Mweno yetu ya kufunda yaimena pa mafunde a mu Baibolo. Kamonyi yense wingijisha jiwi janji ja mu muchima jo afunjisha na Baibolo pa kuba’mba ayuke bya kwingijisha mafunde a Lesa mu bino bintu byalondelapo. a

• Kufunda kwanema bingi

• Twafwainwa kwikala na ndangulukilo yawama pa kufunda

• Kuya na kufunda ku masukulu akatampe kwakonsha kulengela muntu kwikala na byubilo byatama ne konauna bulunda bwanji na Lesa

• Nanchi Bakamonyi ba kwa Yehoba baji na masukulu banyike a pa mulungu nyi?

Kufunda kukwasha muntu kwikala na “maana alumbuluka ne maana a kupima bintu,” kabiji Baibolo waambapo bingi pa ano maana. (Byambo bya Maana 2:10, 11; 3:21, 22) Kabiji Yesu watundaikile baana banji ba bwanga kwikala bafunjishi ba bintu byo akambizhe. (Mateo 28:19, 20) Onkao mambo, tutundaika bonse mu kipwilo kufunda, nabiji kufunda kutanga, kunemba, ne mashinda a kumvwañenamo, b kubikapotu ne kuyuka biji bupopweshi bwapusana pusana ne bisho.​—1 Kolinda 9:20-22; 1 Timoti 4:13.

Makafulumende nao ayuka buneme bwa kufunda kabiji javula akeba kuba’mba banyike bafunde kutendekela ku masukulu a banyike kufika ne ku sekondale. Tukookela ino mizhilo kwesakana na mukambizho wa kuba’mba: “Muntu yense akookelenga bakulumpe balama kyalo,” nangwa’mba makafulumende. (Loma 13:1) Kunungapo, tutundaika baana betu kutako muchima ku sukulu pa kuba’mba bobenga bulongo, kechi kufundatu kya byonkabya ne. c Byonka byaamba Mambo a Lesa amba: “Byonse byo muba, nangwa ki ka, nangwa ki ka, ubai na muchima yense, nobe kwi Nkambo, kechi ku bantu ne.”—Kolose 3:23, Buku wa Lesa.

Kufunda kwitukwasha kukebela bisemi byetu bintu bya mu bwikalo. Baibolo waamba’mba “umvwe muntu kechi wibakebela bintu aba bo alama kikatakata ba mu nzubo yanji mwine ne, wilukana lwitabilo kabiji watama kukila yewa wabula kwitabila.” (1 Timoti 5:8) Kufunda sukulu kwakonsha kwitukwasha kwingila mwingilo witupa Lesa wa kukwasha bisemi byetu. Buku umo waamba’mba kine kintu kyo kwaikela masukulu ke “kukwasha bantu kwingila mingilo . . . ileta bukomo mu ntanda.” (The World Book Encyclopedia) Muntu wafunda, wayuka mingilo kimupelela kukebela ba mu kisemi kyanji bintu bya mu bwikalo kukila muntu wabula kufundakotu nangwa pacheche.​—Byambo bya Maana 22:29.

Bansemi nabo bakebela baana babo bintu bya mu bwikalo kupichila mu kwibafunjisha bya kwikala inge bakoma, kino kyavwangamo ne kwibatwala ku sukulu. (2 Kolinda 12:14) Tutundaika bansemi kutwala baana ku sukulu nangwa kya kuba bekala ku mapunzha kwabula masukulu atutu, nangwa ko kyakatazha bingi kufunjisha baana, nangwa kuji bisho bibula kutundaika baana kufunda. d Kabiji tubuulako ne bansemi mashinda amo o bakonsha kukwashishamo baana babo kufunda. e

Twafwainwa kusala bulongo bintu bya kufunda. Baibolo waamba’mba: “Muntu wabula kuyuka bintu ye kitabilambijinga, bino muntu wajimuka ulangulukishapo pa bintu byo oba.” (Byambo bya Maana 14:15) Twingijisha jino jifunde kupichila mu kusala bulongo bintu byafwainwa kufunda muntu inge wapwisha sekondale, ne kumona mali akataiwapo. Nabiji kufunda mingilo ya kwiingijila mwine muntu kwawama bingi kabiji kechi pataiwa mali avula ne.

Kufunda bya Lesa kwanema kukila kufunda sukulu wa ku ntanda. Kupusanako na masukulu a ku ntanda, kufunda Mambo a Lesa kukwasha bantu kuyuka Lesa ne kwikala na luketekelo lwa bumi bwa myaka. (Yoano 17:3) Kabiji kufunda Mambo a Lesa kukwasha bantu kwikala na byubilo byawama, ne kuyuka mwatala “bololoke ne bunchibamambo bwaoloka ne kubula misalululo, ne mashinda onse a bintu byawama.” (Byambo bya Maana 2:9) Bintu byafunjile mutumwa Paulo byaesakana pamo na kuya ku masukulu akatampe ano moba (university), pano bino, wayukile “kuwama kwine kwa kuyuka Kilishitu Yesu Nkambo.” (Filipai 3:8; Byubilo 22:3) Ne lelo jino, Bakamonyi ba kwa Yehoba bavula bafunda masukulu, pano bino, bataana kuba’mba kufunda pe Lesa kwakilamo kuwama. f

