Ine, kechi ufunjisha’mba inge ‘waitabila ko kuba’mba kyapwa wapuluka’ ne. Muntu watana lupulukilo na mambo a lwitabilo mwi Yesu Kilishitu wakonsha kutaya luno lwitabilo ne lupulukilo pamo. Baibolo wamba’mba kikebewa kwibikako bingi kulamawizha lwitabilo, ‘kulwila na muchima yense.’ (Yuda 3, 5) Bena Kilishitu batanshi batambwijile Kilishitu bebabuujile’mba: “Ikalainga na moyo ne kuzakama byo mubena kwibikishako kuba’mba Lesa akemupulushe.”—Filipai 2:12.

Binembelo bya mu Baibolo bibula kumwesha’mba inge ‘waitabila ko kuba’mba kyapwa wapuluka’

•   Baibolo witujimuna pa kulenga mambo akatampe akonsha kulengela muntu kubula kutwela mu Bufumu bwa Lesa. (1 Kolinda 6:9-11; Ngalatiya 5:19-21) Inge lupulukilo lutwajijila, ko kuba’mba luno lujimuno lwakonsha kwikala lwatu. Bino Baibolo umwesha’mba muntu watana lupulukilo wakonsha kealenge mambo akatampe jikwabo. Ba Bahebelu 10:26 waamba’mba: “Umvwe saka tulenga mambo kyanshiji saka twayuka bulongo bukine, kechi kwakishala kitapisho kikwabo kya bundengamambo ne.”—Bahebelu 10:26; 6:4-6; 2 Petelo 2:20-22.

•   Yesu waambishepo bingi pa kutwajijila kwikala na lwitabilo byo eesakenye mwine ku muñanzañanza kabiji baana banji ba bwanga ku misampi ya uno muñanzañanza. Bamo bajinga na lwitabilo mwi aye pa kumwesha bipangwa, nangwa’mba byubilo byabo, bino palutwe bakankelwe kuba bino ne kwibataya nobe ‘musampi ubula kupanga bipangwa,’ kweela lupulukilo lwabo. (Yoano 15:1-6) Mutumwa Paulo waingijishe kyakumwenako kintutu kimo byo aambile’mba bena Kilishitu babula kutwajijila kwikala na lwitabilo ‘bakebakopolako.’—Loma 11:17-22.

•   Bena Kilishitu bebakambizha ‘kulaba ne kukenkenta.’ (Mateo 24:42; 25:13) Aba babula kutwajijila kulaba kumupashi na mambo a “mingilo ya mu mfishi” nangwa kubula kwingila mingilo itukambizhe, lupulukilo lwabo lupwa.—Loma 13:11-13; Lumwekesho 3:1-3.

•   Binembelo bimwesha’mba aba baji na lwitabilo bafwainwa kutwajijila kuchinchinka mu bukishinka kufika ne ku mpelo. (Mateo 24:13; Bahebelu 10:36; 12:2, 3; Lumwekesho 2:10) Bena Kilishitu ba mu myaka kitota kitanshi bajinga na lusekelo byo bayukile’mba bena Kilishitu bakwabo batwajijile kuchinchika. (1 Tesalonika 1:2, 3; 3 Yoano 3, 4) Baibolo wakonsha kwamba byepi pa kutwajijila kuchinchika inge kya kuba aba babula kuchinchika nabo bakonsha kupuluka?

•   Mutumwa Paulo wayukile’mba lwitabilo lwanji lwakonsha kumupulusha byo ajinga pepi kufwa. (2 Timoti 4:6-8) Pa kimye kimo, wayukile kuba’mba kechi wakonsha kupuluka inge kealondele bisakasaka muchima ne. Wamembele’mba: “Mpumapuma mubiji wami ne kumutwala mu buzha kuba’mba inge nasapwila bantu, mbule kulengululwa.”—1 Kolinda 9:27; Filipai 3:12-14.