Bayuka’mba: Bakamonyi ba kwa Yehoba kechi baitabila mwi Yesu ne, o ene mambo o babujila kusekelela kusemwa kwanji.

 Kishinka: Atweba twi bena Kilishitu. Twaketekela amba lupulukilo lwishila mwi Yesu Kilishitu.​—Byubilo 4:⁠12.

 Bayuka’mba: Bakamonyi ba kwa Yehoba balengela bisemi kubula kukwatankana na mambo a byo bafunjisha. Bafunjisha bisemi kubula kusekelela kusemwa kwa kwa Yesu.

 Kishinka: Twatako bingi muchima ku bisemi byetu. Tufunjisha bantu kukosesha bisemi byabo kupichila mu Baibolo.

 Bayuka’mba: Bakamonyi ba kwa Yehoba kechi bapana bya bupe byonka byuba bakwabo ne kwikala mu mutende na bantu bonse nangwa kukwasha bantu mwaya ntanda pa juba “Jasemenwe Yesu” ne.

 Kishinka: Tuji na muchima wa bumpanyi kabiji twibikako bingi kwikala mu mutende na bantu bonse. (Byambo bya Mana 11:25; Loma 12:18) Tulondela byaambile Yesu pa mambo a kupopwela ne kusapwila. Waambile’mba: “Mwatambwiletu byatu, ne anweba panaitu kyatu.” (Mateo 10:8) Kabiji tusapwila amba Bufumu bwa Lesa bo bonkatu bo twafwainwa kuketekela amba bukaleta mutende pano pa ntanda.—Mateo 10:7.

•   Yesu wakambizhe’mba twafwainwa kuvulukanga lufu lwanji kechi kusemwa kwanji ne.​—Luka 22:​19, 20.

•   Batumwa ba kwa Yesu nangwa baana banji ba bwanga batanshi kechi basekelelanga kusemwa kwanji ne. “Kusekelela kusemwa kwa kwa Yesu kwatatwile mu mwaka wa 243 [C.E.],” saka papita myaka 100 kufuma papwijile batumwa bonse kufwa.

•   Bishinka po biji bimwesha amba Yesu kechi wasemenwe pa 25 Kuvumbi ne. Juba jo asemenwe kechi bejitongolapo mu Baibolo ne.

•   Twaitabila amba Lesa kechi waitabizha kusekelela kusemwa kwa kwa Yesu ne, mambo kwaimena pa bisho bya bantu babula kupopwela Lesa.​—2 Kolinda 6:⁠17.

 Bantu bavula bakisekelela kusemwa kwa kwa Yesu nangwa kya kuba bayuka amba kuno kusekelela kwatatwilwe na bantu babulanga kupopwela Lesa kabiji Baibolo kechi ufunjisha kino ne. Bano bantu batemwa kushikisha’mba: Mambo ka bena Kilishitu bamo o babujila kusekelela kusemwa kwa kwa Yesu byonka byuba bavula? Nanchi kino kyakonsha kwikala ke mambo nyi?

 Baibolo witukwasha pa muntu pa muntu kulanguluka bulongo, kupichila mu kwingijisha ‘bulume bwa kulanguluka.’ (Loma 12:​1, 2) Witufunjisha kunemeka bukine. (Yoano 4:​23, 24) Kijitu bulongo kuyuka bakwetu byo betumona. Bino twafwainwa kulondelanga mafunde a mu Baibolo nangwa kya kuba etukanya kuba bintu byuba bavula.

 Nangwa kya kuba twafuukulapo kubula kusekelela kusemwa kwa kwa Yesu, twanemeka luusa luji na muntu lwa kwifuukwila mwine kusekelelanga nangwa ne. Kechi tubuula muntu kubula kusekelela inge kya kuba mwine wafuukulapo kwikyuba ne.