Jizhina ja mu Kingiliki ja kuba’mba A·po·kaʹly·psis (Lonaiko), jo batumba buku wa mu Baibolo amba Lumwekesho, jilumbulula “kusolola” nangwa “kumwesha” patoka byafyamika. Jino jizhina ja kuba’mba Lumwekesho jilumbulula mwatala buku. Uno buku wasolola bintu byafyamika ne kwitubula bintu bibena kumweka byo banembele kala. Bungauzhi bwavula bujimo bukyangye kufika.

Bishinka biji mu buku wa Lumwekesho

•   Byambo bitanshi.—Lumwekesho 1:1-9.

•   Byambo Yesu byo anembejile bipwilo bitanu na bibiji.—Lumwekesho 1:10–3:22.

•   Wamwene mu kimwesho Lesa saka aikala pa jitanda mwiulu.—Lumwekesho 4:1-11.

•   Bimwesho mu ndonda:

  •   Tutetesho tutanu na tubiji.—Lumwekesho 5:1–8:6.

  •   Matolompita atanu na abiji, apelako asatu aleta binkunka bisatu.—Lumwekesho 8:7–14:20.

  •   Michiba itanu na ibiji, mu muchiba umo umo muji kinkunka kya buchibamambo bwa Lesa bwa kwitulwila pano pa ntanda.—Lumwekesho 15:1–16:21.

  •   Bimwesho bya konauna balwanyi ba Lesa.—Lumwekesho 17:1–20:10.

  •   Bimwesho byamwesha Lesa byo akapesha bya mwiulu ne bya pano pa ntandai.—Lumwekesho 20:11–22:5.

•   Byambo bya kupezhako.—Lumwekesho 22:6-21.

Mashinda a kukwatakenyamo biji mu Lumwekesho

1.   Bijimo byalumbulula bintu byawama kabiji kechi bilengesha moyo bantu bengijila Lesa ne. Bantu bavula bamba’mba kyambo kya kuba’mba A·po·kaʹly·psis nangwa’mba lonaiko kilumbulula malwa akatampe. Bino buku wa Lumwekesho watatula ne kupezhako na byambo bya lusekelo. Waamba’mba bo balusekelo bantu batanga, bomvwa ne kulondela byambo bijimo.—Lumwekesho 1:3; 22:7.

2.   Mu Lumwekesho mwavula “biyukilo,” nangwa’mba bifwanyikizho byalumbululapo bintu bimo.—Lumwekesho 1:1.

3.   Bintu bikatampe ne biyukilo biji mu buku wa Lumwekesho bebitongola mu mabuku akwabo mu Baibolo:

   •   Yehoba “Lesa wa mwiulu” kabiji walengele bintu byonse.—Mpitulukilo ya mu mizhilo 4:39; Salamo 103:19; Lumwekesho 4:11; 15:3.

   •   Yesu Kilishitu “Mwana mukooko wa Lesa.”—Yoano 1:29; Lumwekesho 5:6; 14:1.

   •   Satana Diabola mulwanyi wa Lesa.—Ntendekelo 3:14, 15; Yoano 8:44; Lumwekesho 12:9.

   •   Babilona mukatampe uji nobe muzhi wa Babilona wa kala, mulwanyi wa kwa Yehoba Lesa ne bantu banji kabiji ko kwafuma bupopweshi bonse bwa bubela.—Ntendekelo 11:2-9; Isaya 13:1, 11; Lumwekesho 17:4-6; 18:4, 20.

   •   “Kalunga” ko kuba’mba bantu balengulula Lesa.—Isaya 57:20; Lumwekesho 13:1; 21:1.

   •   Bintu bya byaesakana na byajinga mu tente wa lusambakeno ye baingijishanga kupopwelamo Lesa kala, nabiji jikwachi ja lulayañano, kizhiba kya kilola (mwa kovwa bintu), malampi, bya kufutumuna, kya kusokelapo bitapisho.—Kulupuka 25:10, 17, 18; 40:24-32; Lumwekesho 4:5, 6; 5:8; 8:3; 11:19.

   •   Banyama baimenejilengako makafulumende a bantu.—Danyela 7:1-8, 17-26; Lumwekesho 13:2, 11; 17:3.

   •   Bibelengelo bifwanyikizhapo bintu bimo.—Lumwekesho 1:20; 8:13; 13:18; 21:16.

4.   Bimwesho bibena kufika mu “juba ja Nkambo.” Jino juba jatatwile 1914, bufumu bwa Lesa kyo bwaikajikilwe kabiji kimye Yesu kyo aikajile pa Bufumu ne kutatula kulama. (Lumwekesho 1:10) Onkao mambo, twaketekela’mba bintu biji mu Lumwekesho bibena kufika mu ano moba o tujimo.

5.   Pa kuba’mba tumvwishe bintu biji mu buku wa Lumwekesho twafwainwa kwingijisha bintu bimo bitukwasha kumvwisha bintu bikwabo biji mu Baibolo, nabiji maana a Lesa ne bukwasho bwa bantu bakwatakanya kala bino bintu.—Byubilo 8:26-39; Yakoba 1:5.