Bantu mwaya ntanda babena kumwenamo bingi mu biji pa jw.org. Panshipo paji byambo byaambile bamo bayishile na kufwakasha ku ofweshi wa ntanda yonse wa Bakamonyi ba kwa Yehoba mu May mu 2014.

“Mwanami jonse pa kufuma kusukulu, waiyanga na mapezulu, twakukaisha ne malole a pa meso a bakwabo. Twaesekele bingi kumukwasha kuba’mba byo oba ke bwivi ne kumubula kuba’mba kwiba kwatama. Bino kechi waumvwine ne, kufikatu ne kimye kyo twakopolwele vidyo pa jw.org wa kuba’mba, Kwiba Kwatama. Uno vidyo wamukwashishe bingi mwanetu. Panyuma ya kutamba uno vidyo, wafuukwilepo kubwezha byonse bintu bya bakwabo byo asendanga mambo wayukile kuba’mba Lesa washikwa bwivi. Uno vidyo uji pa keyala wa jw.org witukwasha bingi.”​—D. N., Africa.

“Baana bami batemwa bingi uno keyala. Bakopolola mavidyo epi atanwapo ebakwasha kulondela mafunde a mu Baibolo amba pa bubela ne bwivi. Bafunda ne bya kwikala na byubilo byawama mu bwikalo bwabo bonse. Onkao mambo, wibakwasha kukekala bantu bawama mu manyaunda mo bakekala.”​—O. W., West Indies.

“Namonanga sukulu nobe kisendwa bingi, kabiji nakebanga kuleka sukulu. Bino juba jimo, natangile mutwe wa kuba’mba, ‘Nanchi Nafwainwa Kuleka Sukulu Nyi?’ pa keyala wetu wa jw.org. Uno mutwe wankwashishe kutendeka kumona sukulu mu jishinda jafwainwa. Kabiji uno mutwe wankwashishe kuyuka kuba’mba kuya ku sukulu kukankwasha kufunda byavula ne kunkwasha kwikala muntu wafwainwa.”​—N. F., Africa.

“Lujimuno lo bajimunako bakyanyike luji pa uno keyala lwandengela kwikala na byubilo byawama. Nafunda kutako muchima kimye byo mbena kufunda kwa kubula kulabikwa.”​—G., Africa.

“Mukwetu mo twingijila wijizhanyanga kuba’mba mwananji wa mukazhi bamuyanjishanga bingi ku sukulu ku mukwabo kashimbi. Kino kyalengejile mwananji kwikala na moyo bingi ne kwikileka kuya ku sukulu pa moba amo. Nesambile na uno mukwetu motwingijila pa vidyo wa kuba’mba Beat a Bully Without Using Your Fists (Kupuma Wakanwa kwa Kubula Kutaya Binkonyi), uji pa jw.org. Watemenwe bingi lujimuno luji mu vidyo waamba pa bya kupwisha luno lukatazho mu jishinda jafwainwa. Wisambile na mwananji byo akonsha kuba na luno lukatazho. Kino kyalengela mwananji kutendeka kuya ku sukulu kwa kubula moyo. Pa kupitapo kimye, bintu byaalukile, awa kashimbi wamukatazhanga waikele mulunda nanji.”​—V. K., Eastern Europe.

“Nasanta bingi pa mutwe wa kuba’mba, ‘Why Do I Cut Myself?’ (Mambo ka o Nechibawila Amiwa Mwine?) uji pa jw.org. Luno lo lukatazho lwankatazha bingi kushinda pa kimye kyabaya. Nalangulukanga kuba’mba yami yenkatu uji na luno lukatazho ne kuba’mba umvwe nabula muntu kechi wakonsha kumvwa ne. Byo banemba mu uno mutwe bya nkwasha bingi. Pano luno natana uñumvwisha!”​—Nsongwakazhi ku Australia.

“Keyala wa jw.org wankwasha kutana byambo byakukwasha bakyanyike na makatazho o babena kupitamo. Mutwe umo wankwashishe bya kuyuka bankende, ne kumona kuba’mba kechi bantola kyangwa ne, kabiji nayukile ne bya kuba na bantu ba uno mutundu.”​—T. W., West Indies.

“Mwanami wamulume wazhikwa bingi. Kupapala kwanji kundengela kwakamwa bingi. Kabiji kitukatazha kwisamba nanji. Juba jimo, nayile pa jw.org, kabiji nayile po banemba’mba byakukwasha baji mu masongola ne bansemi. Nataine mitwe yavula yaamba pa lukatazho lo najinga nalo kabiji ino mitwe yankwashishe kuyuka bya kwisamba na uno mwanami wamulume. Naye mwanami wamwenamo bingi mu biji pa uno keyala. Luno wankasulukila, umbula byonse byo atemwa ne bimukatazha.”​—C. B., Africa.

