“Inge nabuka lukelokelo, nteleka ku nyimbo. Kabiji inge nakanjila mu motoka, napo nteleka ku nyimbo. Nteleka ku nyimbo inge nji pa nzubo mbena kukokoloka, mbena kupyanga mu nzubo, nangwa mbena kutanga. Kimye kyonse nteleka ku nyimbo.”​—Carla.

 Nanchi ne anweba byobyo muba nyi? Inge ibyo, a kino kibaba kisakwimukwasha kusala bulongo nyimbo yakonsha kwimusangajika ne kwimulengela kwikala na byubilo byawama?

•  Byawama bifumamo

•  Byatama bifumamo

•  Byamba bakwenu

 Kuteleka ku nyimbo twakonsha kwikwesakanya ku kuja kajo. Kyanema ke kubula kukizhamo nangwa kya kuba twasala nyimbo yawama. Akimonai bino bishinka:

•   Nyimbo yakonsha kwimulengela kwikala na milanguluko yawama.

   “Inge jo juba ke naumvwa bulongo ne, mbikapo ka lwimbo ko natemwa. Kino kindengela kumvwa bulongo.”​—Mark

•   Nyimbo yakonsha kwimuvululamo byakala.

   “Nyimbo imo imvululamo bintu bya kunyuma. Ngumvwa bulongo jonse inge neyumvwa.”​—Sheila.

•   Nyimbo ilengela kukwatankana.

   “Najinga ku kushonkena kwa Bakamonyi ba kwa Yehoba, bonse batainweko byo baimbile lwimbo wakupezhako, najijile ne mipolo. Nangwa kya kuba twamba milaka yapusana pusana, nyimbo itukwatankenye pamo.”​—Tammy.

•   Nyimbo yakonsha kwimulengela kwikala na byubilo byawama.

   “Kufunda bya kwimba bijimba kwakonsha kwimulengela kwikala batekanya. Kechi mwingilo ye mwakonsha kufunda mu juba jimotu ne. Pa kuba’mba mufunde kwimba bijimba mwafwainwa kupitulukangamo jonse.”​—Anna.

 Nanchi mwayuka nyi? Buku mukatampe mu Baibolo wa Masalamo​—muji nyimbo 150.

 Nyimbo imo iji nobe kajo muji bulembe. Monai ene mambo o kyaikela bino.

•   Nyimbo yavula itundaika bulalelale.

   “Nyimbo yavula yaya nkuwa yaamba bingi pa bulalelale. Kechi bomvwa bumvu kwamba pa bulalelale ne.”​—Hannah.

   Byaamba Baibolo: “Kange mwambenga pa bulalelale ne pa bubipisho bonse nangwa pa lwiso mo muji ne.” (Efisesa 5:⁠3) Iipuzhe amba, ‘Nanchi nyimbo yo ntelekako indengela kubula kumvwina bino byambo nyi?’

•   Nyimbo imo yakonsha kwimulengela bulanda.

   “Javula inge nalaala bufuku nteleka ku nyimbo indetela binyenge. Nyimbo ya bulanda yakonsha kulubankanya milanguluko.”​—Tammy.

   Byaamba Baibolo: “Pa bintu byonse byo ulama, lama muchima wobe.” (Byambo bya Maana 4:23) Iipuzhe amba, ‘Nanchi nyimbo yo ntelekako indengela kwikala na milanguluko yatama nyi?’

•   Nyimbo imo yakonsha kwimulengela kwikala na bukaji.

   “Nyimbo itundaika bukapondo, ne bintu byatama yandengelanga kushinta. Naikalanga bingi na bukaji inge nateleka ku nyimbo ya uno mutundu. Ne kisemi kyonse kyayukile.”​—John.

   Byaamba Baibolo: “Pano mwafwainwa kutaya bino bintu byonse: bukaji, kuzhingila, bubi, mwenga ne ñambilo ya bunya kufuma mu kanwa kenu.” (Kolose 3:8) Iipuzhe’mba, ‘Nanchi nyimbo yo ntelekako indengela bukaji nangwa kukozha bakwetu ku muchima nyi?’

 Kishinka kine ke kino: Mwafwainwa kusalanga nyimbo ya kutelekako. Abino byo byaubile mwanyike wamukazhi wa jizhina ja Julie. Waambile’mba, “mpituluka mu nyimbo yami ne kufuuta yonse yo namona’mba yatama. Kechi kyapela ne, bino kyo kintu kyawama kuba.”

 Nsongwakazhi wa jizhina ja Tara naye byobyo oba. Waambile’mba: “Inge naumvwa lwimbo ye baimba bulongo bijimba ku waileshi muji byambo byatama, ntwala pa katambo kakwabo. Kuba bino kujitu nobe kuleka kuja kajo katobala ko watemwa. Inge nakonsha kukana kuteleka ku lwimbo utundaika bulalelale, ko kuba’mba nakonsha kukana ne kwilaala na muntu ye nabula kwisongola nanji. Kechi nkeba nyimbo yatama kuñonauna ne.”