“Wawama, ulengela-kulangulukapo, bingi.”

“Kumvwatu nobe ubena kwibimona na meso pa kutanga Baibolo.”

“Bifika pa muchima! Kimwekatu nobe kyangye kumvwapo mashimikila a uno mutundu mu bwikalo bwami ne.”

Bino byo byaambile batelekeleko ku buku wa mu Baibolo wa Mateo ye batangila jimo, uji mu Kizungu pa jw.org.

Bakamonyi ba kwa Yehoba batatwile kufyatula Baibolo ye batangila jimo mu 1978. Pa kupitapo kimye, uno Baibolo bamutangile yense nangwa lubaji lumo mu milaka 20.

Baibolo ye bapitulukamo wa Binembelo bya Ntanda Ipya walupwilwe mu Kizungu mu 2013 walengela kuwamishako jishinda jo batangilamo. Kupusanako na byo ajinga kala mwajinga bantu basatu batanga, ye batanga luno muji mawi a bantu kukila pa 1,000 banembwa mu Baibolo.

Mawi apusana pusana alengela aba babena kutanga kufwanyikizha bulongo mashimikila aji mu Baibolo. Bino nangwa kechi beitanga byonka byo batanga bifwanyikizho bya mu Baibolo bya mawitu onka ne, amo muji nyimbo ne, bino ilengela ubena kutanga kumvwa nobe wajingako ko byamwekejilenga byo abena kuteleka.

Uno mwingilo muji bantangi bavula onkao mambo ukebwa kulangulukapo bulongo. Patanshitu, kyanema kuyuka waambile byambo biji mu jishimikila, mwatala jishimikila, kabiji ne bibena kumweka mu jishimikila jo babena kutanga. Twambe’mba, inge byambo bya mutumwa bebinemba mu jishimikila bino kechi bamutongola mu jishimikila ja mu Baibolo ne, ñanyi muntu wafwainwa kutanga bino byambo? Inge paji byambo bya kuzhinauka kampe Tomase wakonsha kuyilapo, kabiji inge byambo bya kanswatu Petelo wakonsha kutanga bino byambo.

Kabiji kwikala ne kulanguluka pa myaka ya yewo muntu ubena kutanga byobyo byambo. Inge kutanga byambo byaambile mutumwa Yoano saka akiji mwanyike, ke kwingijisha jiwi ja nsongwalume; inge mutumwa Yoano saka akoma kala, jiwi ja mwanamulume wakoma jakonsha kuwama.

Kunungapo, bantu babena kutanga bafwainwa kutanga bulongo. Bavula bo bengijisha bengijila pa ofweshi wa musampi wa Bakamonyi ba kwa Yehoba mu United States. Bano bantu bebeseka kumvwa byo babena kutanga kabiji batanga bulongo bebambila kunengezha ne kutanga jifuka jimo jafuma mu Labainga! Batanga ne mashimikila a mu Baibolo amo muji bantu bazhingila, baji na bulanda, basangalala kabiji ne balefulwa. Kuba bino kukwasha kuyuka bantu batanga bulongo mashimikila a bukaji, bulanda, nangwa bikwabotu.

Inge bebapa bya kutanga, bebeta kuya na kufyatula byo babena kutanga ku Brooklyn, ku Patterson, nangwa ku Wallkill. Ubena kutangijila umona’mba babena kutanga mawi abo aesakana bulongo. Ubena kutangijila ne ubena kutanga bekala na pepala ye banengezha bulongo ubena kumwesha pafwainwa kutulumena ne pafwainwa kwalwila jiwi mu jishimikila. Ubena kutangijila wingijisha ne Baibolo wa Binembelo bya Ntanda Ipya ye batanga kala pa kuba’mba atangijile bulongo.

Kwikala kwesakanya bulongo byambo pa kimye kyo babena kufyatula. Pa kuba’mba byumvwanyike bulongo, kwikala kubika pamo byambo nangwa mikuku yo bafyatula pa kimye kyapusana pusana.

Kechi kyayukanyikwa kimye kikapwa kufyatula Baibolo yense wa Binembelo bya Ntanda Ipya wapitulukwamo walupwilwe mu 2013 ne. Bino inge buku umo wa mu Baibolo yense wapwa, bakamubika pa jw.org, kabiji kayukilo kamwesha kuba’mba awo buku wa mu Baibolo bamutanga kala ka kamweka kwipi na jizhina ja yewo buku pa “Mabuku a mu Baibolo.”