“Atweba bansemi keyala wa jw.org witukwasha kufunjisha baana betu mu jishinda ja kuba nobe tubena kukayatu. Vidyo wa kuba’mba bya kwikala na balunda bakine, wakwasha baana betu kuyuka bya kusala bulongo balunda nabo kabiji wibakwasha kusala balunda bakonsha kwibalengela kwikala na byubilo byawama. Mitwe itanwa pa jw.org kimye kyonse itukwasha kuyuka bya kuba na makatazho a bena kupitamo baana. Pa uno keyala patanwa lujimuno lwawama bingi.”​—E. L., Europe.

“Naikala mu masongola na bakazhi bami myaka itanu na umo. Byonkatu byo kikala ku bonse baji mu masongola, kitukatazhanga bingi kuyuka bya kwisamba na mambo a nkomeno ya pusana ne mweno ya bintu bimo. Mutwe wa kuba’mba (How to Be a Good Listener) ‘Telekainga Bulongo’ uji pa jw.org na mutemenwe bingi. Muji mafunde aamba pa byo twakonsha kuyuka kuteleka bulongo. Natangile uno mutwe ne kwisamba bishinka bijimo na mukazhami. Tweseka bingi kulondela mashinda o baambapo mu uno mutwe.”​—B. B., West Indies.

“Napwila na Bakamonyi ba kwa Yehoba pa myaka yavula, kabiji mbena kusanta bingi pa keyala wa jw.org. Nafunda byavula bingi pa uno keyala, nabiji bya kuleka kuzhingila bukiji ne bya kwikala bulongo na bakazhi ne baana bami. Kwambatu kine, uno keyala witukwasha kulama masongola etu.”​—L. G. , West Indies.

“Keyala wa jw.org wankwasha bingi. Vidyo wa mu mulaka wa kwamba na maboko wa kina America, wankwasha kuyuka bulongo uno mulaka wa kwamba na maboko. Nalangulukanga kuba’mba kechi nafwainwa kwibikila bikonkwanyi mu bwikalo bwami ne, bino byo natambile vidyo wa kuba’mba, Seeing God’s Word in My Language (Kufunda pe Lesa mu Mulaka ye Ñamba), naumvwine bingi bulongo kabiji kino kyandengela kulangulukangatu pa bintu byo nafwainwa kuba mu bwikalo.”​—J. N., Africa.

“Uno keyala wankwasha bingi. Ñingila mwingilo wakukwasha bantu bashinka matwi, kikatakata bakyanyike. Byambo bijipo bya mu mulaka wa kwamba na maboko byankwasha bingi kuyuka bulongo bya kwamba uno mulaka. Uno keyala wandengela kukwasha bisemi byavula kutendeka kumvwañana.”​—K. J., West Indies.

“Ne mpofu, pano bino namwenamo bingi mu biji pa jw.org. Pa uno keyala paji byambo byavula byo nakonsha kubula kutambula mu ñondotu umo inge bebipulinta. Uno keyala wakwasha bingi kisemi kyetu kabiji wankwasha kwikala na byubilo byawama mu kimasamasa mo ngikala. Kabiji uno keyala undengela kutambwila pamo kajo ka ku mupashi na balunda nami bamona.”​—C. A., South America.

“Aba babula kuyuka kutanga mabuku a bampofu nangwa babula mali a kupota ano mabuku banemeka bingi keyala wa jw.org. Byambo byo batangila jimo biji pa uno keyala byakwasha bampofu kufunda byavula bingi. Uno keyala ke wa bantu bonse. Wakwasha bingi bampofu bavula ne kwitulengela kuyuka kuba’mba twanema kabiji kechi betulubako ne.”​—R. D., Africa.

“Paji lupusano lukatampe pa keyala wenu na makeyala bupopweshi bukwabo apa intaneti. Pa keyala wenu kechi patanwa byambo byakatazha byakonshatu kumvwisha bapulishiti ne. Kechi patanwa byambo byavula byakukankalwa kupwisha kutanga ne. Keyala wenu wapela bingi. Kechi patanwa byambo byavujisha nangwa byambo bya butemwamaana ne. Kabiji kechi patanwa byambo bilengela kumona nobe kyakatazha bingi kwikala na lwitabilo ne. Byambo bijipo bimwesha kuba’mba muntu yense wakonsha kwikala na lwitabilo.”​—A. G., Asia.

“Inge ne jw.org ne, bwikalo bwami inge bwatama bingi. Mu ino ntanda iji mu mfishi ya ku mupashi, uno keyala ujitu nobe kyeya mu mfishi. Kimpelela bingi kutana bibaba byalumbulula Lesa byo amona bintu bimo ne mikumbu ya mepuzho epuzha bantu bavula.”​—J. C. , West Indies.

“Nsanta bingi pa bukwasho bwa ku mupashi bo ntambwila muno mu jisaka mo ngikala mu South America. Kwa kubula uno keyala, inge kafwako kyo nayuka ne.”​—M. F., South America.