Baibolo waamba’mba: “Muntu wajimuka umona bileta malwa kabiji ufyama.” (Byambo bya Maana 22:3) Bakamonyi ba kwa Yehoba bamona kuba’mba bwikalo pa masukulu akatampe amo kulengela bantu kwikala na byubilo byatama ne konauna bulunda bwabo na Lesa. Na mambo a kino, Bakamonyi bavula bafuukulapo kubula kwibika abo bene nangwa baana babo mu kizumba. Bamona kuba’mba pa masukulu akatampe avula batundaika milanguluko imo yabula kuyilamo nabiji ino:

• Mulanguluko wabula kuyilamo: Mali o aleta lusekelo ne luzhikijilo

  Bantu bamba’mba inge muntu wafunda kufika palepa, utwela nkito ya kufola muzema wa mali, onkao mambo, bavula baya ku masukulu akatampe na mulanguluko wa kuba’mba bakekale na mali avula. Bamo balanguluka’mba mali akebaletela lusekelo ne luzhikijilo, pano bino, Baibolo waamba’mba kwikala na mali kechi ko kuleta lusekelo ne. (Musapwishi 5:10) Kyakilamo kunema, Baibolo ufunjisha kuba’mba “kutemwa mali ye muzhazhi wa misango yonse ya bubi, kabiji bamo na mambo a kwiakebesha ebasendula mu lwitabilo.” (1 Timoti 6:10) Bakamonyi ba kwa Yehoba bebikako bingi kuchinuzhuka kufwa mu kitewa kya “bulume bwa bujimbijimbi buji na bunonshi.”​—Mateo 13:22.

• Mulanguluko wabula kuyilamo: Kufunda masukulu a peulu kulengela muntu kutumbalala

  Kiloolo wa kafulumende wa Georgia aye Nika Gilauri wanembele pa bilanguluka bantu mu kyalo kyabo amba: “Mu Georgia inge muntu waya na kufunda pa sukulu mwine mukatampe ko kuba’mba wanemekwa bingi. . . . Inge banyike babula kufunda kufika palepa, baletela bisemi byabo myendeleko.” g Pakuba Baibolo witukambizha kuchinuzhuka kukeba kutumbalala mu ino ntanda. Kimye kyo ajinga pano pa ntanda, Yesu wabuujile bantangi ba bupopweshi bekebejilenga lukumo amba: “Mwakonsha kwitabila byepi, byo mwinemeka anwe bene na bene, ne byo mubula kukeba lukumo lufuma kwi Lesa yenka umotu?” (Yoano 5:44) Kufunda kufika palepa javula kulengela bantu kwikala na kyubilo kya bwitote kyashikwa Lesa.​—Byambo bya Maana 6:16, 17; 1 Petelo 5:5.

• Mulanguluko wabula kuyilamo: Muntu yense wafwainwa kwisajila mwine kyawama ne kyatama

  Bakamonyi ba kwa Yehoba balondela mizhilo ya Lesa ya kyawama ne kyatama. (Isaya 5:​20) Nangwa byonkabyo, kibaaba kyo banembele mu buku umo kyalumbulwile’mba pa masukulu akatampe avula baana ba sukulu bebakanjikizha kuba bintu byuba bakwabo kabiji kino kibalengela “kufuukula bintu byapusana na mizhilo yo bayuka ya kyatama ne kyawama.” h (Journal of Alcohol and Drug Education) Kino kyakwatankana na jifunde ja mu Baibolo ja kuba’mba: “Kupwanañana na babi konauna byubilo byawama.” (1 Kolinda 15:33) Pa masukulu akatampe pobiwa byubilo byakanya Baibolo, nabiji kupendwapendwa, kwingijisha bizhima, ne bulalelale, kabiji bino byubilo bitundaikwa bingi.​—1 Kolinda 6:9, 10; 2 Kolinda 7:1.

• Mulanguluko wabula kuyilamo: Kufunda kufika palepa ko kukwasha bantu kuwamisha ntanda

  Twayuka kuba’mba bantu bavula kechi bakeba kufunda kufika palepa pa kuba’mba bekale na bunonshi, batumbalale nangwa kwisangajikatu ne, bino bakeba kwikala bwikalo bwawama ne kuwamisha bintu mu ntanda. Kwibikila bino bikonkwanyi kechi kwatama ne, pano bino, Bakamonyi ba kwa Yehoba basalapo kuba byapusanako. Byonka byaubile Yesu, twayuka kuba’mba Bufumu bwa Lesa bo bonkatu bakawamisha ino ntanda. (Mateo 6:9, 10) Pano bino, kechi twikalatu na kupembelela kuba’mba Bufumu bukeye kupwisha makatazho a mu ntanda ne. Byonka byaubile Yesu, ne atweba tusapwila “mambo awama a Bufumu” pano pa ntanda ponse, kabiji pa mwaka pa mwaka, tukwasha bantu bavula bingi kupimpula byubilo byabo ne kwikala na byubilo byawama. i—Mateo 24:14.