Pa Mulungu pa 5 January mu 2014 ba Serge Gerardin bayilenga ku kubuñana kwa Bakamonyi ba kwa Yehoba kwajinga kwipi na muzhi wa Paris mu France kimye kyo bamweneko byamwekelenga mapuso atama bingi. Bavuluka’mba: “Motoka wipunkile mu kibumba kya ku kyabu ne kutusuka mwiulu. Kepo motoka imakile pa kyabu, yaambuka ne mujilo, ya kapona ne mawilo mwiulu.”

Ba Serge baingila mwingilo wa kuzhimya mujilo pa myaka 40 kabiji bakulumpe babazhimya mujilo. Kechi bakwachile ne ku lusono ne. Baambile’mba: “Nangwa kya kuba twapichilenga ku lubaji lukwabo lwa mukwakwa mukatampe, naambaijile dalaivwa wa sakya kwimana, kepo nanyemejile kwajinga motoka wapilenga na mujilo.” Ba Serge baumvwine miteto ya bantu bataminenga’mba: “Yoyo nafwa! Yoyo nafwa!” Baambile’mba: “Navwajile suchi ne tai pa nshingo, kabiji kechi najingapo na bya kuvwala bya kwizhijikila ku mujilo ne. Nangwa byonkabyo, miteto yo naumvwinenga yamwesheshenga kuba’mba bamo bakonsha kwibapulusha.”

Byo bazhokolokele ku motoka bataine umo wajinga mu motoka wavulañana, bamutwala ne kwalepa byobya. Ba Serge baambile’mba: “Ye wambujile kuba’mba mu motoka muji bakwabo babiji. Pa kikye kimye myotoka yavula yaimene. Bino na mambo a jilungwila ja mujilo, bantu bavula bakankelwe kufikako.”

Badalaivwa bavula ba myotoka ya bimbayambaya baishile na bya kuzhimyako mujilo. Ba Serge bebabujile kufukwilamo mwela uzhimya mujilo wikala mu bino biñambañamba mu motoka, kepo mujilo wapopotejile waleka ne kulakauka. Dalaivwa wa uno motoka wajinga panshi ya motoka. Kepo ba Serge ne bakwabo bazandwile motoka ne kumukokamo.

Ba Serge baambile’mba: “Mujilo waambukile jikwabo. Bino mu motoka mwakijinga umo saka atazha mutwe panshi mambo mushipi wa ku kipona wamukashile. Kepo mukwabo wingila mwingilo wakuzhimya mujilo afikile, naye kechi wajinga pa mingilo pa kyokyo kimye ne. Wavwajile bivwalo bya kwendesheshamo kapulututu. Ba Serge baambile’mba: “Namubujile kuba’mba motoka ujitu pepi kubbukuka ne kwambakana yensetu. Onkao mambo, twafukwilepo kumukokela ku maboko, ne kumukoka twamukokelemo. Byo papichiletu ka kimye kacheche, motoka yense waabbukile na kwambankana na mujilo.

Kepo bazhimya mujilo ne dokotala bafikile na kukwasha bajinga mu mapuso ne kuzhimya mujilo. Ba Serge bebabikile muchi pa bilonda bya mujilo ne byo beshomawine ku maboko. Byo bayilenga na kukanjijile mu sakya kuya na kubuñana, banabalume bavula bebanyemejile ba Serge ne kwibasanchila.

Ba Serge bomvwa bingi bulongo pa byo bakwashañene. Baambile’mba: “Nalangulukile kuba’mba inge mbule kwibakwasha bafwe, nsakwikala na mambo kwi Lesa wami aye Yehoba. Kuvuluka kuba’mba napulwishe boba bantu kundetela bingi lusekelo.”