Ee. Muntu wakonsha kufuukulapo kuleka kwikala wa mu jibumba jetu mu mashinda abiji:

• Aye mwine kwamba. Muntu wakonsha kwamba aye mwine pa kanwa nangwa kunemba nkalata kuba’mba waleka kwikala Kamonyi wa kwa Yehoba.

• Byubilo. Muntu wakonsha kuba bintu bibena kumwesha’mba kechi ukeba kutwajijila kwikala Kamonyi wa kwa Yehoba ne. (1 Petelo 5:9) Kampe wakonsha kutendeka kupwila mu bupopweshi bungi ne kwamba’mba usakutwajijila na buno bupopweshi.​—1 Yoano 2:19.

Kechi byo byo tumumona ne. Kukooka ku mupashi kechi kulumbulula’mba muntu waleka kwikala Kamonyi wa Yehoba ne. Javula, bantu bakooka ku mupashi nangwa baleka kupwila kechi kilumbulula’mba basankilapo lwitabilo lwabo ne, bino balefulwatu. Mu kifulo kya kuleka kupwanañana na bantu ba uno mutundu, twafwainwa kwibatundaikanga ne kwibakosesha. (1 Tesalonika 5:14; Yuda 22) Umvwe muntu ubena kukebewa kumukwasha, bakulumpe mu kipwilo bakwasha boba bakooka ku mupashi.​—Ngalatiya 6:1; 1 Petelo 5:1-3.

Nangwa byonkabyo, bakulumpe mu kipwilo kechi baji na luusa lwa kukanjikizha muntu kutwajijila kwikala Kamonyi wa kwa Yehoba ne. Muntu mwine wafwainwa kwisajilapo bupopweshi bo akeba. (Yoshua 24:15) Twaitabila kuba’mba bantu bapopwela Lesa bafwainwa kwifuukwilapo abo bena kufuma panshi ya muchima.​—Salamo 110:3; Mateo 22:37.