Nakomejile mu muzhi wa Tampere mwabujile kiwowo mu kyalo kya Finland. Kisemi kyami kechi kyateleko bingi muchima ku bya bupopweshi ne bino kyanemekele kufunda ne kwikala na byubilo byawama. Ba mama baku Germany, byo najinga mwanyike, kimo kimye nayanga ku Muzhika wa Germany kwaikalanga ba nkambo.

Natemenwe bingi makayo kufumatu ku bwanyike bwami. Byo nanjinga mwanyike, nakayanga makayo onse akosesha mubiji, bino byo nafikizhe myaka 14, nasajilepo mpila ya tenesi. Byo nafikizhe myaka 16, bamfunjishanga ku bashenyenye jibiji nangwa jisatu pa juba apa bino nashala na kupitulukamo bunke bwami mabanga. Natemenwe bingi pa kuyuka bintu byapusanapusana byavwangwamo mu ino mpila, kupama ino mpila kukebewa kulanguluka ne kwingijisha bulume. Nangwa kya kuba naumvwanga bulongo kupwanañana na balunda nami ne kutomena pamo maalwa bimye bimo, bino kechi natainwepo mu lukatazho na mambo a kwingijisha bizhima nangwa kutoma maalwa ne. Natemenwe bingi ino mpila kabiji kyo kintu kyo nanemekele bingi mu bwikalo bwami.

Byo na fikizhe myaka 17, natendekele kupama mpila ya kwikyombesha yanengezhanga kipamo kya ATP a. Byo na kyombeshe bantu bavula, nayile bingi nkuwa mu byalo byapusana-pusana. Byo nafikizhe myaka 22, najinga pa bantu 50 bayukile bulongo bya kupama ino mpila mwaya ntanda yonse.

Pa myaka yavula, nayanga mu byalo byapusana-pusana na kupama ino mpila. Namonanga mapunzha awama bingi, bino namonanga ne makatazho apitamo bantu mwaya ntanda yonse, nabiji bumbanzhi, kwingijisha bizhima ne kubula kulamatu bulongo ntanda. Byo twajinga ku United States, betukainye kuya na kufwakasha ku mapunzha amo mambo kwavujile bingi bumbanzhi. Bino byonse byanzhingijishanga bingi. Nangwa kya kuba naubanga kintu kyo natemenwe, pano bino, kafwako kyo namwenejilemo ne.

Nsongwakazhi ye natemenwe aye Sanna, watendekele kufunda Baibolo na Bakamonyi ba kwa Yehoba. Kechi naumvwine bulongo byo namwene kuba’mba watako muchima ku bya bupopweshi ne, pano bino, kechi najinga na luusa lwa kumukanya kufunda ne. Twisongwele mu 1990, bino wabatizhiwe ne kwikala Kamonyi ba kwa Yehoba mwaka walondejilepo. Amiwa kechi nateleko muchima ku bya bupopweshi ne, bino naswile kuba’mba Lesa koaji. Navulukanga kuba’mba ba nkambo ba ku Germany batanganga Baibolo javula, kabiji bamfujishe ne kulomba.

Juba jimo, byo twayile na kufwakasha na ba Sanna, amiwa ne kisemi kimo kya Bakamonyi, bamwatawabo abo ba Kari, bamwesheshe bungauzhi bwa mu Baibolo bwaamba pa “moba a kupelako.” (2 Timoti 3:1-5) Naumvwine bingi bulongo kuyuka kino kishinka, kabiji kyandengejile ne kumvwisha ene mambo bubi kyo bwavujila mu ntanda. Pa joja juba, kechi twisambile kimye kyabaya pa bya bupopweshi ne. Kufumatu kyonkakya kimye, natendekele kufunda Baibolo na ba Kari, kabiji byonse byo nafunjile byamfikile bingi pa muchima. Na mambo a kuba’mba napayankene bingi mu bwikalo kabiji naendaga bingi kino kyandengelanga kubula kufunda javula, pano bino ba Kari kechi balekele kumfunjisha ne. Bandembelangatu makalata pa kukumbula mepuzho o nebepuzhanga kimye kyo twafundanga. Mepuzho onse o najinga nao beakumbwile kwingijisha Baibolo, kabiji pachepache, natendekele kuyuka kishina kine kyo aambapo kya kuba’mba Bufumu bwa Lesa bukafikizha kyaswa muchima wa Lesa. Kuyuka jizhina ja Lesa, Yehoba, ne kumona byo etulengela byandetejile bingi lusekelo. (Salamo 83:18) Kintu kyamfikile bingi pa muchima ke bupe bwa kitapisho kya bukuzhi, mambo kimwesha butemwe bwa Lesa. (Yoano 3:16) Kabiji nafunjile kuba’mba ne amiwa nakonsha kwikala mulunda na Lesa ne kwikala na bumi bwa myaka ne myaka mu paladisa wa mutende. (Yakoba 4:8) Natendekele kwiipwizha amiwa mwine’mba, “Nakonsha kumwesha byepi lusanchilo?”

