Bakamonyi ba kwa Yehoba batanu na bana ba mu Australia bebapele bipepala bya kwi basanchila na mambo “mwingilo wawama ye baingijilenga” wa kukwasha bantu bo bajinga mu Australia mukaleya ka Immigration Detention Centre. Bakamonyi bebapele kilambu ku kipamo kya Curtin Immigration Detention Centre kwipi na ku Derby, ku muzhika wa Australia. a

Pa mulungu pa mulungu, Bakamonyi bayanga na kupempula bantu bo bakwachile ne kumvwa bintu byo bapichilengamo ne kwisamba nabo byambo bya mu Baibolo bya kwibatekenesha ne kwibalengela kwikala na luketekelo. Ba Christopher Riddoch bengila ku ofweshi utala pa bupopweshi ne bya kisho baambile’mba: “Ba mu kino kipamo baumvwanga bingi bulongo pa kumona Bakamonyi byo baiyanga na kwibapempula.” Waambile ne kuba’mba bo bakwachile batendekele kumvwa bingi bulongo ne kwikala na lusekelo byo bebapempulanga. Kabiji kino kyalengejile bano bantu “kuyuka kuba’mba kuji bantu bebata muchima.”

Ba Riddoch baambile ne kuba’mba bino bipepala byo bebapele Bakamonyi byamwesheshe byo bebasanchijile pa byo baubilenga, “mambo bakwashishenga bano banabalume bo bakwachile.” Banungilepo’mba: Bakamonyi “ke bakumwenako bisemi byavula, bipwilo ne mu lwitabilo.”