Bungauzhi ke byambo byafuma kwi Lesa. Baibolo waamba’mba bangauzhi “baambilenga byafumine kwi Lesa byo bebatangijile ku mupashi wazhila.” (2 Petelo 1:20, 21) Onkao mambo, ngauzhi ke muntu ye babuula byambo kwi Lesa ne aye wabuula bakwabo.—Byubilo 3:18.

Nga bangauzhi batambulanga byepi byambo kufuma kwi Lesa?

 Lesa waingijishe mashinda apusana-pusana pa kubuula bangauzhi milanguluko yanji:

•   Kunemba. Lesa waingijishe jino jishinda kimye kyo apele Mosesa Mikambizho Jikumi yo anembele.—Kulupuka 31:18.

•   Kwamba byambo kwingijisha bamalaika. Pa kimye kimo Lesa waingijishe malaika kubuula Mosesa byambo byo afwainwe kuya na kubuula Felo wa ku Ijipita. (Kulupuka 3:2-4, 10) Inge Lesa wakeba’mba bantu banji bakomvwe byambo byanji byonka byo ebyamba, watumanga bamalaika kuya na kubuulañana byobyo byambo, byonka byo aubile kimye kyo abuujile Mosesa amba: “Unembe bino byambo, mambo monka mwayila bino byambo, mo mo mbena kulayañena ne obewa ne bena Isalela.”—Kulupuka 34:27. a

•   Bimwesho. Bimye bimo Lesa wamweshanga bimwesho ku bangauzhi saka babula kulaala. (Isaya 1:1; Habakuka 1:1) Mu bimwesho bimo bantu besambilenga ne na muntu ye bamwenenga mu kimwesho. (Luka 9:28-36; Lumwekesho 1:10-17) Bimye bimo, bamonanga bimwesho saka balaala bino saka babula kuponena mu tulo. (Byubilo 10:10, 11; 22:17-21) Lesa wabuulanga bangauzhi byambo byanji kupichila mu biloto saka balaala.—Danyela 7:1; Byubilo 16:9, 10.

•   Kutangijila milanguluko ya bantu. Lesa watangijilanga milanguluko ya bangauzhi kuba’mba bambenga byambo byanji. O ene mambo Baibolo o aambila’mba: “Binembelo byonse byanembelwe na lutangijilo lwa mupashi wa Lesa.” Byambo bya kuba’mba “byanembelwe na lutangijilo lwa mupashi wa Lesa” byakonsha ne kunembwa’mba “Lesa ye wabikilemo.” (2 Timoti 3:16; The Emphasised Bible) Lesa waingijishe mupashi wanji wazhila nangwa’mba ngovu yanji ingila pa “kubika” milanguluko yanji mu bakalume banji. Yajinga milanguluko ya Lesa, bino bangauzhi basajilenga byambo bya kwingijisha.—2 Samwela 23:1, 2.

Nanchi bungauzhi bulumbululatu kwambila jimo bikamweka kulutwe nyi?

 Ine. Bungauzhi bwa mu Baibolo kechi bulumbululatu kubuulañana bikamweka kulutwe ne. Pano bino, byambo bya Lesa byavula byamba pa bikamweka kulutwe nangwa kya kuba kechi byashinkamika ne. Bangauzhi ba Lesa javula bajimunangako bena Isalela pa byubilo byabo byatama. Luno lujimuno lwaambanga pa mapesho o bafwainwe kutambula kulutwe umvwe baumvwina lujimuno, ne bya malwa byafwainwe kwibamwekela umvwe bakana kumvwina lujimuno. (Yelemiya 25:4-6) Bena Isalela byo bafuukulangapo kuba byo bibalengelanga kutambula mapesho nangwa kupita mu bya malwa.—Mpitulukilo ya mu Mizhilo 30:19, 20.

Bungauzhi bumo bwa mu Baibolo bubula kwamba pa bya kulutwe

•   Kimye kimo bena Isalela byo balombele Lesa kuba’mba ebakwashe, watumine ngauzhi kuya na kwibalumbulwila’mba na mambo a kuba’mba bakaine kukookela mikambizho ya Lesa, o ene mambo Lesa o abujila kwibakwasha.—Mitonyi 6:6-10.

•   Kimye Yesu kyo esambilenga na mwanamukazhi mwina Samaliya, waambile pa byajinga bwikalo bwa uno mwanamukazhi kala. Bino bintu Yesu kechi wakonsheshe kwibiyuka kwa kubula kumusolwelabyo kwi Lesa ne. Uno mwanamukazhi waambijile Yesu amba wajinga ngauzhi nangwa kya kuba kechi waambilepo pa bintu bikamweka kulutwe ne.—Yoano 4:17-19.

•   Kimye Yesu kyo bamutotolweshenga, balwanyi banji bamuvwetele pa meso ne kumwambila’mba: “Aula! Ñanyi wakupuma?” Kechi bakambizhenga Yesu kwambila jimo bintu bikamweka kulutwe ne, bino bakebelenga’mba engijishe bulume bwa Lesa pa kuba’mba ayuke wamupuminenga.—Luka 22:63, 64.