Ee, Bakamonyi ba kwa Yehoba javula bakwasha bantu bafikilwa na malwa. Tukwasha Bakamonyi ne bantutu babula bakamonyi kwesakana na byambo biji mu Baibolo pa Ngalatiya 6:10 bya ku­ba’mba: “Twibobilenga bonse byawama, kikatakata bakwetu ba mu lwitabilo.” Kabiji tutekenesha bafikilwa na malwa ne kwisamba nabo byambo bya Lesa.​—2 Kolinda 1:​3, 4.

Umvwe malwa amweka, bakulumpe mu kipwilo baji mu mpunzha mwamwekela malwa besamba na bonse balongo mu bipwilo kumvwa inge bajitu bulongo nangwa inge kya kuba bakeba bukwasho. Kepo bano bakulumpe babula ofweshi wa musampi wa Bakamonyi ba kwa Yehoba byonse byo bamona nangwa kumvwa.

Umvwe bipwilo byakankalwa kukwasha bonse bafikilwa na malwa, jibumba jitangijila ja Bakamonyi ba kwa Yehoba jinengezha bintu byakajilwa bafikilwa na malwa. Kino kechi kyapusana na byaubile bena Kilishitu batanshi mu kimye kyajingako kipowe ne. Bakwashishe bakwabo. (1 Kolinda 16:​1-4) Ofweshi wa musampi uji mu mpunzha mwamwekela malwa utongola Tuvoto twa Bukwasho kukokozha ne kutangijila uno mwingilo. Bakamonyi ba mu mapunzha akwabo bepana kukwasha bakwabo kabiji bengijisha kimye kyabo ne bintu byo baji nabyo kukwashishamo bakwabo.​—Byambo bya Mana 17:⁠17.

Bupe bupana bakamonyi ba kwa Yehoba ku ofweshi wa musampi bwingila mingilo yavula ne kukwashishamo bantu bafikilwa na malwa. (Byubilo 11:​27-30; 2 Kolinda 8:​13-15) Bantu bengila uno mwingilo kechi bafola ne. Onkao mambo, mali o batuma ku mapunzha kwamweka malwa engilatu mwingilo ye beatumina kechi ku bintu bikwabo bisaka babena kutangijila mwingilo ne. Twingijisha bulongo nsabo yetu.​—2 Kolinda 8:⁠20.