Aba babatizhiwe ne kwikala Bakamonyi ba kwa Yehoba pano bino babujile kusapwilapo muntu nangwa balekele kupwanañana na bakwabo ba mu lwitabilo kechi twibachinuzhuka ne. Twibafwakesha ne kwibatundaika kuba’mba bekale jibiji na bulunda ne Lesa.

 Kechi tupanga mu kipwilo muntu yense walenga mambo akatampe ne. Nangwa byonkabyo, inge Kamonyi wabatizhiwa walala muzhilo wa mu Baibolo wabula kulapila, tuleka kupwanañana nanji nangwa kumupanga mu kipwilo. Baibolo wamba’mba: “Fumyai yewo muntu mubi mukachi kenu.”—1 Kolinda 5:13.

 Pano ibyepi inge muntu wapangiwa mu kipwilo pano bino mukazhi ne baana saka baji Bakamonyi bakwa Yehoba? Kukwatankana kwa ku mupashi ko ajinga nako na kisemi kupimpulwa, pano bino kukwatankana kwa ku mubiji kutwajijila. Masongola ne butemwe bitwajijila mu kisemi.

 Bapangiwa mu kipwilo bakonsha kutanwa ku kupwila kwetu. Inge bakeba bakonshatu ne kutambwila lujimuno ku bakulumpe mu kipwilo. Kine kintu kyo bobila bino ke kukeba kumukwasha kwikala jibiji Kamonyi wa kwa Yehoba. Bapangiwa mu kipwilo bakana byubilo byatama ne kulondela bipimo bya mu Baibolo babwela jibiji mu kipwilo.