Baibolo kechi waambapo mu kushinkamika pa kusoka mibiji ya bafu ne. Kabiji mu Baibolo kechi mujipo mukambizho waamba pa kuzhiika nangwa kusoka mibiji ya bantu bafwa ne.

 Bino Baibolo waamba pa bakalume ba Lesa ba kishinka bazhiikile balongo babo bafwile. Baibolo waamba’mba Abalahama waingijile papelejile bulume bwanji kukeba mpunzha kwa kuzhiika mukazhanji, aye Sala.—Ntendekelo 23:2-20; 49:29-32.

 Baibolo waamba ne pa bantu ba kishinka basokele mibiji ya bantu bafwile. Jishimikila jimo ke ja Mfumu Saulo wa bena ne baana banji basatu ba balume bo baipayile mu nkondo. Mibiji yabo yajinga mu ntanda ya balwanyi babo, kabiji kechi beilamine bulongo ne. Bashilikale bena Isalela ba kishinka byo baumvwine kino, bayile na kusenda mubiji wa kwa Saulo ne ya baana banji ne kwiisoka, kabiji bazhiikile bikupa byashajilepo. (1 Samwela 31:8-13) Baibolo umwesha’mba jishinda jo baubijilemo na ino mibiji kechi jatamine ne.—2 Samwela 2:4-6.

 Mulanguluko wabula kuyilamo: Kusoka mubiji kukalengela Lesa kukankalwa kumusangula.

 Kishinka: Nangwatu mubiji wa muntu bamuzhiika, bamusoka, wafwila pa kalunga ka mema nangwa bamuja ku banyama, Lesa ukamusangula, kafwako kyakatazha kwi aye ne. (Lumwekesho 20:13) Wa Bulume Bonse wakonsha kulenga jibiji mubiji wa muntu wafwa.—1 Kolinda 15:35, 38.