Bañanyi Baya Mwiulu?

JIZHAI

Mukumbu wa mu Baibolo

Lesa wasala bena Kilishitu bacheche bakishinka inge bafwa ukebasangula kuya na kukekala mwiulu. (1 Petelo 1:3, 4) Pa kuba’mba bakatambule mfweto yabo mwiulu, bafwainwa kutwajijila kukookelanga Lesa ne kutwajijila kukosesha lwitabilo lwabo.—Efisesa 5:5; Filipai 3:12-14.

Ñanyi mwingilo ukengilanga bakaya mwiulu?

Bakengijilanga pamo ne Yesu kwikala bamfumu ne bañanga pa myaka 1,000. (Lumwekesho 5:9, 10; 20:6) Bo bakekala “meulu apya” nangwa’mba kafulumende wa mwiulu ukalamanga “ntanda ipya” nangwa’mba bantu baoloka. Abano bakalamanga ino ntanda kufuma mwiulu. Kabiji bakakwasha bantu kwikala byonkatu byakebelenga Lesa patanshi.—Isaya 65:17; 2 Petelo 3:13.

Banga bo bakasangula kuya mwiulu?

Baibolo waamba’mba ba 144,000 bo bonkatu bo bakasangula kuya na kukekala mwiulu. (Lumwekesho 7:4) Mu kimwesho kiji pa Lumwekesho 14:1-3, mutumwa Yoano wamwene “Mwana Mukooko saka aimana pa Mutumba wa Ziona, na ba 144,000.” Mu kino kimwesho, “Mwana Mukooko” ubena kwimenako Yesu ye basangwile kwi Lesa. (Yoano 1:29; 1 Petelo 1:19) Kabiji “mutumba wa Ziona” ubena kwimenako kifulo kikatampe kijipo Yesu ne ba 144,000 bo akalamanga nabo mwiulu.—Salamo 2:6; Bahebelu 12:22.

Aba “baitwa ne kusalwa” bakalamanga pamo ne Kilishitu mu Bufumu, bebatongola’mba “kajitanga kacheche.” (Lumwekesho 17:14; Luka 12:32) Akino kibena kulumbulula’mba ke bantu bachechetu kupusanako na mikooko ikwabo ya kwa Yesu.—Yoano 10:16.

Milanguluko yabula kuyilamo yamba bantu pa bakaya mwiulu

Mulanguluko wabula kuyilamo: Bantu bonsetu bawama bakaya mwiulu.

Kishinka: Lesa walaya kupa bumi bwa myaka ne myaka bantu bavula bawama ponka pano pa ntanda.—Salamo 37:11, 29, 34.

Yesu waambile’mba: “Kafwako muntu wayapo kala mwiulu ne.” (Yoano 3:13) Yesu byo aambile bino, walumbulwilenga’mba bantu bawama bafwile, aye saka akyangye kufwa nabiji Abalahama, Mosesa, Yoba ne Davida kechi bakaya mwiulu ne. (Byubilo 2:29, 34) Pakuba abano bantu baketekejile kuba’mba bakebasangula ne kwikala na bumi ponka pano pa ntanda.—Yoba 14:13-15.
Kusangulwa kwa bakaya mwiulu bekutongola’mba “lusanguko lutanshi.” (Lumwekesho 20:6) Akino kibena kulumbulula’mba kukekala ne lusanguko lukwabo. Aluno lusanguko lukekela pano pa ntanda.
Baibolo waamba’mba kimye kikatendeka kulama Bufumu bwa Lesa, ‘lufu kechi lukekalako jibiji ne.’ (Lumwekesho 21:3, 4) Auno mulaye ubena kwamba pa ntanda mambo lufu kechi luji mwiulu ne, pakuba luji ponka pano pa ntanda.

Mulanguluko wabula kuyilamo: Muntu yense uji na luusa lwa kwisajila kana ukeba kwikala na bumi mwiulu nangwa pano pa ntanda.

Kishinka: Lesa ye uji na luusa lwa kusala muntu wafwainwa kukatambula “kilambu kya lwito” ko kuba’mba kukekala mwiulu. (Filipai 3:14) Kechi tuji na luusa lwa kwisajila kuba’mba tukeba kukengijilanga Lesa mwiulu nangwa pano pa ntanda ne.—Mateo 20:20-23.

Mulanguluko wabula kuyilamo: Kwikala mwiulu kwawama kukila kwikala pano pa ntanda.

Kishinka: Lesa waamba pa bantu bakekala na bumi bwa myaka ne myaka pano pa ntanda amba “bantu bami,” “bami basalwa” kabiji “bo bapesha kwi Yehoba.” (Isaya 65:21-23) Abano bantu bakekala na bumi bwa myaka ne myaka kabiji bakalula ino ntanda kwikala paladisa. Mambo abino Lesa byo byo akebelenga bantu kwikala.—Ntendekelo 1:28; Salamo 115:16; Isaya 45:18.

Mulanguluko wabula kuyilamo: Nambala ya 144,000 yo batongola mu Lumwekesho ya kifwanyikizhotu kechi ya kine ne.

Kishinka: Nangwa kya kuba buku wa Lumwekesho muji manambala a kifwanyikizho, manambala amo a kine kechi a kufwanyikizha ne. Baibolo waamba pa “mazhina 12 a batumwa 12 ba Mwana Mukooko.” (Lumwekesho 21:14) Kebai bishinka pa kuba’mba mushiinwe’mba nambala ya 144,000 ke nambala ya kine, kechi ya kufwanyikizhatu ne.

Pa Lumwekesho 7:4 paji “nambala ya boba bo babikile tutetesho [nangwa’mba bakaya na kwikala mwiulu], bajinga 144,000.” Inge mwamona kyepelo kikwabo mu kino kyonka kitango, batongolamo jibumba jikwabo amba: “Jibumba jikatampe jo bakonsha kubula kubala ku muntu nangwa umo.” Baji mu “jibumba jikatampe” nabo Lesa ukebapulusha. (Lumwekesho 7:9, 10) Inge nambala ya 144,000 ya kufwanyikizhatu, bino amba ibena kwamba pa bantu bonse bakapuluka ba kukankalwa kubala, ko kuba’mba kwamba pa jibumba jikwabo ja kukankalwa kubala ke kutayatu kimye. a

Kunungapo, ba 144,000 bebalumbulula’mba “bebapotele kufuma mu bantu kwikala bya nsomo.” (Lumwekesho 14:4) Kyambo kya “bya nsomo” kilumbulula bintu bicheche byo basala. Kibena kwamba pa boba bakalamanga pamo ne Kilishitu mwiulu. Kabiji bantu bakubula kubala bakekalanga pano pa ntanda.—Lumwekesho 5:10.

a Kabiji shayuka aye Robert L. Thomas wanembele pa nambala ya 144,000 iji pa Lumwekesho 7:4 amba: “Aye nambala ya kine kupusanako na nambala yo babula kushinkamika iji pa Lumwekesho 7:9. Inge aye nambala ya kufwanyikizhatu ko kuba’mba kafwako nambala ya mu buku yo twafwainwa kushiinwa’mba ya kine ne.”—Lumwekesho 1-7: An Exegetical Commentary, jipa 474.