Baibolo waambapotu jimo pa nnembo. Pa Bena Levi 19:28 paamba’mba: “Kechi mwafwainwa kwinemba nembo ne.” Lesa wapaine uno muzhilo ku mukoka wa bena Isalela. Kabiji kino kibalengejile kupusanako na bantu bo baikalanga nabo mu kipikipi benembawile nnembo yamwesheshenga mazhina a balesa babo. (Mpitulukilo ya mu Mizhilo 14:2) Muzhilo ye bapeele bena Isalela kechi ubena kwingila ku bena Kilishitu lelo jino ne. Bino jifunde jiji mu uno muzhilo jakonsha kwitukwasha bingi.

Nanchi mwina Kilishitu wakonsha kwinemba nnembo nangwa kulenga kipikichala pa mubiji wanji nyi?

 Binembelo biji panshipo bisakwimukwasha kuyuka mukumbu:

•   “Banabakazhi nabo bafwainwa kuvwalanga bulongo, na kwipelula.” (1 Timoti 2:9) Jino jifunde jingila ku bonse, banabakazhi ne banabalume. Twafwainwa kuvwalanga mu jishinda jibula kutuntwisha bakwetu kabiji kechi kuvwala kya kuba’mba bantu betutote ne.

•   Bamo benemba nnembo kuba’mba bantu bebayukilengako nangwa kukeba kwikala na bwana bwa bene. Pakuba bakwabo benemba nnembo kumwesha’mba baji na luusa pa mubiji wabo. Nangwa byonkabyo, Baibolo watundaika bena Kilishitu amba: “Mulambule mibiji yenu kwikala kitapisho kyumi, kyazhila, kyaitabilwa kwi Lesa ne kwingila mwingilo wazhila na bulume bwenu bwa kulanguluka.” (Loma 12:1) Ingijishainga “bulume bwenu bwa kulanguluka” kuyuka ene mambo o mubena kukebela kwinemba nnembo. Inge mubena kwinemba nnembo na mambo kukeba kulondelatu bibena kuba bakwenu nangwa kumwesha’mba mujipo mu jibumba jimo, yukai’mba mwakonsha kupimpula milanguluko yenu, bino nnembo kechi ikafuuchika ne. Kuyuka ene mambo o mukebela kuba kyokyo kintu kukemukwasha kufuukulapo bulongo.—Byambo bya Maana 4:7.

•   “Bintu bifuukula muntu wingila na ngovu bikalumbuluka, pakuba bonse boba bintu na kanswatu bakayanda.” (Byambo bya Maana 21:5) Bavula banyemenatu kwinemba nnembo kwa kubula kulangulukapo pa bikafumamo. Pakebewa mali avula bingi pa kufuuta nnembo kabiji ikola bingi. Bashayuka bataana kuba’mba busulu bwa kufuuta nnembo bwavula bingi. Kabiji bantu bavula baji na ino nnembo belangulusha’mba inge kechi benembele ne.