Bakamonyi ba kwa Yehoba baji na mutanchi wa kufunjisha Baibolo mo bakumbula mepuzho avula, kubikapotu ne ano:

• Lesa ye Ñanyi?

• Nanchi Lesa wanta muchima nyi?

• Nakonsha kuba byepi pa kuba’mba masongola ami awame?

• Nakonsha kwikala byepi na lusekelo mu bwikalo bwami?

Apano musakutana mikumbu ku mepuzho epuzha bantu javula pa mutanchi wetu wa kufunjisha Baibolo.

Uji byepi uno mutanchi wa kufunjisha? Tufunjisha pa mitwe nabiji ya kuba’mba “Lesa” nangwa “masongola” ne kupesapesa byepelo bya mu Baibolo byapusana pusana byamba pa ye o mutwe. Kupichila mu kwesakanya byepelo, tutana Baibolo yense byo aamba pa yeo mutwe ne kulondela byo yaamba.

Pa kwitukwashako kufunjisha Baibolo, twingijisha buku wa kuba’mba Nanchi Baibolo Kine Ufunjisha’mba Ka? Uno buku waamba pa Baibolo byo yaamba pe Lesa, Yesu ne pa kimye kyetu kya kulutwe.

Balipilisha anga pa kufunjisha Lufunjisho lwa Baibolo? Luno lufunjisho lwatu, kabiji kechi bapotesha mabuku a kufundamo ne.

Lufunjisho lusenda kimye kyalepa byepi? Bavula pa kufunda Baibolo ne atweba bafundatu pa ola umo pa mulungu pa mulungu. Bino lufunjisho kechi lwalepa ne. Tukalondela monka mwayila mutanchi wa kimye kyenu anweba bene.

Kikala byepi umvwe nalomba lufunjisho lwa Baibolo? Umvwe mwalomba lufunjisho lwa Baibolo, umo wa Bakamonyi ba kwa Yehoba ukemufwakashisha pa mpunzha ne kimye kyo mwakeba anweba bene. Kwakubula nangwa kutaya kimye ne ukemumwesha biji mutanchi wetu wa lufunjisho. Umvwe mwakeba mwakonsha kutwajijila na kufunda.

Umvwe naswa kufunda Baibolo, nanchi nafwainwa kwikala Kamonyi wa kwa Yehoba nyi? Ine. Bakamonyi ba kwa Yehoba batemwa kufunjisha bantu bya mu Baibolo, bino kechi tukanjikizha bantu kwiya mu bupopweshi bwetu ne. Tubula bantu byonka byaamba Baibolo, saka twayuka kuba’mba muntu mwine ye uji na lūsa lwa kusalapo mwine kyo akeba kwitabilamo.​—1 Petelo 3:⁠15.