12, natemenwe bingi kutanga pa bwikalo bwa kwa Yesu mu Lulayañano Lupya. Naumvwanga bingi bulongo pa butemwe bwanji ne byo aubilanga bantu lusa, kabiji nakebelenga kwikala nobe aye. Kyataminekotu, ino milanguluko yafuminemo byo nakomene ne kutendeka kupwanañana na bantu bajinga na byubilo byatama.

Batata baimbanga bingi mumpempe, kabiji kechi bampeletu uno mumpempe wabo ne, bino bandengejile ne kutemwa bingi nyimbo. Neyowanga bingi nyimbo kya kuba kechi nabanjile kufunda kwimba kidali ne. Mu kuya kwa kimye, nalengele jibumba ja banyimbi na balunda nami kabiji twayanga na kwimba mu mapunzha apusana pusana. Bipamo byafyatulanga nyimbo byamwene’mba nayuka bingi kwimba, onkao mambo, bañambijile’mba basakunkwashanga. Naumvwañene nabo ne kufwachika mapepala a lumvwañano na kampanyi kakatampe kafyatula nyimbo. Bantu batemenwe bingi nyimbo yami kabiji beijizhanga kimye kyonse pa waileshi mu Quebec.

Namwekanga nobe najinga na byonse byo nakebanga. Najingatu mwanyike, bino nayile bingi nkuwa, kabiji kwikala na mali avula kyo kintu kyo natemenwe bingi. Kimye kya mute nayanga na kukaya makayo a kukosesha mubiji, kwikala na misambo ya mepuzho na bantapatwambo, nafwachikanga jizhina jami pa bipepala ne mabuku a bantu batemenwe nyimbo yami, kabiji nayanga ne pa ma TV. Juba jimo bufuku, nayile na kwimba nyimbo ne kuzha mu kishimikwa kikatampe. Pa kuba’mba mbule kuchina mabumba a bantu baiyanga na kumona byo naimbanga ne kuzha, natendekele kutoma malwa saka nkijitu mwanyike, bino mu kuya kwa kimye natendekele ne kwingijisha bizhima. Kabiji naubanga bintu byatama bingi ne bulalelale.

Bamo bakumbwanga bingi bwikalo bwami mambo bamonanga’mba najinga na lusekelo. Bino mu muchima kechi naikalanga na lusekelo ne, kikatakata inge nashala bunke. Napopomenwanga bingi ne kwikala na bijikila. Ne kyakijilemo kutama, kimye kyo natumbalele bingi na nyimbo, bantu babiji pa bantu bamfyatwilangako nyimbo bafwile na kikola kya AIDS. Nakankamenetu. Nangwa kya kuba natemenwe kwimba nyimbo, bino bwikalo bo naikelenga na mambo a uno mwingilo kechi nebutemenwe ne.

Nangwa kya kuba nayile bingi nkuwa, nayukile’mba bintu mu ntanda byatama bingi. Neipuzhanga’mba, Mambo ka mu ntanda o mwavujila nshiji? Kabiji neipuzhanga ne ene mambo Lesa o atajilapotu kwa kubula kwingijilapo. Javula nalombanga kwi Lesa kuba’mba ankwashe kutaana mikumbu. Byo nakookolokelenga pa kufuma mu mapunzha mo nayile na kwimba nyimbo, natendekele kutanga Baibolo. Nangwa kya kuba kechi naumvwishishe bintu byavula ne, bino napwishishe mu muchima namba mpelo ya ino ntanda ijitu pepi.

