Pa kuba’mba tuyuke bupopweshi bwa kine ne bwa bubela, Baibolo waamba’mba: “Mukebayukila ku bipangwa byabo. Nanchi bantu bapa mañanzañanza nangwa makuyu ku miba nyi?” (Mateo 7:16) Byonkatu byapusana muñanzañanza na kichi kya miba, bupopweshi bwa kine byobyo bwapusana na bwa bubela, bupopweshi bwa kine bupanga bipangwa pa kuba bwa bubela kechi bupanga bipangwa ne.

1.   Bupopweshi bwa kine bufunjisha bya kine biji mu Baibolo, kechi bufunjisha maana a bantu ne. (Yoano 4:24; 17:17) Kino kyavwangamo kufunjisha bukine pa mweo ne luketekelo lwa kwikala na bumi myaka ne myaka mu paladisa pano pa ntanda. (Salamo 37:29; Isaya 35:5, 6; Ezikyo 18:4) Kabiji busolola mafunjisho a bubela afunjisha bupopweshi bwa bubela.—Mateo 15:9; 23:27, 28.

2.   Bupopweshi bwa kine bukwasha bantu kuyuka Lesa, kino kyavwangamo kufunjisha bantu jizhina ja Lesa ja kuba’mba Yehoba. (Salamo 83:18; Isaya 42:8; Yoano 17:3, 6) Kechi bafunjisha kuba’mba kyakatazha kufunda pe aye kabiji uji kwalepa ne; abo bafunjisha kuba’mba ukeba atweba kwikala balunda nanji.—Yakoba 4:8.

3.   Bupopweshi bwa kine bufunjisha kuba’mba Lesa ukapulusha bantu kupichila mwi Yesu Kilishitu. (Byubilo 4:10, 12) Bonse baji mu bupopweshi bwa kine bakokela byakambizhe Yesu kabiji bebikishako kuba byo aubanga.—Yoano 13:15; 15:14.

4.   Bupopweshi bwa kine bwamba bingi pa Bufumu bwa Lesa kuba’mba bo bonkatu bantu bo bafwainwa kuketekela. Ba mu bupopweshi bwa kine babulako bantu pa buno Bufumu.—Mateo 10:7; 24:14.

5.   Bupopweshi bwa kine butundaika butemwe bwa kine. (Yoano 13:35) Bufunjisha kunemeka bantu bonse ba mu bisho byapusana pusana kabiji batambwila bantu baamba milaka yapusana pusana, bafuma mu bisho byapusana pusana ne nkomeno yapusana pusana. (Byubilo 10:34, 35) Na mambo a butemwe, bantu baya mu buno bupopweshi kechi baya ku nkondo ne.—Mika 4:3; 1 Yoano 3:11, 12.

6.   Bupopweshi bwa kine kechi buji na bakulumpe bobapa mali ne, kabiji kechi bapana mazhina a mushingi ku bantu baya mu buno bupopweshi ne.—Mateo 23:8-12; 1 Petelo 5:2, 3.

7.   Bupopweshi bwa kine kechi bwivwanga nangwa pachechetu mu bya bumulwila ntanda ne. (Yoano 17:16; 18:36) Nangwa byonkabyo, bantu baya mu buno bupopweshi banemeka ne kukokela kafulumende uji mu kyalo mobekala, kwesakana na mukambizho uji mu Baibolo wa kuba’mba: “Panai bintu bya kwa Kesala kwi Kesala [kwimenako baluusa ba mu kafulumende], ne bintu bya kwa Lesa, kwi Lesa.”—Mako 12:17; Loma 13:1, 2.

8.   Bupopweshi bwa kine butangijila bantu ku bumi, kechi buba bya bisho nangwa bya bantu ne. Baya mu buno bupopweshi balondela byamba Baibolo ne kulondela mizhilo yonse mu bwikalo bwabo. (Efisesa 5:3-5; 1 Yoano 3:18) Bekala bwikalo bwa bwawama, abo batana lusekelo mu kupopwela “Lesa wa lusekelo.”—1 Timoti 1:11.

9.   Aba baji mu bupopweshi bwa kine bakepa. (Mateo 7:13, 14) Baya mu bupopweshi bwa kine javula bebalengulula bingi ku bantu, bebendeleka ne kwibamanyika na mambo a kuba kyaswa muchima wa Lesa.—Mateo 5:10-12.

Bupopweshi bwa kine kechi nebutemwa ne

 Mufumatu byatama mu kusala bupopweshi na mambo a kubatu amba bwitulengela kumvwa bulongo. Baibolo yaambijile jimo kuba’mba, kukekala kimye bantu kyo ‘bakevuzhizha bene bafunjishi bakambanga bintu byo bakebatu abo bene kumvwa.’ (2 Timoti 4:3) Bino Baibolo itundaika kulondela ‘kupopwela kwatoka kabiji kwabula kutama kwi Lesa wetu kabiji Tata,’ nangwa kya kuba buno bupopweshi kechi bwayukanyikwa ku bantu bavula ne.—Yakoba 1:27, Yoano 15:18, 19.