Brian waambile’mba: “Nebikako bingi kutanga Baibolo, bino ñumvwa mukose mambo Baibolo wabayisha.”

 Nanchi ne anweba byo byo mulanguluka nyi? Kino kibaaba kisakwimukwasha bingi!

•  Mambo ka o nafwainwa kutangilanga Baibolo?

•  Nafwainwa kutanganga byepi Baibolo?

•  Byambapo bakwenu

 Abya mumvwa mukose kutendeka kutanga Baibolo nyi? Inge byobyo mumvwa ku muchima, kwakamwa ne. Mwakonsha kutendeka kulanguluka’mba kutamba TV ne mavidyo kupwisha mukose kukila kutanganga Baibolo muji mapa avula bingi kabiji buku mwabula ne bipikichala.

 Tufwanyikizhe bino: Inge kya kuba mwataana kintu kikatampe kya buneme kyalaala panshi, nanchi mukekipitayilatu kwa kubula kuzhikulamo pa kuba’mba muyuke biji mukachi nyi?

 Baibolo kyo kino kya buneme. Mambo maana ne mafunde ajimo afwainwa kwimukwasha

•   Kufuukulanga bintu byawama

•   Kumvwañananga na bansemi benu

•   Bya kutaana balunda bawama

•   Bya kuba na bijikila

 Uno buku wa kala wafwainwa kukwasha byepi bantu ano moba? Wafwainwa kwibakwasha mambo “Binembelo byonse byanembelwe na lutangijilo lwa mupashi wa Lesa.” (2 Timoti 3:16) Akino kibena kulumbulula’mba bintu biji mu Baibolo byafuma kwi Lesa.

 Jishinda jitanshi ke kutanga Baibolo yense. Akino kimukwasha kuyuka bukine bonse buji mu Baibolo. Kuji mashinda avula bingi a kutangilamo Baibolo. Akimonai ano mashinda abiji:

•    Mwakonsha kutanga mabuku 66 aji mu Baibolo monka mo alondankena kufuma ku Ntendekelo kufika ku Lumwekesho.

•    Mwakonsha kutanga Baibolo monka mwayila ndonda ya bintu byamwekele.

 Bya kwimukwasha: Bya Kulumbulula A7 biji mu Baibolo wa Binembelo bya Ntanda Ipya watanchika mu ndonda bintu byamwekele mu bwikalo bwa kwa Yesu byo ajinga pano pa ntanda.

 Jishinda ja bubiji ja kutangilamo Baibolo ke kusala jishimikila jipasha na makatazho o mubena kupitamo. Nabiji:

•   Nanchi mukeba kutaana balunda bakishinka nyi? Tangai jishimikila ja kwa Yonafwanyi ne Davida. (1 Samwela bitango 18-20) Kepo muye po banemba’mba “Bya Kutaana Balunda Bakishinka” pa kuba’mba mufunjileko byavula biji mu jino jishimikila.

•   Nanchi mukebesha kuyuka bya kukana meseko nyi? Tangai jishimikila jaamba pe Yosefwa byo akaine kuba bintu byatama. (Ntendekelo kitango 39) Kepo muye po banemba’mba “Bya Kukana Lweseko . . . Yosefwa—Lubaji 1” ne “Yosefwa Bamupeelemo Mambo a Bubela! Yosefwa—Lubaji 2” pa kuba’mba mufunjileko byavula biji mu jino jishimikila.

•   Nanchi mukeba kuyuka milombelo byo yafwainwa kwimukwasha nyi? Tangai byaubile Nehemiya. (Nehemiya kitango 2) Kepo muye po banemba’mba “Lesa Wakumbwile Lulombelo Lwanji” pa kuba’mba mufunjileko byavula biji mu jino jishimikila.

 Bintu bya kwimukwasha: Inge mubena kutanga Baibolo, ikalai kwazhindama pa kuba’mba muteshe muchima pa byo mubena kutanga.

 Jishinda ja busatu ja kutangilamo Baibolo salai jishimikila nangwa buku wa salamo kutanga ne kumona byo byafwainwa kwimukwasha. Inge mwapwisha kutanga, iipuzhai anweba bene ano mepuzho:

•    Mambo ka Yehoba o abikijile kino kishinka mu Baibolo?

•    Aje jishimikila jibena kumfunjishapo ka pa biji Yehoba nangwa mo obila bintu?

•    Nakonsha kwingijisha byepi bino bishinka mu bwikalo bwami?

 Ibikilai kikonkwanyi: Nembai juba jo mukeba kutendeka kutanganga Baibolo.