Byo natangilenga Baibolo, nataaine kuba’mba pa kimye kimo Yesu waikele na nzala moba 40. (Mateo 4:1, 2) Nalangulukile’mba inge ne amiwa nauba bino, kampe Lesa po po akesolola mwine kwi amiwa. Onkao mambo, nasajile juba ja kutendeka kuzhikilwa na nzala. Byo kwashajiletu milungu ibiji kuba’mba ntendeke kuzhikilwa na nzala, Bakamonyi ba kwa Yehoba babiji baishile pa nzubo kabiji nebambijile kutwela mu nzubo ubatu nobe nebatengejilenga. Naalulukile ne kutala umo pa bano Bakamonyi baishile, aye Jacques kabiji namwipwizhe’mba, “Twakonsha kuyuka byepi amba tubena kwikala mu moba a kupelako a ino ntanda?” Pa kukumbula, wazhikwile Baibolo ne kutanga 2 Timoti 3:1-5. Bano Bakamonyi bonse babiji nebepwizhe mepuzho avula bingi kabiji naumvwine bingi bulongo byo bankumbwilenga bulongo, kabiji mikumbu yabo yonse yafuminenga mu Binembelo. Byo babweleleko javula, nafunjile kuba’mba kechi pajipo ene mambo o nafwainwa kuzhikilwanga na nzala ne.

Natendekele kufunda Baibolo na Bakamonyi. Mu kuya kwa kimye, natendekele nsuki yazamine bingi yo najinga nayo kabiji natendekele kupwila pa Nzubo ya Bufumu. Bantambwijile bingi bulongo ku kipwilo kabiji kino kyandengejile kushiinwa’mba nataana bukine. Pano bino, pa kuba’mba ñingijishenga byo nafunjilenga mu Baibolo, nafwainwe kupimpula bwikalo bwami. Kitanshi, nafwainwe kuleka kwingijisha bizhima ne bwikalo buncha. Kabiji nafwainwe kuleka kwitatu muchima amiwa mwine ne kutendeka kuta bakwetu muchima. Nangwa kya kuba kechi najinga na mukazhi ne, najinga na baana babiji bo nafwainwe kulama bulongo ne kwibafunjisha bukine. Onkao mambo, nalekele mwingilo wa kwimba nyimbo ne kutwela nkito ya kufola mali acheche pa kampanyi umo.

Kechi kyapelele kupimpula byubilo ne. Nebikileko kya kine kine kuleka kwingijisha bizhima, bino napitanga mu makatazho amo aishilengako mambo nebingijishe pa kimye kyabaya kabiji bimye bimo nakankalwanga kwikanya. (Loma 7:19, 21-24) Kabiji kyankatezhe bingi kuleka bwikalo bwa kupeela ku maulu. Kabiji nkito yo natwelele yankokeshanga bingi kabiji kufola tumali tucheche kwafichishanga ku muchima. Naingijile bañondo basatu pa kuba’mba ngikale na mali o nalengangatu mu maola abiji kimye kyo najinga nyimbi.

Milombelo yankwashishe bingi kupimpula byubilo byami. Kabiji kutanga Baibolo kimye kyonse nako kwankwashishe bingi. Kuji byepelo bimo byantundaikile bingi. Kyepelo kimo ke 2 Kolinda 7:1, kitundaika bena Kilishitu “[kwitokesha] ku bubipisho bonse bwa mubiji ne bwa mupashi.” Kinembelo kikwabo kyantekeneshe kuba’mba nakonsha kuleka byubilo byatama ke Filipai 4:13 paamba’mba: “Mambo bintu byonse nji na ngovu ya kwibyuba na mambo a yewa umpa bulume.” Yehoba Lesa wakumbwile milombelo yami kabiji wankwashishe kumvwisha bukine bwa mu Baibolo ne kulondela byo nafunjilenga mu Baibolo. Kino kyantundaikile kupana bumi bwami kwi aye. (1 Petelo 4:1, 2) Nabatizhiwe ne kwikala Kamonyi wa Yehoba mu 1997.

Nashiinwa kuba’mba inge natwajijile na bwikalo bwami bwa kala, inge nafwile kala. Luno mbena kwikala bwikalo bwa lusekelo. Kabiji Lesa wampesha pa kumpa mwinakwami aye Elvie. Lelo jino, twiyowa kwingila mwingilo wa kufunjisha bantu Baibolo byo tuji basapwishi ba Bufumu ba kimye kyonse. Uno mwingilo undetela bingi lusekelo. Namusanchila bingi Yehoba pa kunkokela kwi aye.—Yoano 6:44.