Kwesakana na sawakya umo, kyatainwe’mba banyike bavula mu kyalo kya America balomba, pano bino banyike bachechetu bo balomba kimye kyonse. Onkao mambo, bamo bepuzha’mba: ‘Nanchi kulomba kwaikalatu nobe muchi utontololako misongo nyi, inyi kuji bintu bikwabo byavwangiwamo?’

•  Lulombelo lulumbulula ka?

•  Nanchi Lesa umvwa milombelo nyi?

•  Ñanyi bintu byo nafwainwa kulombapo?

•  Byambapo bakwenu

 Lulombelo lulumbulula kwisamba ne Lesa walengele bintu byonsetu. Abino byo bilumbulula lulombelo! Yehoba wazhila kukila bantu bonse, pano bino “kechi uji kwalepa ne atweba bonse ne.” (Byubilo 17:27) O ene mambo Baibolo o etutundaika kuba’mba: “Fwenyai kwipi ne Lesa, ne aye ukafwenya kwipi ne anweba.”—Yakoba 4:8.

 Pano mwakonsha kufwenya byepi kwipi ne Lesa?

•   Jishinda jimo jo mwafwainwa kufwenyenyamo kwipi ne Lesa ke kulomba, ajino jo jishinda jo mwisambilamo ne Lesa.

•   Jishinda jikwabo ja kufwenyenyamo kwipi ne Lesa ke kutanga Baibolo, ajino jo jishinda Lesa jo “esambilamo” ne anweba.

 Kulomba ne kutanga Baibolo o mashinda abiji akemukwasha kukosesha bulunda bwenu ne Lesa.

 Jeremy waambile’mba: “Kwisamba ne Yehoba Mwine Wakila ke kintu kyawama bingi kwi atweba bantu.”

 Miranda waambile’mba: “Kubuula Yehoba mu lulombelo makatazho ami onse abena kunkatazha ku muchima kunkwasha bingi kufwenya kwipi ne aye.”

 Nangwatu mwaitabila mwi Lesa kabiji mulomba kwi aye, kyakonsha kwimukatazhako kuswa’mba umvwa milombelo yenu. Nangwa byonkabyo, Baibolo waamba pe Yehoba amba ‘Umvwa milombelo.’ (Salamo 65:2) Kuyuka kino kishinka kubena kwimutundaika anweba amba: “Saka mutaya bijikila byenu byonse pe aye.” Mambo ka a kubila bino? “Mambo wimuta muchima.”—1 Petelo 5:7.

 BYA KULANGULUKAPO: Nanchi kimye kyonse mwikalapo na kimye kya kwisamba na balunda nenu nyi? Inge byobyo muba, ko kuba’mba mwafwainwa kwikalangapo na kimye kya kwisamba ne Lesa. Lombainga kwi aye kimye kyonse ne kwingijisha jizhina janji ja kuba’mba Yehoba. (Salamo 86:5-7; 88:9) Onkao mambo, Baibolo ubena kwimutundaika anweba amba: “Lombainga kimye kyonse.”—1 Tesalonika 5:17.

 Moises waambile’mba: “Lulombelo mo mo nesambila ne Tata wa mwiulu, mambo nkasuluka kumubuula bintu byonsetu biji ku muchima wami.”

 Karen waambile’mba: “Amiwa nkasuluka bingi kwisamba ne Yehoba pa bintu byonsetu, byonkatu byo kimpeelela kubuula ba mama makatazho ami nangwa mulunda nami wa pa muchima.”

 Baibolo waamba’mba: “Mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba.”—Filipai 4:6.

 Nanchi kino kibena kulumbulula’mba mwafwainwa kulomba pa makatazho o mubena kupitamo nyi? Ee mwafwainwa! O ene mambo Baibolo o aambile’mba: “Twika Yehoba kisendwa kyobe, ne aye ukakukosesha.”—Salamo 55:22.

 Pa kulomba kwi Lesa, kechi mwafwainwatu kulombanga pa makatazho o mubena kupitamo ne. Mwafwainwa ne kulomba pa bintu bikwabo. Nsongwakazhi wa jizhina ja Chantelle waambile’mba: “Bulunda kuba bwakosa ne, inge kya kuba ndombatu kwi Yehoba kuba’mba ankwashe. Namona’mba kumusanchila Yehoba ko kwafwainwa kwikala patanshi mu milombelo yami ne mutanchi wa bintu bya kumusanchilapo byafwainwa kuvula bingi.”

 BYA KULANGULUKAPO: Ñanyi bintu mu bwikalo bwenu byo musanchilapo Yehoba? Nanchi mwafwainwa kulangulukapo bintu bisatu byo mwafwainwa kusanchilapo Yehoba lelo nyi?

 Anita waambile’mba: “Twafwainwa kulomba kwi Yehoba ne kumusanchila pa bintu bichechetu nabiji inge twakomoka jiluba jawama.”

 Brian waambile’mba: “Kulanguluka languluka pa bintu byalenga Lesa nangwa kinembelo kimo kya mu Baibolo kimufika pa muchima kukemulengela kumusanchila bingi Yehoba.”