Nalangulukilepo bingi pa bwikalo bwami byo bwajinga. Nafunjile mu Baibolo kuba’mba lusekelo lukatampe lufuma mu kupana, kabiji nafuukwilepo kubuulako bakwetu bintu byo naitabilamo. (Byubilo 20:35) Na mambo a kuba’mba najinga shenyenye mu ino mpila, moba 200 mu mwaka kechi natanwanga pa nzubo ne, na mambo a kuba’mba nayanga na kwikyombesha na bakwetu. Bwikalo bwa kisemi kyetu bonse bwaimenejile pe amiwa, onkao mambo, bantundaikanga kutwajijila kufunda bya kupama ino mpila mambo mo mo twamwenanga bya mu bwikalo. Pano bino, namwene kuba’mba nafwainwe kupimpula bwikalo bwami.

Nayukile’mba kuleka kukaya ano makayo na mambo a bya bupopweshi kukalengela bavula kubula kuswa byo nafuukwilepo. Pano bino, kuyuka Yehoba ne kwikala na bumi bwa myaka ne myaka byo bintu byanemene kukila kukyombesha bantu mu mpila ya tenesi, onkao mambo, kechi kyankatezhe kufuukulapo bya kuba ne. Napwishishe mu muchima namba kechi nkatako muchima ku bintu byo bakambanga bantu na mambo a bintu byo nkafuukulapo ne. Kinembelo kya mu Baibolo kyantundaikile kuchinchika ke Salamo 118:6. Paamba’mba: “Yehoba uji ne amiwa; kechi nkachina ne. Muntu angube ka?”

Pa kikye kimye bamo bepaine kuba’mba bakampaina byonse bikebewa pa kuba’mba nkekyombeshenga na bakwetu pa myaka yavula kwakubula kwakamwa ne. Na mambo a kuba’mba nafuukwilepo kala bya kuba, nakaine byonse byo bakebelenga kungubila kabiji nalekele ne kupama mpila ya kwikyombesha itelwa’mba ATP. Natwajijile kufunda Baibolo, kabiji nabatizhiwe ne kwikala Kamonyi wa Yehoba pa 2 July, 1994.

Kechi napichilepo mu lukatazho lukatampe lwandengejile kutendeka kulanguluka pe Lesa ne. Kabiji kechi nalangulukangapo’mba nkakebanga kufunda bukine ne. Namonanga’mba bwikalo bwami bwajingatu bulongo kabiji kafwako kintu kikwabo kyo nakebanga ne. Pano bino, kyajingatu nobe bukine bwampembejilenga’mba nebutaane, nafunjile kuba’mba kuji ene mambo o naikela na bumi kabiji bwikalo bwami bwawama bingi kukila ne byo nalangulukanga. Kisemi kyetu kyakwatankana bingi kukila kala. Kabiji nji bingi na lusekelo mambo baana bami babalume basatu balondela mu ngayo yami ne kwikala bena Kilishitu, kechi kwikala bashenyenye mu bya makayo ne.

Ne luno ñumvwa bingi bulongo kupama mpila ya tenesi. Myaka yonse yapitapo mmwena ba mu kisemi bikebewa kupichila mu kwingilako mingilo imo nabiji kufunjisha bantu bya kupama mpila ya tenesi kabiji yami mukulumpe utala pa mpunzha pa kupamina ino mpila. Pano bino, mu bwikalo bwami kechi natatu muchima pa makayo ne. Kala nafundanga maola avula bingi pa mulungu pa mulungu pa kuba’mba ngikale shenyenye mu ino mpila. Pano luno byonji mu mwingilo wa kimye kyonse ñumvwa bingi bulongo kwingijisha kimye kyami kukwasha bantu kufunda mafunde a mu Baibolo apimpwile bwikalo bwami ne kwiengijisha. Kabiji nji bingi na lusekelo na mambo a kuta muchima pa kukosesha bulunda bwami ne Yehoba Lesa ne kubulako ba bantu bakwabo pa luketekelo lo nji nalo lwa bwikalo bwawama bwa kulutwe.—1 Timoti 6:19.