Bañanyi Batendekele?
Jibumba ja Yehoba ja lelo jino jatendekele ku mpelo ya myaka kitota kya bu 19. Pa kyokya kimye kajibumba kacheche ka Bafunda Baibolo kaikalanga kwipi na Pittsburgh, ku Pennsylvania, mu United States, ko katendekele kupesapesa bya mu Baibolo. Kaesakenyenga mafunjisho a mu machechi na bifunjisha Baibolo. Katendekele kunemba ne kusampanya byo bafundanga mu mabuku, mapepala a byambo, ne mu Kyamba kya Usopa—Kibena Kubijika Bufumu bwa Yehoba.
Pa ba mu kano kajibumba ka Bafunda Baibolo pajinga ne Charles Taze Russell. Nangwa kya kuba Russell ye watangijilanga mwingilo wa kufunjisha pa kyokya kimye kabiji ye wajinga mutanshi kunemba Kyamba kya Usopa, kechi ye watendekele bobwa bupopweshi.Russell ne bakwabo ba mu jibumba ja Bafunda Baibolo, bajinga na kikonkwanyi kya kutundaika mafunjisho a kwa Yesu Kilishitu ne kulondela byaubiwanga mu kipwilo kya bena Kilishitu batanshi. Byo kiji kuba’mba Yesu ye watendekeshe bwina Kilishitu, tumumona kuba’mba ye watendekeshe ne jino jibumba jetu.—Kolose 1:18-20.