Ee wakonsha kwimukwasha. Lesa wata bingi muchima bakalume banji bakolwakolwa. Baibolo waamba pa muntu wakishinka ubena kukolwa amba: “Yehoba ukamukosesha mu kimye kya misongo yanji pa mwanya.” (Salamo 41:3) Inge muji na kikola kibula kupwa, bintu bisatu biji panshipo byafwainwa kwimukwasha kuchinchika:

1.   Lombainga kwi Lesa kwimupa bulume bwa kuchinchika. Mukekala na “mutende wa Lesa wakila milanguluko ya bantu” ukemukwasha kukepeshako bijikila nangwa kya kuba mubena kupita mu makatazho.—Filipai 4:6, 7.

2.   Kuta muchima pa makatazho ne. Baibolo waamba’mba: “Muchima wa lusekelo ye muchi wawama, bino muchima wauba bulanda upwisha ngovu.” (Byambo bya Maana 17:22) Ibikaiko kwikala na lusekelo, nangwa kya kuba lusekelo kechi lukepeshakotu bijikila ne, lukemukwasha kwikala ne na butuntulu bwa mubiji bwawama.

3.   Ketekelai mu milaye ya Lesa kuba’mba ikafika. Luketekelo lukemukwasha kwikala na lusekelo nangwa kya kuba muji na kikola kibula kupwa. (Loma 12:12) Baibolo waambjile jimo kuba’mba kimye kikafika “kafwako muntu nangwa umo ukekala mu kyalo ukamba’mba: ‘Nakolwa” ne.’” (Isaya 33:24) Lesa ukafumyapo bikola byonsetu byakankalwa bantu kupwisha. Kabiji Baibolo walumbulula bantu byo bakabulanga kukota amba: “Mubiji wanji ekale wawama kukila byo ajinga mwanyike; bulume bwa ku bwanyike bwanji bubwelemo mwi aye.”—Yoba 33:25.

 Kishinka ke kino: Nangwa kya kuba tukeba Lesa kwitukwasha, ne atweba Bakamonyi ba kwa Yehoba tuya ku bipatela kuba’mba tubukwe. (Mako 2:17) Nangwa byonkabyo, kechi tutongwela bantu muchima wa kutoma ne, mambo twayuka’mba muntu mwine wafwainwa kwifuukwilapo jishinda jo akeba kubukilwamo.