Benakwenu baamba nangwa bauba kintu kimuzhingijisha, kabiji mwaeseka kubula kumwesha’mba mwazhingila. Pano bino, benakwenu bamona’mba kuji byalubankana kabiji kebemwipuzhe kuba’mba bayuke. Kino kimulengela kukizhamo bukaji. Mwakonsha kufwomona byepi bukaji?

• Byo Mwafwainwa Kuyuka

• Byo Mwakonsha Kuba

• Bukaji bwakonsha kwimulengela kukolwa. Bashayuka bataana kuba’mba kukizhamo kuzhingila kuleta bikola nabiji mashi kwenda lubilo, kikola kya muchima, kupopomenwa, ne kajo kukankalwa kugaiwa bulongo munda. Kabiji bukaji buleta kalabila, kukizhamo kwikala na bijikila, kikoba kubula kwikala bulongo, ne kalepu. O ene mambo Baibolo o aambila’mba: “Kange uzhingile ne, mambo mufumatu byatama.”—Salamo 37:8, tubyambo twa munshi.

• Kufya bukaji nako kwatama bingi. Kufya bukaji mu muchima kuji nobe kikola kibena kukolelatu mukachi. Kino kyakonsha kwimulengela kwendatu na kwijizhanya nangwa kulengulula bakwenu. Kino kyakonsha kwimukatazha kwikala na bakwenu, kabiji kyakonsha kubika masongola enu mu kizumba.

• Langulukainga pa byubilo byawama bya benakwenu. Nembai byubilo bya benakwenu bisatu byo mwatemwa. Kimye kikwabo inge bauba kintu kimuzhingijisha, mukalanguluke pa byubilo byo mwanemba. Kino kyakonsha kwimukwasha kufwomona bukaji.

  Jifunde ja mu Baibolo: “Saka musanta.”—Kolose 3:15.

•  Ikalai na muchima wa kwilekelako mambo. Patanshi, esekainga kumwena bintu mubena kwibimwena benakwenu. Kuba bino kukemukwasha kwikala na kifyele, kyo batongola mu Baibolo amba ‘kubila lusa’ bakwenu. (1 Petelo 3:8) Apa bino mwiipuzha anweba bene amba, ‘Nanchi akye kintu kyanzhingijisha kyatama bingi kya kuba nakankalwa kulekelako mwinakwami mambo nyi?’

  Jifunde ja mu Baibolo: ‘Kimuwamina kulekelako bakwenu mambo.’—Byambo bya Maana 19:11.

•  Ambainga biji ku muchima na kifyele kabiji mu jishinda jawama. Kange mwingijishenga kyambo kya kuba’mba “Anweba” ne. Nabiji kwamba’mba, “Anweba muñumvwisha bingi kutama ku muchima mambo kechi muntuminapo foni ne kumbuula ko muji ne.” Kyawama kwamba’mba, “Amiwa ngakamwa bingi inge bwaila namba kana mujitu bulongo nyi.” Kwamba na jiwi jakooka kwakonsha kwimukwasha kufwomona bukaji.

  Jifunde ja mu Baibolo: “Byambo byenu kimye kyonse bikale na bibusa kabiji byalungwamo mukele.”—Kolose 4:6.

•  Telekeshainga. Inge mwapwisha kwamba biji ku muchima, mwafwainwa kupembelela benakwenu nabo balumbulula kwa kubula kwibachibikizha. Inge benakwenu bapwisha kwamba, pitulukaimo mu bishinka byo baamba pa kuba’mba mumone inge mwaumvwa byo bajikwamba. Kutelekesha kwakonsha kwimukwasha bingi kufwomona bukaji.

  Jifunde ja mu Baibolo: “Muntu yense wafwainwa kupelawizha kumvwa, kabiji abande kwamba.”—Yakoba 1:19.