Bakamonyi ba kwa Yehoba kechi basekelela moba a kusemwa ne, mambo kuba bino kufichisha Lesa ku muchima. Baibolo kechi wakanya kusekelela moba a kusemwa kya kushinkamika ne, pano bino muji bintu bitukwasha kuyuka Lesa byo amona kuba bino. Akimonai bino bishinka bina byalondelapo ne mafunde a mu Baibolo.

1. Kusekelela moba a kusemwa kwafuma ku bisho bya bantu babula kwakamwa Lesa. Buku wanembele Funk ne Wagnalls wa Standard Dictionary of Folklore, Mythology, and Legend, waamba’mba: Kuno kusekelela kwafuma ku lwitabilo lwa kuba’mba pa juba jasemenwe muntu “bapashi popo balukuka bantu babena kusekelela,” bino inge “balunda nanji bamupa bya bupe ne kumwambila byawama” kechi boba ne. Buku mukwabo wa The Lore of Birthdays waamba’mba, kala “juba ja kusemwa beingijishanga pa kwambila jimo bikamweka kulutwe” mu bya “buñanga bwa kwingijisha tubangabanga.” Uno yenka buku waamba ne kuba’mba: “Bantu baitabila’mba bambula tundulu na mulanguluko wa kuba’mba tulengela kumona byawama.”

   Baibolo wakanya bulozhi, binsensela, kubuka ne kupopwela mipashi ne “bintutu bikwabo byapasha bino.” (Mpitulukilo ya mu Mizhilo 18:14; Ngalatiya 5:19-21) Lesa washikilwe bantu bajinga mu muzhi wa Babilona wa kala mambo babukanga kwingijisha tubangabanga. (Isaya 47:11-​15) Bakamonyi ba kwa Yehoba kechi bakanatu byonse byafuma ku bya kishakulu ne, pano bino bakokela inge Binembelo byamwesha’mba kyatama.

2. Bena Kilishitu Batanshi Kechi Basekelelanga Moba a Kusemwa Ne. Buku wa World Book Encyclopedia waamba’mba, “bamonanga kusekelela moba kusemwa kuba’mba kwafuma ku bupopweshi bwa bubela.” Baibolo waamba kuba’mba batumwa ne baana ba bwanga bashijile bena Kilishitu bonse mwa kulondela mambo bebafunjishe kwi aye mwine Yesu.​—2 Tesalonika 3:6.

3. Bena Kilishitu bebakambizha kusekelelatu juba jimo, kechi ja kusemwa ne, bino ja lufu lwa kwa Yesu. (Luka 22:17-​20) Kechi twafwainwa kukumya pa kino ne, mambo Baibolo waamba’mba, “juba ja kufwa jawama kukila juba ja kusemwa.” (Musapwishi 7:1) Yesu byo afwile walengele jizhina jawama kwi Lesa. Kyo kyalengejile juba jo afwile kunema kukila juba jo asemenwe.​—Bahebelu 1:4.

4. Baibolo kechi Watongolapo Bapopweshi ba Lesa basekelelanga moba a kusemwa ne. Kechi amba balubileko kwibinemba mu Baibolo ne, mambo Baibolo muji mashimikila abiji aamba pa moba a kusemwa a bantu babulanga kwakamwa Lesa. Nangwa byonkabyo, byamwekele pa ano moba byatamine bingi.​—Ntendekelo 40:20-22; Mako 6:21-29.

Byonka biji bansemi bonse, Bakamonyi nabo batemwa bingi baana babo kabiji kimye kyonse mu mwaka bebapa bya bupe ne kunengezhapo bya kuja ne kusangalela pamo na baana babo. Besekesha bingi kulondela byuba Lesa upana bya bupe byonse byawama ku baana banji kimye kyonse. (Mateo 7:11) Baana ba Bakamonyi kechi bashalapo pa bintu byavula byo babula kusekelela moba a kusemwa ne. Byonka bene byo baambapo mu byambo byalondelapo:

• “Sangalala bingi inge bampa bupe bonakubula kuketekela.”​—Tammy, uji na myaka 12.

• “Bansemi bami kechi bampa bya bupe pa juba jo nasemekejilwe ne, pano bino bampa bya bupe mobatu akwabo. Kino kisangajika bingi mambo kechi nketekela buno bupe ne.”​—Gregory, uji na myaka 11.

• “Nanchi kijiilo kilumbulula kwikalatu kakimye kacheche, na kuja tukajo twatobala ne nyimbo nyi? Mukeye ku nzubo kwetu mukemwene kijiilo byo kyafwainwa kwikala.”​—Eric, uji na myaka itanu na umo.