Mu kyalo kya Mexico ne mu kyalo kya Central America muji ba ntutuluzhi 290. Bekala mu byalo 6 byapusa pusana kabiji bantutulula mabuku alumbulula Baibolo mumilaka 60. Mambo ka? Mambo bantu inge batanga mabuku alumbulula Baibolo mu mulaka ye bomvwisha kipela bingi byambo bijimo kwibafika pa muchima.​—1 Kolinda 14:9.

Pa kuba’mba ntutulwilo iwame, bantutuluzhi baingijilanga pa ofweshi wa musampi wa Bakamonyi ba kwa Yehoba mu Mexico bebavilwile ku ofweshi uji mu puzha moka mwambiwa yeo mulaka. Nga kino kibena kukwasha byepi bantutuluzhi? Kibena kwibakwasha bingi mambo kimye kyonse besamba na bantu mu yeka mulaka yebabena kuntutulwilamo mabuku. Kino kyalengela ntutulwilo kwibapelela ne kuntutulula mabuku mu jishinda ja pela kumvwa.

Nga bantutuluzhi bena bambapo mbaka? Ba Federico, bantutulula mulaka wa Guerrero Nahuatl baambile amba: “Myaka jikumi yonaingijile mu kyalo kya Mexico mwajingatu kisemi kimo kyo na yukile kyaambanga mulaka wami. Pano luno mu taunyi muji ofweshi waba Ntutuluzhi bonse bamba mulaka yeñamba.”

Ba Karin bantutulula mulaka wa ki German pa ofweshi wa mu Mexican waikela ku Chihuahua baambile’mba: “kwikala na baamba mulaka wa Mennonites kwakwasha bingi kuyuka mulaka byo a bena kyambiwa pa kyokyo kimye. Twikala ne kwingijila mu taunyi mucheche kabiji inge natala pa kipezhe mona bantu bakamwenamo mu byotubena kuntutulula.”

Ba Neyfi bekala pa ofweshi wa bantutuluzhi mu Mérida mu kyalo kya Mexico,baambile’mba: “Kutangijila mafunjisho a Baibolo mu mulaka wa Maya kwitulengela kuyuka byambo bimo bikatazha bantu baamba mulaka wa Maya kumwva. Kino kitulengela kukeba byambo byakuntutulula byapela.”

Nga bantu bo bantutulwila bamwenamo byepi? Akiumvwai byaambile ba Elena bamba mulaka wa Tlapanec kabiji pa myaka 40 kimye kyonse baya na kupwila na bakamonyi ba kwa Yehoba. Mambo akuba’mba kupwila kwikalako mulaka wa kishipanishi kechi baumvwishanga ne. Baambile’mba: “Nayukiletu namba nakonsho kuya na kupwila.” Pano bino ba Elena byo bafunjile Baibolo mu buloshua wa mu mulaka wa ki Tlapanec, butemwe bwabo bwakutemwa Lesa bwabaile kyakuba bamwesheshe patoka kwipana kwi aye kupichila mu lubatizhilo mu 2013. Ba Elena baambile’mba: “Na musanchila bingi Yehoba pa kukwasha kumvwisha Baibolo.”