Mwalangulukapo’mba Ka?

•   Nanchi kyatama kutala byaikala tubangabanga mwiulu juba jo wasemenwe pa kuba’mba bayuke bikakumwekela kulutwe, kwingijisha bipabi, nangwa kwipuzha mipashi ya bafu nyi?

•   Nanchi mashimikila a bingelekezha amweshatu nkondo iji pakachi ka byawama ne byatama nyi, inyi kine ko biji kabiji bibika bantu mu kizumba?

 Kino kibaaba kyaamba pa kilengela bantu kutemwa kupopwela mipashi ne ene mambo o mwafwainwa kujimukila.

•  Ki ka kilengela bantu kutemwa kupopwela mipashi?

•  Mambo ka o mwafwainwa kujimukila?

•  Byo mwakonsha kuba

•  Byambapo bakwenu

 Balenga bya kisangajimbwe batemwa bingi kunemba pa bingelekezha, kabiji mu mafilimu, mitanchi ya pa TV, makayo a pa kompyuta, ne mu mabuku, bambatu pa bingelekezha. Na mambo a kino, banyike bavula batemwa bingi bintu nabiji bumfunji bwa tubangabanga, kutamba mafilimu amwesha bandemona, bantu bafuma ku bilende bufuku kwiya na kutoma mashi a bantu bomi, bipuku ne bulozhi. Mambo ka? Na mambo a bishinka byalondelapo:

•   Muchima wa kukeba kuyuka bintu: Kukeba kuyuka inge kya kine bilengwa bya mupashi ko biji

•   Kwakamwa: Kukeba kuyuka bintu bikamweka kulutwe

•   Kukwatankana: Kukeba kwisamba na mutemwe wabo wafwa

 Kukeba kuba bino bintu kechi kwatama ne. Kijitu bulongo kulanguluka pa bikamweka kulutwe nangwa kuvuluka mutemwe wetu wafwa. Pano bino, kuji bizumba byo mwafwainwa kuyuka.

 Mu Baibolo muji lujimuno lwanema bingi lwaamba pa kupopwela mipashi. Baibolo waamba’mba:

 “Mwi anweba kechi mukatanwe muntu nangwa umo . . . uponga, nangwa ñanga wa bisoko nangwa muntu yense uba bya lubuko nangwa mulozhi ne. Kabiji kechi mukatanwe muntu uta bakwabo bwanga nangwa wipuzha muntu wisamba na mipashi nangwa wamba bikamweka kulutwe nangwa wisamba na bafu ne. Mambo muntu yense uba bino bintu ye wa bunya kwi Yehoba.”​—Mpitulukilo ya mu Mizhilo 18:10-12.

 Mambo ka Baibolo o akainya kupopwela mipashi?

•   Kupopwela mipashi kumwesha’mba tubena kutundaika bandemona. Baibolo ufunjisha’mba bamalaika bamo basatukijile Lesa kabiji bealwile bene ke balwanyi banji. (Ntendekelo 6:2; Yuda 6) Bano bamalaika babi batelwa’mba bandemona, bajimbaika bantu kupichila mu bantu besamba na mipashi, bantu babuulañana bikamweka kulutwe, ne bañanga ba lubuko ne bamfunji ba tubangabanga. Kuba bino bintu kwakonsha kwitulengela kwikala balunda na balwanyi ba Lesa.

•   Kupopwela mipashi kutundaika lufunjisho lwa bubela lwa kuba’mba bantu bamo bakonsha kubuulañana bikamweka kulutwe. Pano bino, Lesa ye yenkatu wafwainwa kwamba’mba: “Kufumatu ku ntendekelo amiwa ñambila jimo bintu bikamweka kulutwe, kabiji kufumatu ne kala kene amiwa ñamba bintu bikyangye kumweka.”​—Isaya 46:10; Yakoba 4:13, 14.

•   Kupopwela mipashi kutundaika lufunjisho lwa bubela lwa kuba’mba bafu bakonsha kwisamba na bomi. Pano bino, Baibolo waamba’mba: “Bantu bafwa kafwako kintu nangwa kimo kyo bayuka ne . . . Mu Kilende mo mubena kuya kechi muji kwingila mingilo, kulanguluka, kuyuka kintu nangwa kwikala na maana ne.”​—Musapwishi 9:5, 10.

 Na mambo a bino bishinka, Bakamonyi ba kwa Yehoba kechi bobako bintu byakwatankana na kupopwela mipashi ne. Bachinuzhuka ne bya kisangajimbwe nabiji mafilimu amwesha bantu bafuma ku bilende bufuku kwiya na kutoma mashi a bantu bomi ne bulozhi ne bipuku. Nsongwakazhi wa jizhina ja Maria waambile’mba: “Inge kya kuba mu filimu muji bya kupopwela mipashi, kechi nafwainwa kwiitamba ne.” a

•   Fuukulaipo kutwajijila “kwikala na jiwi ja mu muchima jatoka” kwi Yehoba kupichila mu kuchinuzhuka byubilo nangwa bya kisangajimbwe byavwangamo bingelekezha.​—Byubilo 24:16.

•   Tayai byonse byo muji nabyo byakwatankana na bingelekezha. Tangai Byubilo 19:19, 20 pa kuba’mba mumone byo mwakonsha kufunjilako ku byaubile bena Kilishitu batanshi.

 Vulukainga kino: Inge mwakana byubilo ne bya kisangajimbwe bitundaika bingelekezha, mumwesha patoka kuba’mba muji ku lubaji lwa Yehoba. Kabiji kino kisangajika muchima wanji.​—Byambo bya Maana 27:11.