Bayuka’mba: Bakamonyi ba kwa Yehoba baitabila amba badokotala kechi bakonsha kukwasha muntu ne. Onkao mambo kechi bakeba kwibapa muchi amba bakose ne.

 Kishinka: Tukeba mashinda awama a kwitubukilamo pamo na bisemi byetu. Inge twakolwa tuya na kumona badokotala bayuka kubuka muntu kwakubula kumubika mashi. Tusanta bingi pa mashinda awama a kubukilamo bantu. Mashinda awama o babukilamo Bakamonyi bakolwa kwakubula kwibabika mashi, babena kwiengijisha kubukilamo bantu bakwabo. Mu byalo byavula bantu bakolwa basalapo kubula kwibabika mashi kuchinuzhuka bikola bisambukila kupichila mu mashi, bikokesha bukikizhi bwa mubiji ne makatazho akwabo.

 Bayuka’mba: Bakamonyi ba kwa Yehoba baitabila amba lwitabilo lo lupwisha bikola.

 Kishinka: Atweba kechi tulombelela muntu ne.

 Bayuka’mba: Kukana kwimubika mashi kwimulengela kutaya mali avula bingi.

 Kishinka: Mashinda a kubukilwamo kwa kubula kwimubika mashi alengela kubula kutaya mali avula. a

 Bayuka’mba: Bakamonyi bavula pamo na baana babo bafwa pa mwaka pa mwaka na mambo a kukana kwibabika mashi.

 Kishinka: Ke bubela bwine bufita. Badokotala babuka bantu baji na bikola byakatazha nabiji kikola kya muchima, bikola bya mu manungi ne longololo, nangwatu kupimpula bibese bya mu mubiji nabiji mafyo, kwakubula kubika mashi. b Bakamonyi pamo ne baana bo babuka kwakubula kwibabika mashi bakosatu bulongo kukila baswa kwibabika mashi. c Kafwako wakonsha kusumininwa kuba’mba muntu wakolwa wakonsha kufwa na mambo a kukana kumubika mashi nangwa wakonsha kukosa inge kya kuba waitaba kumubika mashi.

 Ke na mambo a bupopweshi bwabo, kechi na mambo a kukolwa nangwa misongo ne mashinda a kubukilwamo ne. Lulayañano lwa Kala ne Lupya lwakambizha kubula kuja mashi. (Ntendekelo 9:4; Bena Levi 17:10; Mpitulukilo ya mu mizhilo 12:23; Byubilo 15:​28, 29) Kabiji Lesa waambapo amba bumi buji mu mashi. (Bena Levi 17:14) Onkao mambo, tukana kwitubika mashi mambo twamunemeka Lesa Mpanyi wa bumi ne kumukokela.

 Bashayuka ba michi balangulukanga amba kwingijisha mashinda a kubukilwamo kwa kubula mashi ke kwipaya muntu. Pano luno bapimpula uno mulanguluko. Mu 2004, kibaaba kimo mu buku wa lufunjisho lwa pa bya michi kyaambilepo amba “mashinda avula o babena kubukilamo Bakamonyi ba kwa Yehoba bakolwa o o tukengijishanga ku bantu bonse mu kuya kwa moba.” d Buku mukwabo wa mu 2010 waambapo amba “mashinda a kubukilamo muntu kwakubula kumubika mashi kechi afwainwa kwingilangatu ku Bakamonyi ba kwa Yehoba bonka ne, bino afwainwa kwingilanga ku bonse bakolwa.” (Heart, Lung and Circulation)

 Badokotala bavula luno babena kwingijisha mashinda a kubikilamo bikola byakatazha kwakubula kubika mashi mu muntu wakolwa. Ano mashinda babena kwiengijisha ne mu byalo biyanji kabiji bantu bakolwa babula Bakamonyi ba kwa Yehoba babena kuswa kwibabuka kwingijisha onka ano mashinda.